Выбрать язык
Книги Ветхого Завета
Книги Нового Завета
с русским текстом1 Дамаск нерген пророклен ойлымаш.
«Дамаск тетла ола ок лий,
тудын деч лач кӱ ора кодеш.
2 Ароерысе ола-влак коден кайыме лийыт,
тушто кӱтӱ-влак канен кияш тӱҥалыт,
нуным лӱдыктышӧ нигӧ ок лий.
3 Ефремын чоткыдемдыме олаже-влак йомыт,
Дамаскыште кугыжа кучемвий тетла ок лий.
Израильтян-влакын чапышт дене мо лийын,
тидак Сирийын утаралт кодшо еҥже-шамыч дене лиеш», –
ойла Господь Саваоф.
4 «Тудо кечын Иаков тукымын чапше иземеш,
кӱжгӧ капше явыга.
5 Тиде жап тӱредме пагыт гай лиеш –
тӱредшын кидше шурно парчам пӱчкеш,
да Рефаим лапверыште шурно парчам погат.
6 Тушто икмынярын веле кодыт –
лач тыге лиеш олив пушеҥгым рӱзалтыме годым,
кунам эн кӱшыл укшышто кок-кум олив,
иктаж укшышто ныл-вич саска гына кодеш», –
ойла Господь, Израильын Юмыжо.
7 Тудо кечын еҥ-влак шке Ыштышышт дек савырнат,
шинчаштым Израильын Святой Юмыж ӱмбак виктарат.
8 Чоҥымо жертвенникыштым нуно тетла огыт ончал,
шке кидышт дене ыштыме Ашера меҥге
да тӱтырымӧ жертвенник ӱмбак шинчаштым огыт савыре.
9 Израиль эрге-влакын ты мландыш толмекышт мо лийын, тудо кечын нунын чоткыдемдыме олашт дене тидак лиеш: тушто илыше-шамыч куржыт, чылажат пустаҥеш, сип чодыра-влак гына кодыт.
10 Монденат тый утарыше Юметым,
шарналтен отыл тыйым аралыше Кӱ курыкым!
Сандене йот юмо-влак лӱмеш садым куштет,
йот виноград укшлам шындет.
11 Шындымет кечынак нуно кушкын шогалыт,
тудо эрденак пеледаш тӱҥалыт.
Но кунам орлык ден чарныдыме корштымаш кече толеш,
тыйын лектышет ок лий.
12 О, калык-влакын йӱк-йӱанышт шокта,
гӱжлат нуно теҥыз семын!
О, тукым-влакын гӱжлымышт шокта,
лӱшкат нуно кугу вӱд семын!
13 Гӱжлат калык-влак кугу вӱд семын!
Но Тудо нуным лӱдыкта, да нуно куржыт умбаке,
мардежын курыкыш наҥгайыме арва семын,
тӱтан мардежын поктымо пурак семын чошат.
14 Кастене шучкылык толеш!
Эр марте нуно огыт код.
Теве мемнам агыше-влакын пӱрымашышт,
теве мо нуным вуча!
Глава 17