Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
19 Глава
1 [Поян], шояк йылман да эшежым ушдымо еҥ деч
йорло да титакыш пурыде илыше айдеме сайрак.
2 Айдемылан шинчымаш деч посна сай огыл,
да вашкыше еҥын йолжо шӱртня.
3 Ушдымылык айдемын илыш корныжым локтылеш,
а тудо, шыдешкен, Господьлан йолам ышта.
4 Шуко йолташым конда поянлык,
а нужнам йолташыжат коден кая.
5 Шояк таныклыше еҥ мут кучыде ок код,
шоям ойлышо ок утло.
6 Лӱмлӧ еҥ-влак ончылно шукын ӱедылыт,
пӧлекым ыштыше айдемылан кажныже йолташ.
7 Йорло еҥ шке иза-шольыжлан ужмышудымо,
кораҥыт тудын деч йолташыже-влакат –
арам тӧча тудо нунын дене кутыраш.
8 Кӧ ушым пога – шке илышыжым акла,
кӧ уш-акылым арала – муэш суапым.
9 Шояк таныклыше еҥ мут кучыде ок код,
да кӧ шоям ойла, тудым пытымаш вуча.
10 Келшен ок тол ушдымылан улан илыш,
куллан – тӧра-влакым вуйлаташ.
11 Уш-акыл айдемым шыде деч куча,
тудын чапше – ӧпкелалтде илымаш.
12 Кугыжан шыдыже – левын ырлымыж дене иктак,
а поро кумылжо – шудыш вочшо лупс гай.
13 Ушдымо эрге – ачажлан ойго,
ӱчашаш йӧратыше вате – пуйто чыпчен шичыше вӱд.
14 Пӧрт ден пого – ача-ава деч,
а ушан вате – Господь деч.
15 Йогылык конда келге омым,
йолагай шужен кошташ тӱҥалеш.
16 Кӱштымашым шуктен шогышо шке чонжым арала,
а кӧ коштмо корныжым ок эскере – пыта.
17 Кӧ йорлылан полша – Господьлан арымеш пуа,
да Господь тудлан пӱтынек пӧртылта.
18 Наказатле шке эргычым, кунам эше уло ӱшан,
ит пу тудын чонжылан пыташ.
19 Вашке шыдешкыше еҥ наказатлыме лийшаш,
налат гын чаманен, логалеш вара чотрак наказатлаш.
20 Колышт каҥашым, шотыш нал шылталымым –
ончыкшым лият мунлырак.
21 Айдемын шӱмыштыжӧ шуко шонымаш,
но мо Господь дечын – лач тиде шукталтеш.
22 Айдемын ӱшанле улмыжо кугун аклалтеш,
да йорло айдеме шояче деч сайрак.
23 Господь деч лӱдмаш илышым конда:
ласкан малет, осал тый декет ок лишем.
24 Йолагай шке кидшым кӱмыжыш чыка,
но умшаж дек кондаш ӧркана.
25 Мыскылыше еҥым наказатлет – ужарвуй-влак ушым шындат,
ушаным шылталет – каласыметым тудо ушышкыжо пышта.
26 Ачажым кырыше да аважым поктен лукшо эрге –
намысдыме да лӱмнержым шӱктарыше.
27 Эргым, чарнет гын туныктымым колышташ,
ушан шомак дечын посна йомат.
28 Йӧрдымӧ таныклыше судым шӱктара,
осал еҥын умшаже осал мутшо дене темеш.
29 Намысдыме айдемым суд вуча,
а ушдымын тупшым – кырымаш.
Глава 19
