Выбрать язык
Книги Ветхого Завета
Книги Нового Завета
с русским текстом3 Тудо кечын, кунам Господь тыйым орлык, ойго да ӧкым ыштыме неле паша деч утара,4 Вавилон кугыжа нерген тый воштылчык мурым мурет:
”Уке ынде орландарыше,
тудын кугу шыдыжлан толын мучаш!
5 Господь осал-влакын пондыштым,
вуйлатыше-шамычын кучемвий тояштым пудыртен.
6 Нуно, ажгынен, калык-влакым чарныде кыреныт,
шыде вуйлатыше лийын, тукым-шамычым чаманыде темденыт.
7 Уло мланде ынде тыныслын кана,
лач куанен кычкырыме йӱк йоҥга.
8 Тыйын нерген колын, кипарис-влак куанат,
Ливан кедр-влак йывыртат.
Нуно ойлат: ’Курымеш мален колтымекет,
мемнам руаш ынде нигӧ огеш тол’.
9 Мланде йымалысе вес тӱня тылат кӧра пудыранен,
тыйым вашлияш вашка.
Тылат кӧра тудо колышо-влакын чоныштым помыжалтарен:
мландымбалне ондак вуйлатыше чыла оным,
калык-влакын чыла кугыжаштым престолышт гыч кынелтен.
10 Нуно чылан тылат каласат:
’Тыят мемнан гай вийдыме лийынат!
Тыят мемнан гай лийынат!’
11 Тыйын чапетым вес тӱняшке
кӱсле семет дене пырля сӱмырал шуымо.
Шукш-влак лийыныт вакшет,
нунак улыт тыйын леведышет.
12 Кузе тый камвозынат кава гыч,
эр шӱдыр, ӱжаран эргыже!
Мланде ӱмбак сӱмырал шуымо улат,
калык-влакым тошкышо!
13 Тый шоненат: ’Кӱзем кавашке,
Юмын шӱдыржӧ-влак деч кӱшнӧ престолым шындем
да тора йӱдвелыште юмо-влакын погынымо курыкышкышт шинчам.
14 Кӱзем пыл-влак деч кӱшкӧ,
Чыла деч Кӱшылысӧ гай лиям’.
15 Но тый сӱмырал шуымо улат вес тӱняшке,
мланде пундашын келгытышкыже.
16 Тыйым ужшо-влак тӱткын ончалыт да ӧрыт:
’Тиде тудо мо, кӧ мландым, кугыжаныш-влакым чытырыктен,
17 тӱням ир мландыш савырен,
ола-шамычым шалатен,
пленыш налме-влакым мӧҥгышкышт колтен огыл?’
18 Калык-влакын чыла кугыжаштым тоеныт чап дене,
кажныже кия поян шӱгарыштыже.
19 А тый шке шӱгарыштет от кий,
тый йӧрдымӧ укш семын кудалтыме улат!
Киет керде дене шуралтен пуштмо-влак коклаште,
кӧмыт кӱ вынемыш улыт кудалтыме.
Мландымбалне кийыше капетым коштыт тошкен!
20 От лий тый моло кугыжа семын тойымо,
вет шке мландет пустаҥденат, шке калыкет пытаренат.
Тек осал тукымын лӱмжӧ нигӧн умшаж гыч ок лек!
21 Ача-кочаштын титакыштлан тудын эргыж-влакым пушташ ямдылалтса –
тек нуно мландым сеҥен огыт нал,
тек нунын олашт тӱня мучко огыт шарле”.
22 ”Мый нунын ваштареш кынелам”, –
ойла Господь Саваоф.
”Мый Вавилонын лӱмжым да тушто утаралт кодшо-влакым,
йочаж ден уныкаже-влакым чыла пытарем”, –
ойла Господь.
23 ”Мый тудым купыш савырем,
шоҥшо-влакын илемыштым ыштем,
чыла пытарыше ӱштервоштыр дене ӱштыл шуэм”, –
ойла Господь Саваоф».
24 Тыге Господь Саваоф товатлен ойлен:
«Кузе Мый шонен пыштенам, тугак лиеш,
мом палемденам, тидак лиеш.
25 Мый шке мландыштем ассириян-влакым пытарем,
шке курыкыштем нуным тошкем.
Мыйын калыкемын омытаже кудашме лиеш,
вачӱмбачше нумалтыш камвозеш».
26 Теве пӱтынь мланде шотышто палемдыме пунчал,
теве чыла калык ӱмбак шуялтыме кид!
27 Вет тидым Господь Саваоф палемден –
кӧ тудым вашталтен кертеш?
Тудын кидше шуялтыме – кӧ тудым кораҥден кертеш?
28 Ахаз кугыжан колымо ийын тыгай пророк шомак лийын:
29 «Ит куане, филистим мланде,
тыйым кырыше пондын пудыргымыжлан!
Вет кишкын вожшо гыч шемгишке лектеш,
тудын саскаже чоҥештылше кишке лиеш.
30 Тунам эн йорло-влак темше лийыт,
незер-шамыч малаш возыт лӱдде.
А тый дечет кодшо вожым пытарем шужымаш дене,
утаралт кодшет-влак лийыт пуштмо.
31 Шортса, капка-влак! Урмыж, ола!
Лӱдын чытыре, пӱтынь филистим мланде!
Вет йӱдвел гыч шикш толеш –
тиде сарзывий лишемеш,
тушто почеш кодшо уке.
32 Мом каласаш тиде калыкын уверзыже-влаклан? –
Господь Сионлан негызым пыштен,
Тудын калыкшын йорло еҥже-влак
тушто утаралтме верым муыт».
Глава 14