Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
29 Глава
1 Кӧ шуко гана шылталыме деч варат ӱскыртлана,
вучыдымын пытарыме лиеш,
паремдымашым тудо ок уж.
2 Кунам чын ыштыше-влак вийым налыт – калык куана,
а кунам осал еҥ озалана – калык кечкыжеш.
3 Кӧ мунлылыкым йӧрата – шке ачажым куандара,
а кӧ яжар ӱдырамаш-влак дене коштеш – уло погыжым пытара.
4 Чынлык дене кугыжа элым пеҥгыдемда,
а взяткым йӧратыше тудым шалата.
5 Кӧ шке лишылже ончылно ӱедылеш,
тудын йолжылан оптышым шында.
6 Осал еҥын сулыкшо шкаланжак оптыш лиеш,
а чын ыштыше куанен мура.
7 Чын ыштыше еҥ судышто йорлын пашажым тӱткын шымла,
а осал айдеме ончашат ок тӱҥал.
8 Вуянче-влак олаште пудыранчыкым нӧлталыт,
а мунло-влак шыдым луштарат.
9 Кунам ушдымо еҥ мунло дене судитлалтеш,
тудо я сыра, я воштылеш, нигузе ок лыплане.
10 Титакдыме еҥым вӱр йоктарыше-влакын ужмышт ок шу,
а чын ыштыше-влак тудын дене йолташ лийнешт.
*а11 Ушдымо еҥ уло шыдыжым луктын ончыкта,
а мунло шке шыдыжым кучен мошта.
12 Вуйлатыше шоякым колыштеш гын,
тудын полатыштыже чыланат осал лийыт.
13 Йорло ден шыгыремдылше теве мо дене икгай улыт:
когыньыштынат шинчаштлан волгыдым Господь пуэн.
14 Кугыжа йорло-влакым чын судитла гын,
тудын престолжо курымеш шога.
15 Розго ден шылталымаш ушым пуртат,
а туныктыде кушшо эрге аважым намысыш пурта.
16 Осал еҥ-влак шукемыт – сулык шукемеш,
но чын ыштыше-влак нунын пытымыштым ужыт.
17 Наказатле шке эргычым – ласкан илаш тӱҥалат,
чонетлан тудо куаным конда.
18 Кавасе кончымаш деч посна калык лиеш кучен кертдыме;
но законым шуктен шогышо-влак лийыт пиалан.
19 Кулым мут дене гына туныкташ огеш лий:
ойлымым умыла гынат, садак ок колышт.
20 Ужынат мо тый шоналтыде ойлышо айдемым?
Тудын дене таҥастарымаште, ушдымо еҥлан ӱшан кугурак.
21 Кулым изинекак нечкын ончен куштет гын,
варажым тудо тылат ойгым конда.
*б22 Вашке шыдешкыше еҥ вурседылмашым ылыжта,
чыдыртан
*в айдеме шуко сулыкым ышта.
23 Кугешнымаш айдемым ӱлыкӧ шында,
а ӱҥышӧ чонан чапыште лиеш.
24 Кӧ ворлан йолташ, тудо шкаланже тушман:
каргымым колеш, но нимом ок ойло.
25 Айдеме деч лӱдмаш – тиде оптыш,
а Господьлан инаныше еҥлан нимогай лӱдыкшӧ уке.
26 Шукышт вуйлатышын поро кумылжым кычалыт,
но айдемылан чын суд – Господь деч.
27 Чын ыштыше еҥлан осал айдеме йырнык,
а осал еҥлан – чын ыштыше айдеме.
*а 29:10 «Тудын дене йолташ лийнешт»: тидым «тудым арален налнешт» манынат кусараш лиеш.
*б 29:21 «Тылат ойгым конда»: тидым «эрге лияш шонен пышта» манынат кусараш лиеш.
*в 29:22 Чыдыртан – вспыльчивый.
Глава 29
