Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
23 Глава
Мунло-влакын кумло ойышт (умбакыже).1 Кунам вуйлатыше дене кочкаш шинчат,
мо
*а тыйын ончылнет – шеклане:
2 кочкышлан сут улат гын,
логарышкет чаракым шынде.
3 Тудын тамле сийжылан ит сутлане,
тиде – ондалчык кочкыш.
4 Пояш тӧчымӧ дене шкендым ит улныктаре,
тыгай шонымашым кодо.
5 Ончалат веле поянлык ӱмбаке – тудо укеат:
шкаланже шулдырым кушта
да арыслан семын кавашке чоҥешта.
6 Ит коч чаҥга еҥын кочкышыжым,
тамле сийжылан ит сутлане,
7 вет тыгай еҥ шке пайдаже нерген веле шона.
Каласа тылат: «Коч, йӱ»,
а ушыштыжо – йӧршеш весе.
8 Кочмо катышетым тый укшич шуэт,
каласыме сай шомакет ярашке лектеш.
9 Нимом ит ойло ушдымо еҥлан –
ушан шомакетым тудо кӱлдымыш луктеш.
10 Ожнак ыштыме межам ит кусаре,
тулык-влакын пасуштым шкаланет ит нал,
11 вет нуным Аралыше виян,
тый денет судитлалтмышт годым Тудо нуным пыдал налеш.
12 Шӱметым туныктымаш дек савыре,
ушан шомаклан пылышетым поч.
13 Йочам мут кучыктыде ит кодо:
розго дене кырет гын, колымаш деч утарет.
14 Кырен налат тудым розго дене
да вес тӱня деч арален кодет.
15 Эргым, шӱмет мунло лиеш гын,
мыйынат шӱмем куана,
16 умшат чыным кутыра гын,
уло кӧргем йывырта.
17 Тек сулыкан-влаклан шӱмет ок кӧране,
тек тудо Господь дечын эре лӱдеш,
18 вет уло тыйын ончыкылык,
арам ок лий инанен илымет.
19 Колышт, эргым, да лий мунло,
шке шӱметым чын корныш виктаре.
20 Ит лий йӱын руштшо-влак коклаште,
шылым утыждене кочшо-влак дене ит шинчылт,
21 вет йӱын коштшо ден сут логар-влак нужнаҥыт,
нерен шинчымышт нунылан сырве-сорво вургемым чикта.
22 Колышт ачатым – тудо тыйым шочыктен,
кӱлдымыш ит лук аватым, кунам тудо шоҥгемеш.
23 Кычал му чыным да мунлылыкым ит йомдаре,
ит кораҥ туныктымаш деч, уш-акылым пого.
24 Чын ыштыше эргын ачаже куана,
мунло эргым шочыктышо йывырта.
25 Тек куанат ачат ден ават,
тыйым шочыктышо йывырта!
26 Эргым, мый декем шӱметым савыре,
мыйын корнем дек шинчатым виктаре.
27 Яжар ӱдырамаш – тиде келге вынем,
вес еҥын ватыже – шыгыр таве,
28 агаш лекше семын тудо ваҥен шога
да ватыштым ондалыше пӧръеҥ чотым шукемда.
29 Кӧ варгыжеш? Кӧ кечкыжеш?
Кӧн шургымаш? Кӧ вуйым шиеш?
Кӧн чурийже какаргыше? Кӧн шинчаже йошкаргыше?
30 Нунын, кӧмыт арака воктене кужун шинчат,
кӧмыт тамлештарыме йошкар аракам кычал коштыт.
31 Ит ончо аракам, могай тудо йошкарге,
кузе тудо коркаште йолгыжеш да куштылгын йӱалтеш –
32 варажым тудо пурлеш кишке семын,
шемгишке семын чӱҥгалеш.
33 Ужаш тӱҥалеш шинчатше ыҥлаш лийдымым,
шотдымо шонымаш-влак шӱметым авалтат –
34 пуйто теҥыз покшелне киет,
мачте вуйышто малет.
35 [Каласет тый:] «Мыйым кыреныт – корштен огыл,
мыйым лупшеныт – нимат шижын омыл.
Кунам помыжалтам, адак йӱаш кычал каем».
*а 23:1 «Мо» – еврей мутым «кӧ» манынат кусараш лиеш.
Глава 23
