Выбрать язык
Книги Ветхого Завета
Книги Нового Завета
с русским текстом1 Теве эше Соломонын туныктен каласыме ойжо-влак, нуным Иуда кугыжа Езекийын еҥже-влак погеныт.
2 Юмын чапше – айдеме шинча деч пашам шылташ,
кугыжан чапше – тидым шымлаш.
3 Каван кӱкшытшӧ да мландын келгытше семын
кугыжан шӱмжат шымлаш лийдыме.
4 Ший деч шлакым ойырет гын,
мастар кидыште ате шочеш;
5 кугыжа деч осал еҥым кораҥдет гын,
чын ыштыме дене престолжо пеҥгыдын шогаш тӱҥалеш.
6 Кугыжа ончылно шкендым кугу еҥ семын ит кучо
да тӧра-влак коклаште верым налаш ит тырше:
7 лӱмлӧ еҥ-влак ончылно тыйым ӱлык шындымешке,
тек лучо тылат «тышке лишем» манын каласат.
Мом шке шинчат дене ужынат,
8 судыш лукташ ит вашке –
тушто тыйым вес еҥ вожылмашке пурта гын,
мом тый ышташ тӱҥалат?
9 Вес еҥ дене судитлалтат гын,
еҥын тайныжым ит поч:
10 уке гын тидын нерген колшо еҥ тыйым шылтала,
тунам намыс тый дечет огеш кораҥ.
[Эрыкым кондат йӧратымаш ден келшымаш:
мыскылалташ огыл манын, кучо нуным пеленет,
тек коштмо корнет тынысле лиеш.]
11 Шке жапыште каласыме шомак –
ший теркесе шӧртньӧ олма дене иктак.
12 Тӱткӧ пылышлан мунло шылталымаш
шӧртньӧ кӧрж, яндар шӧртньӧ гыч ыштыме сӧрастарыш гай улеш.
13 Ӱшанле уверзе шке озажлан
уржа-сорла жап годым лумын йӱштыж дене иктак:
тудо шке озажлан вийым пуа.
14 Пыл да мардеж, но йӱр уке –
тыгаяк тудо еҥ, кӧ пуыдымо пӧлекше дене моктана.
15 Чытен моштымо дене савыраш лиеш вуйлатышым,
тыматле шомак торешланымым сеҥа.
16 Мӱйым муынат – коч мыняр кӱлешым,
утыжым кочкат гын, укшинчаш тӱҥалат.
17 Ит кошт йолташын пӧртышкыжӧ чӱчкыдын,
уке гын тудо тый дечет ноя, да тудлан ужмышудымо лият.
18 Лишылъеҥже ваштареш шояклен таныклыше еҥ –
шугыньо, керде да пӱсӧ пикш дене иктак.
19 Туткар кечын шояк еҥлан ӱшанаш –
пудыргышо пӱй але окшак йол дене иктак.
20 Ойган шӱманлан мурым мураш –
йӱштӧ кечын вургемым кудашме
але сусыр верыш уксусым йоктарыме дене иктак.
1 [Вургемлан эҥгекым когарш, пушеҥгылан – шукш,
а айдемын шӱмжылан ойго кондат.]
21 Тушманет шужышо гын‚ тудым пукшо‚
йӱмыжӧ шуэш гын‚ йӱктӧ:
22 тыге ыштен‚ тый тудын вуйжылан йӱлышӧ тулшолым погет,
а тылат Господь пашат почеш пӧртылта.
23 Йӱдвел мардеж конда йӱрым,
а шалаумшан йылмыже – сырыше чурийым.
24 Вурседылше вате дене кугу пӧртыштӧ илымеш,
лучо пӧрт леведыш лукышто илаш.
25 Мӱндыр кундем гыч поро увер –
сусынышо еҥлан йӱштӧ вӱд дене иктак.
26 Осал еҥлан вуйым пуышо чынле айдеме –
румбыкан вӱдшинча да шалатыме памаш дене иктак.
27 Кузе мӱйым утыждене кочкаш сай огыл,
тугак сай огыл эре чапым кычалаш.
28 Шкенжым кучен моштыдымо еҥ –
пырдыж деч посна кодшо, шалатыме ола дене иктак.
Глава 25