Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
20 Глава
1 Йошкар арака конда мыскылымашым, пӱрӧ – ажгынымашым,
кӧ нунылан вуйжым пуэн, тудо ушан огыл.
2 Кугыжан кугу шыдыже – левын ырлымыж дене иктак:
кӧ тудым сырыкта – илышыжлан лӱдыкшым конда.
3 Чап тудлан, кӧ вурседылмаш деч шкенжым куча,
а ушдымо еҥ туманлаш йӧрата.
4 Ок курал йолагай шке жапыштыже:
уржа-сорла годым кычалаш лектеш, но нимом ок му.
5 Айдемын шонен пыштымыже – келге вӱд,
но ушан еҥ тудым коштал налын кертеш.
6 Шукын кычкырат ӱшанле улмышт нерген,
но чынжымак ӱшанле айдемым кӧ муэш?
7 Чын ыштыше еҥ титакыш пурыде ила,
пиалан улыт йочаже-влак тудын деч вара!
8 Кунам кугыжа судитлаш шинчеш,
ончалмыж дене чыла осалым шеклана.
9 Кӧ каласен кертеш:
«Шӱмем эрныктенам, сулыкем деч ару улам»?
10 Чын огыл кир, ондалыше виса –
чыла тиде Господьлан йырнык.
11 Рвезым пашаж дене палаш лиеш:
сай мо, чын мо тудын койыш-шоктышыжо.
12 Колшо пылыш да ужшо шинча –
тидыжымат, тудыжымат Господь ыштен.
13 Ит йӧрате малаш – тунам от лий нужна,
кынел эрден эрак – тунам теммеш кочкат.
14 «Уда, уда сату!» – ойла сатум налше,
а кораҥмекше, моктана.
15 Шӧртньӧ уло, шергакан кӱ шуко,
но ушан шомак – эн шергакан.
16 Кӧ палыдыме еҥын парымже верч мутым кучаш сӧрен –
тудын деч вургемжым нал,
йот еҥ верчат тудын деч залогым нал.
17 Ондален налме кинде тамле,
но тудын деч вара умша ошма дене темеш.
18 Каҥашымеке, ышташ шонымо паша вийым налеш,
сар дене кайымет годым шотыш нал каҥашым.
19 Кӧ манеш-манешым шаркала – вес еҥын шолып пашажым почеш,
тыгай шалаумша деч тый кораҥын кошт.
20 Кӧ шке ачажым але аважым шӱктарен ойла,
тудын лампыже йӱд пычкемыште йӧра.
21 Жап деч ончыч да вашке налме югыпого
варажым суапландарымашым ок кондо.
22 Ит ойло: «Осалым ыштымылан ӱчым шуктем!»
Пу тиде пашам Господьлан – Тудо тыйым арален налеш.
23 Йырнык улыт Господьлан чын огыл кир-влак,
ондалыше виса-влакат Тудлан йырынчык улыт.
24 Айдемын ошкылжым Господь виктарен шога,
шке корныжым айдеме кузе умылен кертеш?
25 Айдемылан оптыш – Господьлан сӧрымашым шоныде пуаш
да вара гына сайын шоналташ.
26 Мунло кугыжа осал еҥ-влакым арва семын пуалта
да шийме орва дене ӱмбачышт кудал эрта.
27 Айдемын шӱлышыжӧ – Господьын лампыже,
тудо шӱмын кӧргӧ луклажым терга.
28 Порылык ден чынлык кугыжам аралат,
порылыклан кӧра тудын престолжо пеҥгыдын шога.
29 Рвезын чапше – тудын вийже,
а шоҥгыеҥым чал ӱп сӧрастара.
30 Перен сусыртымаш осал деч эрныкта,
да кырымаш айдеме шӱмым тӧрлата.
Глава 20
