Выбрать язык
Книги Ветхого Завета
Книги Нового Завета
с русским текстом1 Исаийын, Амос эргын, ужмо кончымашыже. Иуда ден Иерусалим шотышто шомак.
2 Пытартыш кечылаште тыге лиеш:
курык, кушто Господьын пӧртшӧ шинча,
чыла курык ден кӱкшака деч кӱшнӧ шогаш тӱҥалеш,
да тудын дек чыла калык погына.
3 Шуко калык тушко мия да каласа:
«Толза – Господьын курыкышкыжо,
Иаковын Юмыжын пӧртышкыжӧ, кӱзена.
Тудо мемнам шке корныжлан туныкта,
да ме Тудын йолгорныж дене кошташ тӱҥалына».
Вет Сион гычын закон лектеш,
Иерусалим гыч – Господьын шомакше.
4 Тудо калык-влаклан судым ышта,
шуко тукымым тӧрла.
Шке кердышт гыч нуно шогавуйым,
а умдышт гыч сорлам таптен ыштат.
Ик калык вес калык ӱмбак керде дене ок кае,
кредалаш тетла огыт тунем.
5 Иаков тукым, тол –
Господьын волгыдыштыжо кошташ тӱҥалына!
6 Тый шке калыкетым, Иаков тукымым, коден каенат.
Вет нуно эрвел еҥ-влак деч шукылан тунемыныт:
филистим-влакын гай юзо айдемышт уло,
йот тукым еҥ-шамыч дене келшат.
7 Нунын мландышт ший-шӧртньӧ дене темын,
поянлыкыштым ок лий шотлен пытараш.
Нунын мландышт имне дене темын,
орвашт-влакым ок лий шотлен лукташ.
8 Нунын мландышт шояк юмо дене темын:
кидышт дене, шке парняшт дене ыштыме арверлан
вуйыштым сават.
9 Ӱлыкшемын,*а вуйым сакен айдеме,
Тый тудын титакшым от кудалте.
10 Господь деч лӱдын, курж кӱ курыкыш,
кӱдыратле куатше деч шылын шич мланде кӧргыш.
11 Кугешныше ончалтыш ӱлыкшемеш,
айдеме моктанымаш укешке лектеш –
Господь гына тудо кечын кӱшнӧ лиеш.
12 Чыла кугешныше, тырга да шкем кӱшкӧ шындыше ӱмбаке
Господь Саваофын кечыже толеш –
нуно ӱлыкшемдыме лийыт!
13 Тудо кече толеш кӱкшӧ, кӱшкӧ нӧлталтше Ливан кедр-влак ӱмбаке,
Васанысе чыла тумо ӱмбаке,
14 чыла кӱкшӧ курык ден кӱшкӧ нӧлталтше кӱкшака ӱмбаке,
15 чыла кӱкшӧ башне ден чоткыдемдыме пырдыж ӱмбаке,
16 Фарсис корабль-влак ӱмбаке,
нунын кондымо эн чапле сӧрастарыш-влак ӱмбаке.
17 Камвозеш айдемын кугешнымашыже,
айдеме моктанымаш укешке лектеш.
Господь гына тудо кечын кӱшнӧ лиеш,
18 шояк юмо-влак йӧршешлан йомыт.
19 Кунам Господь тӱням мут кучыкташ кынелеш,
Тудын деч лӱдын, еҥ-влак кӱ курык шелшыш куржыт,
кӱдыратле куатше деч келге коремыш шылын шинчыт.
20 Шкаланже кумалаш ыштыме ший ден шӧртньӧ шояк юмыжо-влакым
айдеме тиде кечын удыр*б ден водывычыраҥге-шамычлан кудалта.
21 Кунам Господь тӱням мут кучыкташ кынелеш,
Тудын деч лӱдын, айдеме курык шелшыш куржеш,
кӱдыратле куатше деч курыкпомышыш шылеш.
22 Чарныза айдемылан инанымым,
тудын илыш шӱлышыжӧ – неррожыштыжо гына,
тудо иктаж-мом шога мо?
*а 2:9 Ӱлыкшемаш – унизиться.
*б 2:20 Удыр – крот.
Глава 2