Выбрать язык
Книги Ветхого Завета
Книги Нового Завета
с русским текстом1 Тидым колмеке, Езекий кугыжа шке вургемжым кушкедын, чоштыра вургемым чиен да Господьын пӧртышкыжӧ каен.2 А полат вуйлатыше Елиакимым, возкалыше Севнам да кугурак иерей-влакым – нунат чоштыра вургемым чиеныт – тудо пророк Исаий, Амос эрге, деке колтен.3 Нунышт Исаийлан каласеныт: «Езекий тыге ойла: ”Таче орлык, мут кучымо да мыскылалтме кече. Аза теве-теве шочшаш, а тудым ышташ вий уке.4 Ала Господь, тыйын Юмет, рабсакын шомакшым колеш? Ассирий кугыжа озаже тудым илыше Юмым мыскылаш колтен. Ала тиде шомакшылан Господь тудым мут кучаш шогалта? Илыше кодшо-влак верчын кумал”».
5 Кунам Езекий кугыжан тарзыже-влак Исаий дек толыныт,6 тудо нунылан тыге вашештен: «Шке озаланда каласыза, Господь тыге ойла: ”Колмо шомакет деч, кудыж дене Ассирий кугыжан тарзыже-влак Мыйым мыскыленыт, ит лӱд.7 Мый тудын шонымашыжым вашталтем – тудо уверым колеш да шке мландышкыже пӧртылеш. Тушто Мый тудым керде дене пытарем”».
8 Тидын деч вара рабсак тушеч каен. Ассирий кугыжан Лахисым коден кайымыже да кызыт Ливна ваштареш кредалмыж нерген колмеке, тудо тушко кугыжа деке каен.9 Вара Ассирий кугыжа уверым колын: «Тый денет кредалаш Тиргак, Эфиопий кугыжа, толеш». Тунам тудо шке еҥже-влакым Езекий деке колтен:10 «Езекийлан, Иуда кугыжалан, тыге каласыза: ”Ассирий кугыжа кидыш Иерусалим пуымо ок лий” манын ит шоно да инанен илыме Юметлан шкендым ондалаш ит пу.11 Мом Ассирий кугыжа-влак чыла моло эл дене ыштеныт – тый колынат. Нуно чылаштым пытареныт. А тый утлен кодам шонет мо?12 Вес калык-влакын юмышт нуным утареныт мо? Ача-кочам-шамыч нине калыкым – Гозан, Харан да Рецефыште илыше-влакым, тыгак Фалассарыште илыше Еден эрге-шамычым – пӱтынек пытареныт.13 Кушто кызыт Емаф ден Арпадын, Сепарваим олан, Ена ден Ивван кугыжашт улыт?»
14 Колтымо еҥ-влакын кидышт гыч Езекий серышым налын да лудын лектын. Вара Господьын пӧртышкӧ каен да Тудын ончылно серышым шаралтен пыштен.15 Езекий Господьлан тыге кумалын:16 «Господь Саваоф, Израильын Юмыжо, херувим-влак ӱмбалне шинчыше! Мландымбалысе кугыжаныш-шамычын Юмышт Тый гына улат, Тый кава ден мландым ыштенат.17 Савыре пылышет, Господь, да кол! Шинчатым поч, Господь, да ончал, Сеннахиримын чыла мутшым кол – тудо Тыйым, илыше Юмым, мыскылаш шке еҥже-влакым колтен!18 Тидыже чынак, Господь – Ассирий кугыжа-влак нине калыкын мландыштым пустаҥденыт,19 а юмышт-влакым тулыш кудалтеныт. Но вет нуно юмо огыл, а айдеме кид дене ыштыме пу да кӱ полган лийыныт, сандене нуным пытарен кертыныт.20 А кызыт, Господь Юмына, тудын кидше деч мемнам утаре! Тек мландымбалысе чыла кугыжаныш-влак пален налыт: Тый гына, Господь, Юмо улат!»
