Выбрать язык
Книги Ветхого Завета
Книги Нового Завета
с русским текстом6 Кечывалвел кундемысе янлык-влак нерген пророклен ойлымаш.
«Нелылык да орлыкан мланде гоч –
ава лев ден ырлыше левын,
шемгишке ден чоҥештылше кишке-влакын мландышт гоч –
колтымо еҥ-влак осёл тупеш поянлыкым,
верблюд пӱгыреш шергакан пӧлекым
саде калык деке наҥгаят,
но тудын деч ок лий нимогай пайда.
7 Египетын полышыжо арам, пайда деч посна лиеш.
Сандене тудлан лӱмым пуэнам:
”Нимом ыштыде шинчыше Раав”.*а
8 Кызыт кай да тидым нунын ончылно изоҥаште возо,
возен шынде нине мутым вӱдылка книгаш –
тек нуно ончыкылык жаплан,
эрелан, курымешлан аралалт кодыт».
9 Вет тиде вуянче калык,
шояче эрге-влак улыт,
Господьын законжым ынешт колышт.
10 Ончыкужшо-влаклан нуно ойлат:
«Ончык ужмыдам чарныза»,
пророк-влаклан маныт:
«Мыланна чын пророк шомакым ида ойло,
ойлыза мыланна келшыше мутлам,
кумыл нӧлтышӧ кончымашым каласыза.
11 Кораҥза чын корно гыч, тудым кодыза,
ида ойло мыланна Израильын святой Юмыж нерген!»
12 Сандене Израильын Святой Юмыжо тыге ойла:
«Тиде шомакым те кӱлдымыш луктында,
шыгыремдымашлан инаненда,
ондалымашлан эҥертенда!
13 Садлан тиде сулык тыланда шелше семын лиеш,
кудыжо кӱкшӧ, сӱмырлаш ямде пырдыжыште шарла,
да пырдыж вучыдымын ик татыште сӱмырла.
14 Ате семын тудо йыклык шалана,
пуйто шун атым чаманыде пудыртат –
возак гыч тулшолым налаш але пӱя гыч вӱдым кошталаш
ик йӧрышӧ катыкымат пудыргыжо-влак коклаште ок лий муаш.
15 Тыге ойла Господь Юмо, Израильын Святойжо:
Мый декем савырнеда да ласкалыкыште кодыда гын,
те утаралтыда ыле.
Тендан вийда – инанымаш ден тымыкыште».
Но те тидын ваштареш лийында
16 да каласенда: «Уке, ме имне дене кудал утлена».
Ну мо, каен утлашда логалеш!
«Ме писе имне дене кудалына!»
Но тендам поктышо-влакат писе лийыт!
17 Икте лӱдыкта – тӱжем еҥ куржеш,
визытын лӱдыктат – те чылан куржыда,
а утаралт кодшыда-влак курык вуйысо ломаш семын,
чоҥгата ӱмбалысе тисте семын лийыт.
18 Но Господь тендам чаманен налаш вуча
да тыланда полшаш кынелеш.
Вет Господь – чын судым ыштыше Юмо,
Тудлан инаныше-влак улыт пиалан!
19 Сионын калыкше, Иерусалимыште илыше-влак!
Тетла те шорташ огыда тӱҥал –
полышым йодын кычкыреда гын, Тудо серлага.
Тендам колмеке, Тудо тыланда вигак вашешта.
20 Господь тыланда шыгыремдымашын киндыжым пукша
да орлыкын вӱдшым йӱкта,
но Туныктышыда тетла шылаш ок тӱҥал,
Тудым те шке шинча дене ужыда.
21 Те чын корно гыч пурлашке але шолашке савырнеда гын,
шеҥгелне ойлымо йӱкым шке пылышда дене колыда:
«Теве корно, тудын дене кайыза».
22 Тунам те ший дене комыжлымо шояк юмыдам,
шӧртньӧ дене комыжлымо юмын сӱретдам йырныклан шотледа.
Те нуным амырчык семын луктын кудалтеда,
нунылан каласеда: «Йомза тышеч!»
23 Пасуш ӱдымӧ пырчыланда Тудо йӱрым колта,
мландын шочыктымо шурныжо лӧза да лыҥ лиеш.
Кӱтӱда тудо кечын кумда олыклаште кошташ тӱҥалеш.
24 Мландым куралше ӱшкыж ден осёл-влак
кольмо дене пуалтен эрыктыме, шинчал дене варыме кургым кочкыт.
25 Кугу пытарымаш кечын, кунам башне-влак камвозыт,
кажне кӱкшӧ курык ден чоҥгата гыч
изэҥер ден вӱдйогын-влак йогаш тӱҥалыт.
26 Тудо кечын, кунам Господь шке калыкшын сусыржым пидеш
да эмганымыжым паремда,
тылзе кече семын волгалтараш тӱҥалеш,
а кече шым пачаш волгыдынрак,
шым кечын волгыдыж дене волгалташ тӱҥалеш.
27 Теве, Господьын лӱмжӧ умбачын толеш!
Тулйолкын семын Тудын кугу шыдыже йолген йӱла.
Умшаже Тудын шыде дене темын,
йылмыже Тудын чыла пытарыше тул гай.
28 Шӱлалтымыже ташлыше вӱдйогын гай,
вӱдшӧ тудын шӱй марте шуэш.
Калык-влакым Тудо пустаҥдымаш шокте гоч колта,
умшашкышт сорлыкым чикта –
тудыжо нуным йоммашыш наҥгая.
29 А те мураш тӱҥалыда,
святой пайрем кастене мурымо семын муреда.
Господьын курыкышкыжо, Израильын кӱ курыкшо деке,
шиялтыш йӱк почеш кӱзышӧ еҥын гай
шӱм-чонда тунам йывырта.
30 Кӱдырта Господь кӱдыратле йӱкшӧ дене,
шке кидше дене Тудо пера –
кугу шыде да чыла пытарыше тул дене,
тале йӱр, тӱтан мардеж да кугу шолем дене!
31 Господьын йӱкшӧ деч Ассирий лӱдын чытырна,
шке тояж дене тудым Господь пытара.
32 Тимпан да кӱсле йӱк шоктымо годым
Тудо наказатлыше тояж дене угыч да угыч кыраш тӱҥалеш.
Нӧлталме виян кидше дене Господь кая тудын ваштареш!
33 Вет Тофет*б шукертак ямде,
тудым кугыжалан ямдылыме.
Тиде вер келге да кумда,
тушто шуко пу, кугу тул йӱла.
Чӱкчыгиш толкын семын тудым
Господьын шӱлалтышыже ылыжта.
*а 30:7 Раав – мифысе теҥыз янлык, тудо осал вийым да пытымашым ончыкта.
*б 30:33 Тофет – Йӱлалтыме вер, тушто Молох юмо лӱмеш йоча-влакым тул гоч колтеныт.
Глава 30