Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
15 Глава
Моав мланде нерген пророклен ойлымаш.1 Моав нерген пророклен ойлымаш.
«Ар-Моавым ик йӱдыштӧ пустаҥдат, тудым шалатат!
Кир-Моавым ик йӱдыштӧ пустаҥдат, тудым шалатат!
2 Баит ден Дивонышто илыше-влак кӱкшакашке кӱзат,
толыт нуно святой верлашке шорташ.
Нево ден Медева верч Моав мӱгырен шортеш.
Чылаштын ӱпышт тӱредме, пондашышт нӱжымӧ.
3 Чоштыра вургемым чиен, уремлаште коштыт,
пӧрт леведыш ӱмбалне да погынымо верлаште
мӱгырен шортыт чылан, шинчавӱдым йоктарат.
4 Магырат Есевон ден Елеал,
шокта йӱкышт Яац марте.
Мӱгырен шортыт Моавын сарзыже-влак,
шӱмышт нунын чытыра.
5 Чонем Моав верч кычкырен шортеш!
Тушто илыше-влак Сигорыш, Кумшо Эглаш куржыт,
Лухитыш шортын кӱзат,
азапыш логалмыштлан Хоронаим корнышто магырат.
6 Нимримын вӱдшӧ йомын, шудо кошкен,
кушкыл лывыжген – нимогай ужарге кодын огыл.
7 Уло погыштым, мом арален коденыт,
нуно Аравим эҥер вес могырыш наҥгаят.
8 Кугун магырыме йӱк Моавын кундемлажым темен,
нунын шортмышт Эглаим, Беэр-Елим марте шокта,
9 вет Димонын вӱдшӧ вӱр дене темын.
Но Мый Димон ӱмбак эше весымат колтем –
утлышо моав-влак, тиде элыште кодшо-шамыч ӱмбаке
лев-влакым колтем.
Глава 15
