Выбрать язык
Книги Ветхого Завета
Книги Нового Завета
с русским текстом1 Вавилон нерген пророклен ойлымаш – тудым Исаий, Амос эрге, кончымаш гоч налын.
2 «Чара курыкышто тистым нӧлталза,
чот кычкырыза, кидда дене рӱзыза –
тек он-влакын капкашкышт пурат.
3 Шкемын ойырен налме-влакемлан Мый кӱштымашым пуэнам,
шыдем опталаш манын, виян сарзе-влакем ӱжынам –
Мыйын кӱдыратле улмемлан нуно куанат.
4 Курыклаште кугу йӱк-йӱан шокта,
тушто – пуйто кугу калык тӱшка.
Пырля погынен, кугыжаныш ден калык-влак лӱшкат –
Господь Саваоф сарзывийжым кредалаш ямдыла!
5 Толыт нуно тора эл гыч, каватӱр гыч –
Господь да Тудын шыдыжын саргуралже-влак толыт
уло мландым пытараш.
6 Чот шортса, вет Господьын кечыже лишне!
Чылакертшын колтымо пытарымашыже семын тудо толеш.
7 Сандене чылаштын кидышт лушка,
кажныжын шӱмжӧ лӱдын кӱлтка.
8 Чылан лӱдыт, орлык ден корштымаш нуным авалтат,
йочам ыштыше ӱдырамаш семын тӱҥалыт йӧсланаш.
Икте-весышт ӱмбаке лӱдын-ӧрткен ончат,
чурийышт нунын йӱлаш тӱҥалеш.
9 Теве толеш Господьын шучко кечыже
кугу да когартарыше шыде дене!
Тудо мландым пустаҥда,
тудын ӱмбач чыла сулыканым пытара.
10 Кавасе шӱдыр-влак волгалтарымым чарнат,
кече лекмыж годым пычкемыш лиеш,
тылзе огеш волгалтаре.
11 ”Мый тӱням осал пашажлан,
осал еҥ-шамычым сулыкыштлан наказатлем.
Кугешныше-влакын сӱрзалыкыштлан*а мучашым пыштем,
шыгыремдылше-шамычын кугешнымашыштым ӱлыкшемдем.
12 Мый тыге ыштем – айдеме-влак яндар шӧртньӧ деч,
Офирысе шӧртньӧ деч шуэнрак вашлиялташ тӱҥалыт.
13 Тидлан Мый кавам рӱзалтем,
да мланде Господь Саваофын кугу шыдыж деч
шке верже гыч тарвана –
Тудын йӱлышӧ шыдыжын кечынже тиде лиеш.
14 Поктен кайыме ирказа да кӱтӱчӧ деч посна коштшо шорык-влак семын
тунам кажне еҥ шке калыкше дек пӧртылеш,
кажныже шке мландышкыже куржеш.
15 Но кӧ логалеш, тудым шуралтен пуштыт,
кӧм кучат – керде деч камвозеш.
16 Азаштым шинча ончылнышт перен пуштыт,
пӧртыштым агат, ватыштым намыслат.
17 Мый нунын ӱмбак мидян-влакым колтем,
кӧмыт шийлан кумылан огытыл,
кӧмыт шӧртньым нимоэш ужыт.
18 Нунын пикшышт самырык рвезе-влакым пытара,
аза-шамычым илышым ок кодо –
йоча-влак дек ок лий нимогай чаманымаш”.
19 Вавилонымат – кугыжаныш-влакын моторлыкшым,
халдей-шамычын чап ден кугешнымашыжым –
Юмо пытара Содом ден Гоморра семын.
20 Нигӧ тушто нигунам ок вераҥ,
тушто нигӧ илаш ок тӱҥал.
Ок шынде тушан омашыжым араб,
кӱтӱчӧ-влак кӱтӱшт дене огыт кане.
21 Ир янлык-влак тушан вераҥыт,
пӧрт-влак тумна дене темыт.
Илаш тӱҥалыт тушто страус-шамыч,
пунан ирказа-влак тӧрштылаш тӱҥалыт.
22 Карманыштышт тулпире-шамыч,
сӧрал полатыштышт гиене-влак урмыжаш тӱҥалыт.
*а 13:11 Сӱрзалык – наглость, дерзость.
Глава 13