Выбрать язык
Книги Ветхого Завета
Книги Нового Завета
с русским текстом1 Агурын, Иакей эргын, каласыме шомакше-влак. Юмын пуымо нине шомакым тудо Ифииллан, Ифиил ден Укаллан*а ойлен:
2 «Мутат уке, мый чыла еҥ деч окмакрак улам,
айдеме уш-акылем мыйын уке,
3 мунлылыклан тунемын омыл,
святой-влакын шинчымашышт мыйын уке.
4 Кӧ кӱзен кавашке да тушечын волен?
Кӧ мардежым шке урзышкыжо поген?
Кӧ вӱдым вургемышке вӱдылын?
Кӧ мландын чыла тӱржым палемден?
Кузе тудын лӱмжӧ?
Кузе тудын эргыжын лӱмжӧ?
Очыни, палет?
5 Юмын кажне шомакше яндар,
Тудлан инаныше-влаклан Тудо аралтыш.
6 Тудын шомакше дек нимом ит ешаре –
уке гын, Тудо тыйым шылтала,
да тый лектат шоячыш.
7 Кокытым мый Тый дечет йодам,
илымем годым нуным шукташ тореш ит лий:
8 кӱлдымӧ шомак ден шоям мый дечем кораҥде,
мылам нужналыкымат, поянлыкымат ит пу.
Илышаш киндем мылам пуэн шого.
9 Уке гын мый, утыжден поян лиймеке,
Тый дечет кораҥын, ”Кӧ тыгай Господь?” манын кертам,
але, нужнаҥмеке, шолышташ тӱҥалын,
Юмын лӱмжым шӱктарен кертам.
10 Оза ончылно тудын кулжо нерген осалым ит ойло,
уке гын тудо тыйым карга, да титакетлан мутым кучет.
11 Улыт тыгай-влак, кӧмыт шке ачаштым каргат
да аваштлан суапым огыт тылане.
12 Улыт тыгай-влак, кӧмыт шкештым арулан ужыт,
кеч лавырашт деч эрыктыме огытыл.
13 Улыт тыгай-влак – о, кузе нуно кугешнен ончат,
кузе нуно нерыштым кӱшкӧ нӧлтат!
14 Улыт тыгай-влак, кӧмытын пӱйышт керде гай,
оҥылашлушт кӱзӧ гай:
нуно мландымбалне йорло-шамычым пӧжгат,
еҥ-влак кокла гыч незер-влакым пытарат.
15 Сутланымашын кок ӱдыржӧ уло: ”Эше, эше!”
Теве кумыт, кудышт улыт темдыме,
эсогыл нылыт, кудышт огыт каласе: ”Сита!” –
16 вес тӱня, азам ыштен кертдыме мӱшкыр,
мланде, кудо вӱд деч нигунам огеш тем,
да тул, кудо нигунам ок каласе: ”Сита!”
17 Кӧ ача-аважым игылтеш да нуным ок колышт –
тудын шинчажым лапверысе курныж-влак чӱҥген луктыт,
арыслан иге-шамыч чӱҥген пытарат.
18 Кумыт мылам умылаш лийдыме,
нылыт, кудыштым ом керт умылен:
19 арысланын корныжо каваште,
кишкын корныжо кӱ коклаште,
корабльын корныжо теҥыз покшелне
да пӧръеҥын корныжо ӱдыр деке.
20 А яжарланыше ватын корныжо тыгай:
кочкеш, умшажым ӱштылеш да каласа:
”Мый нимо удам ыштен омыл”.
21 Кумыт деч мланде чытырналтеш,
нылытым тудо ок керт чытен:
22 кулым, кунам тудо кугыжа лиеш,
ушдымым, кунам тудо теммеш кочкеш,
23 ужмышудымо ӱдырамашым, кунам тудо марлан лектеш,
да тарзе ӱдырамашым, кунам тудо озаватыжын вержым налеш.
24 Теве нылытын мландымбалне изи улыт,
но улыт мунло деч мунлырак:
25 кутко-влак – виян урлык огытыл,
а кочкыш шапашым кеҥежымак ямдылат,
26 даман-влак – куньырий урлык улыт,
а пыжашым кӱ курыкеш ыштат,
27 шурнышырчык-влак – нунын кугыжашт уке,
но лектыт рат дене,
28 шыҥшале-влак – кучаш лиеш нуным кид дене,
но кугыжан полатыште нуно лиедат.
29 Теве кумыньыштын ошкылышт яшката,
нылытын коштыт чаткатан:
30 лев – янлык-влак кокла гыч эн патыр,
нигӧн ончылно тудо ок кораҥ,
31 агытан, вуйым кӱш нӧлталын коштшо,
казатага, [кӱтӱм вӱден наҥгайыше,]
да кугыжа шке сарзыж-влак коклаште.
32 Окмак улмет дене тый шкендым кӱш шынденат
да осалым шонен пыштенат гын,
умшатым кидет дене петыре,
33 вет ӱмбалым пудыратыме деч ӱй лиеш,
нерым перыме деч вӱр йога,
а шыдым тарватыме деч келшыдымаш шочеш».
*а 30:1 «Ифииллан, Ифиил ден Укаллан»: нине шомакым тыгеат кусараш лиеш: «Мый ноенам, Юмем. Мый ноенам, Юмем. Кузе мылам сеҥен лекташ?»
Глава 30