Библия
Выбрать язык
Книги Ветхого Завета
Книги Нового Завета
с русским текстом
ЧЫЛА МУРЫЛАН МУРО
6 Глава
1 Ӱдыр дене мутланат. 4 Каче шке ӱдыржын моторлыкшым мокта. 8 Мыйын йӧратыме ӱдырем гай весе уке. 11 Пӱкшерме пакчаште.1 «Ӱдыр-влак кокла гыч эн сӧрале,
кушто тыйын йӧратыметше?
Кудо велыш тудо каен?
Ме тудым тый денет пырля кычалаш тӱҥалына».
2 «Йӧратымем каен шке садышкыже,
тамым пуышо кушкылан пакчашке –
сад лоҥгаште кошташ да лилийым погаш.
3 Мый шӱмбелемын улам, а тудо – мыйын.
Лилий коклаште тудын кӱтымӧ верже».
4 «Йӧратымем, улат тый Фирца
*а гай мотор,
Иерусалим гай сӧрале,
тисте-влакан сарзывий семын лӱдмашым лукшо.
5 Ӱмбачем шинчатым кораҥде,
тудо чонем пудырата.
6 Ӱпетше – Галаад курык гыч волышо каза кӱтӱ гай,
пӱетше – мушмо шорык кӱтӱ гай,
кажныжын йыгыр пелашыже уло,
нунын коклаште шкет кодшо уке.
7 Шӱргыначкатше – гранат саска гай,
чурий леведыш вошт тудо коеш.
8 Кудло кугыжанвате, кандашле кулвате
да шотлен пытарыдыме ӱдыр-влак улыт,
9 но тудо мыйын тыгай икте–
кӧгӧрченем, ару да яндарем.
Тудо – аважын ик шкет ӱдыржӧ,
тудым шочыктышын ойыртемалтше ӱдыржӧ.
Тудым ужын, ӱдыр-влак ”пиалан улат” маныныт,
кугыжанвате ден кулвате-влак тудым моктеныт».
10 «Кӧ тиде – эр ӱжара гай волгалтше,
тылзе гай мотор, кече гай чолгыжшо,
тисте-влакан сарзывий семын лӱдмашым лукшо?»
11 «Кайышым мый пӱкшерме пакчаш
лапверысе ужаргым ончалаш.
Нерешталтын мо виноград,
гранат пушеҥгылаште коеш мо пеледыш?
12 Мый денем мо лийын, шкежат ом пале –
шке калыкемын лӱмлӧ еҥже-влакын орваштышт мый лийым».
*б
*а 6:4 Фирца – акрет годым Израильысе тиде ола мотор улмыж дене чапланен.
*б 6:12 Еврей текстыште тыште мом возымым умылаш неле.
Глава 6
