Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
26 Глава
1 Кеҥежлан лум, уржа-сорлалан йӱр,
а ушдымылан чап келшен огыт тол.
2 Кузе пӧрткайык але вараксим чоҥештен каят,
тыгак сулен налдыме каргымаш эртен кая.
3 Сола – имньылан, шӧрмыч – осёллан,
а розго – ушдымын тупшылан.
4 Ушдымылан тудын ушдымылыкшо почеш ит вашеште,
уке гын тыят тудын гай лият.
5 Ушдымылан тудын ушдымылыкшо почеш вашеште,
уке гын тудо шкенжым мунлылан шотлаш тӱҥалеш.
6 Кӧ ушдымо еҥ дене уверым колта – туткарыш логалеш,
пуйто шке йолжым пӱчкын шуа.
7 Ушдымо еҥын ушан ойым пелешташ тӧчымыжӧ –
окшак еҥын окшаклен кайымыж дене иктак.
8 Ушдымылан чапым пуымаш –
рогаткыш кӱм кылдыме дене иктак.
9 Ушдымо еҥын ушан ойым пелешташ тӧчымыжӧ –
йӱшын кидыштыже улшо иман вондо дене иктак.
10 Ушдымым але перныл коштшым пашаш налше еҥ –
куш логалын, тушко лӱйкалыше пикшызе дене иктак.
*а11 Кузе пий шке укшинчышыж дек пӧртылеш,
тыгак ушдымо еҥ шке ушдымо пашажым угыч ышта.
12 Ужынат мо шкенжым мунлылан шотлышо айдемым?
Тудын дене таҥастарымаште, ушдымо еҥлан ӱшан кугурак.
13 Йолагай ойла: «Уремыште лев!
Уремыште лев коштеш!»
14 Топсаште
*б омса тышке-тушко коштеш,
а йолагай шке вакшыштыже почаҥеш.
15 Йолагай шке кидшым кӱмыжыш чыка,
а умша дек намиен шукташ тудлан неле.
16 Шотан вашмутым пуышо шым еҥ деч
йолагай шкенжым ушанраклан шотла.
17 Эртен кайышыла, еҥ вурседылмашыш шӱшкылтмаш
осал пийым пылышыж гыч руалтен кучымо дене иктак.
18-19 Кӧ вес еҥым ондала,
а вара «мыскарам веле ыштышым» манеш,
уш пудыраныше еҥ дене иктак,
кудыжо йӱлышӧ пикшым колтылеш да колымашым ӱда.
20 Пу пыта – тул йӧра,
манеш-манешым колтышо уке – вурседылмаш пыта.
21 Тулшол деч шокшо, пу деч тул лектеш,
а вурседылше еҥ келшыдымашым ылыжта.
22 Манеш-манешым шаркалышын мутшо – пуйто томсык,
мӱшкыр кӧргыш тудо куштылгын пура.
23 Осал шӱм-чонан еҥын йымыжан кутырымыжо
шун кӧршӧкым комыжлымо ший дене иктак.
24 Чоян ӱедылеш умшаж дене тушман,
а шӱмыштыжӧ шона осалым.
25 Кеч ныжылге йӱк дене ойла, тудлан ит ӱшане:
шым йырнык уло тудын шӱмыштыжӧ.
26 Чоян шылта гынат ужмышудымашым,
калык ончылно осаллыкше садак почылтеш.
27 Кӧ вынемым кӱнча – тушко шкеак камвозеш,
кӧ кугу кӱм пӧрдыкта – тудын йымаке шке логалеш.
28 Шояк йылман еҥ кӧм сусыртен, нуным ужмыжо ок шу,
а ӱедыл ойлышо айдеме ойгым конда.
*а 26:10 Еврей текстыште тыште мом возымым умылаш неле.
*б 26:14 Топса – петля.
Глава 26
