Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
27 Глава
1 Эрласе кече дене ит моктане,
вет тудо мом конда – тый от пале.
2 Тек тыйым шке умшат огыл, а вес еҥ мокта –
тыйын огыл, а весын йылмыже.
3 Кӱ неле, ошмат куштылго огыл,
а ушдымо еҥын чоным туржмыжо эшеат нелырак.
4 Шыде – шучко, ажгынлык – кучен кертдыме,
но ушкалымаш ваштареш кӧ шоген кертеш?
5 Чон почын шылталымаш
шолып йӧратымаш деч сайрак.
6 Йолташын шылталымыже – чынле,
тушманын шупшалмыже – шоя.
7 Темше мӱшкыр караш мӱйымат тошкен коштеш,
а шужышо мӱшкырлан кочыжат шерыла чучеш.
8 Шке мландыжым коден кайыше еҥ
шке пыжашыжым кодышо кайык дене иктак.
9 Кузе олив ӱй ден тамлыпушан наста
*а шӱм-чоным куандарат,
тугак йолташын шӱм гыч лекше каҥашыже чонлан келша.
10 Ит кодо шке йолташетым, ачатын йолташыжымат.
Ойгыш логалмекет, изатын пӧртышкыжӧ ит кай:
лишне улшо пошкудет умбалне илыше изат деч сайрак.
11 Эргым, мунло лий да шӱмем куандаре –
тунам палем, мом мыйым вурсышылан вашешташ.
12 Ушан еҥ лӱдыкшым ужеш да шылеш,
а ужарвуй-влак ончыко каят да туткарыш логалыт.
13 Кӧ палыдыме еҥын парымже верч мутым кучаш сӧрен,
тудын деч вургемжым нал,
йот еҥ верчат тудын деч залогым нал.
14 Кӧ эрден эр шке пошкудыжлан суапым кугу йӱкын тылана,
тудым каргыше еҥлан шотлат.
15 Ӱчашаш йӧратыше вате
йӱран кечын чыпчен шинчыше вӱд гай:
16 тудым чараш тӧчымаш –
мардежым чарыме але олив ӱйым урзышто кучымо дене иктак.
17 Кӱртньӧ кӱртньым шума,
айдеме – айдемым.
18 Кӧ смоква пушеҥгым ончен кушта – саскажым кочкеш,
кӧ шке озаже верч тырша – чапыште лиеш.
19 Кузе вӱд ӱмбалне айдемын чурийже коеш,
тугак ик еҥын шӱмжӧ гоч весыным пуйто воштончышышто ужаш лиеш.
20 Темдыме улыт вес тӱня ден колымаш,
айдемын шинчажат тыгаяк темдыме.
[Кугешнен ончымаш – Господь шинча ончылно йырнык,
а кужу йылман-влак ушдымо улыт.]
21 Левыктыме вер – шийлан, коҥга – шӧртньылан,
а айдемым моктеммут терга.
[Сулыкан еҥын шӱмжӧ кычалеш осалым,
а чынле шӱм – шинчымашым.]
22 Ушдымо еҥым пырче дене пырля
кеч шуарвондо дене шуареш шуро –
ушдымылыкшо тудын деч садак ок ойырло.
23 Кузе вольыкет илыштеш – эскерен шого,
шорык кӱтӱ-влакетым сайын ончо,
24 вет нимогай поянлык курымашле огыл,
да кучемвий тукым гыч тукымыш ок шуйно.
25 Кунам, шудым поген налмеке, кайшудо лектеш
да курык тайылыштат шудым погымо,
26 тунам пача меж гыч шкаланет вургемым ыштет,
каза-влакым ужален, пасум налат.
27 Шкендым, ешетым да тарзе ӱдырамаш-влакетым пукшаш
каза шӧрет ситышын лиеш.
*а 27:9 Тамлыпушан наста – благовонное вещество.
Глава 27
