Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
48 Глава
1 Ӱскыртланыше Израиль. 12 Кир – Господьын ойырен налме онжо. 17 «О, Израиль, тый Мыйын кӱштымаш-влакем колыштат ыле гын!»1 Колышт тидым, Иаков тукым –
те, кӧмыт Израиль манын лӱмдалтыда
да Иудан нӧшмыж гыч лектында,
те, кӧмыт Господьын лӱмжӧ дене товатледа
да Израильын Юмыжым ӱжын кумалыда,
но чынлык да ару шӱм-чон дене огыл!
2 Те шкендам святой олан шочшыжо-влаклан шотледа
да Израильын Юмыжлан эҥертеда,
Тудыжын лӱмжӧ – Господь Саваоф.
3 «Мо ондак лийын, Мый шукертак ойленам,
тиде шомак умшам гыч лектын, Мый тудым увертаренам.
Чыла тидым Мый вучыдымын ыштенам, да ойлымем шукталтын.
4 Мый паленам: те ӱскырт улыда,
шӱйысӧ шӧнда – кӱртньӧ, саҥгада – той.
5 Сандене ”Тидым шояк юмем ыштен,
велен ыштыме юмем тидлан лияш кӱштен” ида каласе манын,
Мый чыла тидым тыланда ондакак ойленам,
шукталтмыж деч ончыч увертаренам.
6 Те тидын нерген колында – ынде чыла тидым ончалза!
Те тидым огыда умыло мо?
А кызыт Мый тыланда уым увертарем,
тудо шинчада деч шылтыме, тыланда палыдыме лийын.
7 Тидыже ондак огыл, а кызыт ышталтеш,
тачысе кече марте те тидын нерген колын огыдал,
сандене ”Тидым ме паленна” манын огыда керт.
8 Тидын нерген те колынат, паленат огыдал,
ожнысекак тендан пылышда почмо лийын огыл.
Ӱшанле огыл улмыдам Мый палем,
шочмекыдак тендам вуянче манын лӱмденыт.
9 Шке лӱмемлан кӧра Мый шыдемлан ылыжаш пуэн омыл,
шке чапемлан кӧра тендам пытарыме деч Шкемым кученам.
10 Мый тендам левыктен эрыктенам, но ший семын огыл,
орлык коҥгаште тендам тергенам.
11 Шкаланем кӧра, Шкаланем кӧра Мый тидым ыштем.
Мыйын лӱмем мыскылыме ынже лий!
Шке чапем Мый весылан ом пу.
12 Колышт Мыйым, Иаков, тый, Израиль, ойырен налмем!
Мый Юмо улам, Мый икымше да Мыяк пытартыш улам.
13 Мыйын кидем мландым негызлен,
пурла кидем кавам шарен пыштен.
Кунам Мый нуным ӱжам, пырля толын шогалыт.
14 Погыныза чылан да колыштса:
кӧ шояк юмо-влак кокла гыч тидым ончылгоч каласен?
Господь тудым
*а йӧрата,
да Господьын шонен пыштымыжым тудо Вавилон дене шукта,
халдей-влаклан Господьын виян кидшым ончыкта.
15 Мый, Мый каласенам да тудым ӱжын конденам,
да тудын корныжо сеҥымашан лиеш.
16 Лишемза Мый декем да колыштса:
тӱҥалтыш гычак Мый шолып огыл ойленам,
кунам тиде шукталташ тӱҥалын, Мый тушто лийынам».
Кызыт Господь Юмо мыйым да шке Шӱлышыжым колтен.
17 Тыге Господь, тыйым Сулен налше, Израильын святой Юмыжо ойла:
«Мый Господь, тыйын Юмет, улам.
Мый тыйым пайдалылан туныктем,
каяш кӱлмӧ корно дене наҥгаем.
18 О, тый Мыйын кӱштымаш-влакем колыштат ыле гын!
Тунам тыйын тыныслыкет эҥер гай йога ыле,
чынлыкет теҥыз толкын гай лиеш ыле.
19 Тыйын тукымет ошма семын шуко,
йочат ошма пырче наре лийыт ыле!
Нунын лӱмышт Мыйын ончычем огыт йом,
ӱштын кудалтыме огыт лий ыле».
20 Кайыза Вавилон гыч, куржса халдей-влак деч!
Куан йӱк дене тидым увертарыза, палдарыза,
тиде уверым мланде тӱр марте шарыза,
ойлыза: «Господь шке Иаков тарзыжым сулен налын!»
21 Ир мландыла гоч наҥгайымыж годым нуно сусынен огытыл,
кӱ курык гыч Тудо нунылан вӱдым луктын:
шелын кӱ курыкым, да тушечын вӱд йоген.
22 «Осал еҥ-влак дене тыныслык ок лий», – ойла Господь.
*а 48:14 Тыште Кир нерген ойлалтеш.
Глава 48
