Выбрать язык
Книги Ветхого Завета
Книги Нового Завета
с русским текстом1 Исаийлан, Амос эргылан, кончымаш лийын. Теве мом тудо Иуда мландын Озий, Иофам, Ахаз да Езекий кугыжаже-влак вуйлатыме годым Иуда ден Иерусалим шотышто ужын.*а
2 Колышт, кава! Тӱткын колышт, мланде!
Тыге Господь ойла:
«Мый эрге-влакым ончен куштенам,
а нуно Мыйын ваштареш шогалыныт.
3 Пала ӱшкыж шке озажым,
осёл – озажын шерчажым,
а Израиль [Мыйым] ок пале,
ок умыло Мыйын калыкем».
4 О, сулыкан калык, язык дене пызырналтше калык,
осал тукым, пужлышо эрге-влак!
Нуно Господьым коденыт,
Израильын Святойжым шотлымым чарненыт,
Тудын дек тупынь савырненыт.
5 Молан тыланда шкендам эше кырыкташ?
Молан ӱскыртланымыдам огыда чарне?
Вуйда сусыр дене леведалтын,
шӱм-чонда орлана.
6 Йолвундаш гыч вуйлеп марте
таза верда кодын огыл,
чыла вере – лач какарге, нузылго, почылтшо сусыр.
Нуно мушмо, пидме огытыл,
ӱй денат йыгыме огытыл.
7 Мландыдам пустаҥдыме,
олада-влакым тул дене йӱлалтыме.
Шинчада ончылно йот еҥ-влак элдам агат,
йот калыкын йождарен*б кайымыж семын чылажат пустаҥдыме.
8 Кодын Сион ӱдыр шкетын,
виноград аҥасе, кияр пакчасе омаш семын,
йыр авырен налме ола семын.
9 Господь Саваоф мемнан кокла гыч
утлен кодшо-влакым ок кодо ыле гын,
ме Содом гай лийынна ыле,
Гоморра гайыш савырненна ыле.
10 Колыштса Господьын шомакшым, Содомын онжо-влак!
Колышт Юмынан законжым, Гоморран калыкше!
11 «Молан Мылам тендан шуко надырда? – ойла Господь. –
Йӱлалтен пуымо тага-влак деч,
ӧрдыктарыме вольыкын кояж деч шерем темын.
Ӱшкыж, тага да казатага-влакын вӱрышт Мыйым ок куандаре.
12 Те Мыйын ончыкем толыда,
но кӧ тендам тидым ышташ йодеш?
Молан те Мыйын кудывечем тошкеда?
13 Ида кондо тетла арам пӧлек-влакым.
Тӱтырымаш Мылам йырнык,
у тылзе, шуматкече, пайрем погынымаш-влакым чытен ом керт –
пайремда-шамыч осал паша дене темыныт!
14 У тылзе ден моло пайрем годым кумалмыдам ужмем ок шу:
нуно Мылам неле нумалтыш улыт,
нунын деч Мый ноенам.
15 Кунам те киддам шаралтен Мыланем кумалыда,
Мый шинчам петырем,
кеч-мыняр кумалза – тендам ом кол:
кидда вӱр дене амырген.
16 Мушкылтса, эрналтса!
Осал пашадам Мыйын шинчам деч кораҥдыза,
осалым ыштымыдам чарныза!
17 Тунемза порым ышташ, чынлыкым кычалза!
Пызырналтшылан полшыза,
тулык йочам арален налза,
тулык ватым пыдалза!
18 Толза, икте-весе коклам тӧрлена, – ойла Господь.
Сулыкда кӱреналге-йошкар лиеш гынат,
тудым лум гай ошым ыштем,
шемалге-йошкар лиеш гынат,
ош меж гай тудым ошемдем.
19 Мутем колыштшо да шуктышо лийыда гын,
мландын сай саскажым кочкыда,
20 а ода келше да ӱскыртланеда гын,
тендам керде пытара!»
Тидым Господь Шке каласен.
21 Кузе тыге ӱшанле рӱдола яжарыш савырнен?!
Вет тушто чынлык озаланен, чын ыштымаш илен,
а кызыт тушто – пуштедыше-влак.
22 Тыйын шиет савырнен куштыраш,
йошкар аракатым вӱд дене варыме.
23 Вуйлатышет-влак улыт мут колыштдымо,
шолыштшо-шамыч дене нуно келшат.
Нуно чыланат взяткым налаш йӧратат
да пӧлеклан сутланен толашат.
Арален огыт нал тулык йочам,
тулык ватын вуйшиймыже миен ок шу нунын дек.
24 Садлан Господь, Господь Саваоф,
Израильын Виян Юмыжо, тыге ойла:
«Тушманем-влаклан шыдем ончыктем,
нунылан Мый ӱчым шуктем!
25 Тыйын ӱмбакет Мый кидем нӧлталам,
конвӱд дене эрыктыме семын куштырат эрыктем,
чыла кӱртньышурым*в тый дечет ойырем.
26 Ончычсо гай чынле судья-влакым тылат шогалтем,
ой-каҥашым пуышо-шамычым ончычсо гайым ыштем.
Тунам тыйым ”Чын ыштыше ола, Ӱшанле рӱдола” манын лӱмдат».
27 Утаралтеш Сион чынлык дене,
язык деч кораҥше эргыж-влак – чын ыштымаш дене.
28 А мут колыштдымо ден сулыкан-влаклан толеш мучаш,
Господь деч кораҥше-шамыч пытарыме лийыт.
29 Тыланда чот шерге улшо онапу-влакда верч
те вожылтарыме лийыда,
шкаланда ойырен налме шнуй ото-влакда верч
намысыш пуреда.
30 Те шкежат лывыжгыше лышташан тумо гай,
вӱд укелан кӧра кошкаш тӱҥалше ото гай лийыда.
31 Виян еҥ савырна муштовыш,
пашаже – тулойыпыш:
йӱлаш тӱҥалыт пырля – нигӧ нуным ок йӧртӧ!
*а 1:1 Нине кугыжа-влак Хр. шоч. д.о. VIII курымын кокымшо пелыштыже вуйлатеныт.
*б 1:7 Йождараш – разорять, опустошать.
*в 1:25 Кӱртньышур – окалина.
Глава 1