Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
58 Глава
1 Чын пӱтӧ. 13 Шуматкечым чын пайремлымаш.1 «Уло йӱкын кычкыре, шкендым ит кучо,
пуч йӱк семын йӱкетым кугемде!
Ончыкто Мыйын калыкемлан тудын титакшым,
Иаков эрге-влаклан – нунын сулыкыштым.
2 Нуно кажне кечын Мыйым кычалшыла кояш тӧчат,
Мыйын корнем пален налаш нунылан пуйто келша –
нуно чын ыштыше да Юмыжын чын судшым шуктышо калыкла койнешт.
Мый дечем чын суд пунчалым йодыт,
Юмо дек нуно лишемаш шонат.
3 ”Молан ме пӱтым кучена? Тый тидым от уж!
Молан шкенам ӱҥышемдена? Тый тидым шотыш от нал”.
А вет пӱтӧ кечын те шке чон йодмыдам шуктеда,
пашазыда-влаклан пашам утыжым ыштыктеда.
4 Тендан пӱтыда вурседылмаш ден ӱчашымашым веле шукемда,
моло-влакым те чаманыде кыреда.
Умбакыжат пӱтым тыге кучеда гын,
тендан йӱкда кӱшнӧ колмо ок лий.
5 Тыгай мо пӱтым Мый тендан деч вучем –
тыгай кечым, кунам айдеме шкенжым ӱҥышемда,
кунам омыж семын вуйжым ӱлык сава,
чоштыра вургем дене ломыжышто кия?
Тидым мо те пӱтӧ, Господьлан келшыше кече маныда?!
6 Теве могай пӱтӧ Мыланем келша:
чындымылык шинчырым рончо,
омыта кандырам рудо,
индыралтше-влакым эрыкыш колто,
чыла тӱрлӧ омытам шалате.
7 Шужышо дене киндетым пайле,
суртдымо йорло еҥым шке пӧртышкет пурто.
Чарамат айдемым ужат – чикте,
родо-тукымет дек тупынь ит савырне.
8 Тунам тыйын волгыдет эр ӱжара семын волгалтеш,
пареммашет вашке толеш.
Тыйын чынлыкет ончычет кая,
Господьын чапше тыйым шеҥгечет арала.
9 Тунам тый сӧрвален йодат – Господь колеш,
полышым йодын кумалат – Тудо каласа: ”Мый тыште улам!”
Кунам тый шке коклат гыч темдыше омытам кораҥдет,
парнят дене ончыктымым да осалым ойлымым чарнет,
10 кунам шужышылан мо улетым пукшет,
орланышылан мо кӱлешым пуэт –
тунам волгыдет пычкемыште волгалтеш,
тыйын пычкемышет кечывал кече гай лиеш.
11 Господь тыйым вӱден наҥгая,
тыйым кошкышо мландыштат пукша,
чыла луэтым пеҥгыдемда.
Лият тый вӱдыжтарыме сад гай,
нигунам кошкыдымо памаш гай.
12 Тошто олмышто тый ола-влакым угыч нӧлталат,
ончычсо тукымын пыштыме негызше ӱмбалне угыч чоҥет.
Лӱмдат тыйым ”Рожын пырдыжым Олмыктышо”,
”Ола уремлам угыч Чоҥышо”.
13 Шуматкечым лавыраш тошкымо деч йолетым кучет гын –
Мыйын святой кечыштем чон йодмет почеш от ыште,
шуматкечым куанлан, Господьын ты святой кечыжым жаплыме кечылан шотлет,
тыглай пашатым, кумыл шупшмет почеш ыштымым
да яра мутланымашым коден,
шуматкечым жаплаш тӱҥалат гын,
14 Господь дене муат куанымашым!
Мый тыйым мландын кӱкшӧ верлашкыже кӱзыктем,
Иаков кугезе кочатын мландыштыже
тылат чыла мо кӱлешым пуэм».
Теве мом Господь каласен.
Глава 58
