Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
16 Глава
Моав-влак Иерусалим деч полышым арам йодыт.1 Мландын озажлан пӧлек шотеш пача-влакым колтыза –
ир мландысе Села гыч Сион ӱдырын курыкышкыжо колтыза!
2 Арноным келын вончымо вер воктене
Моавын ӱдыржӧ-влак пыжаш гыч камвочшо
да шулдыржо дене лупшкедылше кайыкиге гай лийыт.
3 ”Каҥашым пу, пунчалым лук –
тек ӱмылет мемнам кечывалым йӱд семын леведеш!
Поктен колтымо-влакым шылте,
куржшо-шамычым нуным кычалше кидыш ит пу!
4 Илаш пурто поктен колтымо моав-влакым,
пытарыше деч шылын утлымо вер нунылан лий!”
Кунам шыгыремдылше-влак огыт лий, пустаҥдымаш пыта,
да тиде мландым тошкен коштшо-влак йомыт,
5 тунам престол порылык дене пеҥгыдемеш,
да тушко чынлык дене Давидын пӧртшӧ гыч судья шинчеш –
чыным кычалше, эре чын ыштыше.
6 Ме колынна Моавын кугешнымыже,
утыждене кугешнымыж нерген,
оҥым кадыртымыже, шкем кӱшкӧ шындымыже
да тырга улмыж нерген,
но тудын моктанымыже пуста улеш.
7 Сандене моав-влак тек шортыт,
шке мландышт шотышто чылан магырат.
Кирхарешетысе изюмым
*а шарналтен,
ойгыш логалше-влак тек шортыт!
8 Кошкеныт Есевонысо пасу-влак,
Сивмасе виноград вондер-влак.
Калык-шамычын вуйлатышышт эн сай виноград укшлам руэныт.
Нине виноград аҥа-влак ондак Иазер марте,
ир мланде дек шумеш шуйналтыныт.
Нунын игышт шарлен,
теҥыз вес могырыш шуын улмаш.
9 Сандене мыят Сивмасе вондер-влак шотышто
Иазер семын шортам.
Есевон ден Елеал,
шинчавӱдем дене тендам вӱдыжтарем,
вет саскам погымо да тӱредме жап годым
куан йӱк тендан дене тетла ок шокто.
10 Садлаште йомын куанен йывыртымаш,
огыт муро виноград аҥалаште, куанен огыт йӱклане.
Темден лукмо верлаште нигӧ виноградым ок тошко,
куанле йӱк-йӱанлан толын мучаш.
11 Моав шотышто шӱмем шортеш кӱсле семын,
Кирхарешет верч чонем шортеш.
12 Шнуй кӱкшакашке кумалаш толын,
Моав шкенжым арам улныктара,
шнуй верышкыже толеш,
но тудлан нимо ок полшо».
13 Теве Господьын Моав шотышто шукертак каласыме шомакше.14 А кызыт Господь тыге ойла: «Кум ий гычын, тарлалтме ий-влакым шотлымо семын шотлаш гын, Моавын чапше вола да тудын шуко чотан калыкше иземеш, а кӧмыт утаралт кодыт, нуно шагал да начар лийыт».
*а 16:7 «Кирхарешетысе изюмым» – тидым «Кирхарешетын пеҥгыде негызшым» манынат умылаш лиеш.
Глава 16