21 Исаий, Амос эрге, Езекий деке тыге каласаш колтен: «Господь, Израильын Юмыжо, тыге ойла: ”Тый Мылам Ассирий кугыжа Сеннахирим шотышто кумалынат.22 Теве тудын нерген Господьын каласыме шомакше:
Койдара, воштылеш тыйым нарашта Сион ӱдыр.
Вуйжым рӱзалта почешет Иерусалим ӱдыр.
23 Кӧм тый мыскылет? Кӧм шӱктарет?
Кӧн ӱмбак йӱкет кугемденат да ӱмбакыже кугешнен ончаш тоштат?
Израильын святой Юмыж ӱмбаке!
24 Тарзет-влак гочын тый Господьым мыскылен ойленат:
’Шуко сарлык орва дене мый курыкыш,
Ливанын умбал тайылышкыже кӱзенам.
Мый тудын эн кӱкшӧ кедр ден эн сай кипарисше-влакым руэнам,
тудын эн кӱкшӧ верлаштыже, чодыра лоҥгаштыже лийынам.
25 Мый таве-влакым кӱнченам да вӱдым йӱынам.
Египетын чыла эҥержым мыйын йолем коштен’.
26 Тый колын отыл мо?
Чыла тидым Мый шукертак палемденам,
акрет кечылаштак шонен пыштенам.
А кызыт тидым шуктенам –
тый чоткыдемдыме ола-влакым шалатенат,
нунын деч лач кӱ ора-шамыч кодыныт.
27 Тушто илыше-влак вийдыме лийыныт,
нуно лӱдын чытырат, намысыш пуреныт.
Нуно пасу кушкыл гай, нӧргӧ лышташнер гай,
леведыш ӱмбалне кушкын шуде кошкышо шудо гай лийыныт.
28 Шинчет мо тый але лектат,
але пурет – Мый чыла палем.
Мыйын ваштареш ажгынен шогалметымат палем.
29 Мый декем сӱрза улметлан, кугешныметлан –
тидын нерген колынам –
нерышкет колчам пижыктем,
умшашкет сорлыкым чиктем
да толмо корнет денак тыйым мӧҥгеш наҥгаем”.
30 Теве тыланет, Езекий, палдарыше пале:
йогышо пырче деч мо кушмым тиде ийын кочкыда,
вес ийын – шке гыч шочшым,
а кумшо ийын ӱдыза да тӱредса,
виноград аҥа-влакым шындыза да саскаштым кочса.
31 Тунам Иуда тукым гыч утлен кодшо-влак
угыч вожым колтат да саскам пуат.
32 Утлен кодшо калык Иерусалим гыч шарлаш тӱҥалеш,
утаралт кодшо-шамыч – Сион гыч.
Господь Саваофын чон йӱлен тыршымыже тидым ышта.
33 Садлан Ассирий кугыжа шотышто Господь тыге ойла:
Тиде олашке тудо ок пуро,
пикш-влакым тушко ок колто,
тудын дек авыртыш дене ок лишем,
тудым авырен налаш мланде кӱкшака-влакым ок ыште.
34 Толмо корныж денак мӧҥгеш пӧртылеш,
тиде олашке ок пуро – тыге Господь ойла.
35 Шкаланем кӧра да Давид тарземлан кӧра
Мый тиде олам аралем да утарен кодем».
36 Тидын деч вара Господьын Суксыжо толын да Ассирий станыште шӱдӧ кандашле вич тӱжем еҥым пытарен. Эрдене кынелыныт – йырым-йыр лач колышо кап-влак кият.37 Тунам Сеннахирим, Ассирий кугыжа, мӧҥгеш савырнен каен да Ниневийыште илен.
38 Икана, кунам тудо шке Нисрох юмыжын пӧртыштыжӧ кумалын, Адрамелех ден Шарецер эргыже-влак тудым керде дене шуралтен пуштыныт, а шкешт Арарат мландыш куржыныт. Сеннахирим олмеш кугыжалан Асардан эргыже шогалын.
Глава 37