Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
31 Глава
Господь Иерусалимым арален налеш.1 Ойго нунылан, кӧмыт Египетыш полышым кычалын каят!
Нуно имне-влаклан инанат,
орва ден виян имнешке-влаклан ӱшанат,
вет нунышт шукын да пеш виян улыт,
а Израильын святой Юмыж дек огыт савырне,
Господьым огыт кычал!
2 Но Тудо мунло: колта туткарым,
шке шомакшым ок вашталте.
Тудо вуянче-влак ваштареш,
осал еҥлан полшышо-шамыч ваштареш шогалеш.
3 Вет египтян-влак Юмо огыл, а айдеме улыт,
да нунын имньышт – шӱлыш огыл, а колышашлык кап.
Кунам Господь шке кидшым нӧлталеш,
полшаш толшо-влак шӱртнят,
полышым налше-влак шуҥгалтыт – чыланат пытат.
4 Господь мылам тыге каласыш:
«Кузе кучымо кочкышыж ӱмбалне ырлыше лев, самырык лев,
йырже погынышо кӱтӱчӧ-влакын кычкырымышт деч ок лӱд
да йӱк-йӱанышт деч ок чакне –
туге Господь Саваоф Сион курык верч,
тудын кӱкшакаж-влак верч кредалаш вола.
5 Кузе кайык шке игыжым арала,
тугак Господь Саваоф арален налеш Иерусалимым,
тудым леведеш, чамана, сакла да утара».
6 Израиль эрге-влак! Кӧ деч те тынар умбак кораҥында, Тудын дек мелын савырныза!7 Ты кечын кажне еҥ шке кидше дене ыштыме, сулыкыш пуртышо ший да шӧртньӧ шояк юмыжым луктын кудалта.
8 «Айдемын кердыж деч огыл ассириян-влак камвозыт,
айдемын кердыже огыл нуным пытара.
Куржыт нуно керде деч,
самырык пӧръеҥышт ӧкым пашам ыштыше лийыт.
9 Кӧлан эҥертеныт, нунышт лӱдын куржыт,
ӧрткышӧ вуйлатышышт сар тистым кудалтен каят», –
тыге ойла Господь,
Кӧн тулжо Сионышто йӱла,
Кӧн возакше – Иерусалимыште.
Глава 31
