Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
14 Глава
1 Мунло вате шке суртшым ворандара,
а ушдымо – шке кидше дене шалата.
2 Кӧ тура корно дене коштеш – Господь деч лӱдеш,
а кӧн корныжо кадыр – Тудым ок шотло.
3 Ушдымо еҥын ойлымыжо – тупшылан тоя,
а мунло еҥын шомакше лиеш тудлан аралтыш.
4 Ӱшкыж-влак уке улыт гын, шерча яра шога,
а кушто виян ӱшкыж, тушто сай шурнылектыш.
5 Ӱшанле таныклыше ок ондале,
а шояк таныклыше шуко шоям ойлыштеш.
6 Намысдыме еҥ мунлылыкым кычалеш гынат, ок му,
а ушан еҥлан шинчымаш куштылгын пуалтеш.
7 Кораҥ кай ушдымо еҥ дечын,
вет тудын шомакше деч от нал шинчымашым.
8 Ушан еҥын мунлылыкшо – шке илыш-корныжым умылаш,
а ушдымо еҥын окмак улмыжо тудым ондала.
9 Ушдымо-влакым сулыкышт воштылтара,
а чын ыштыше-влак поро кумылым сулен налыт.
10 Шӱмет гына пала ойгетым,
куанымат от керт весе дене пайлен.
11 Осал еҥ-влакын пӧртышт шалана,
а чын ыштыше-влакын илемышт тӱзлана.
12 Айдеме шке корныжым чынлан шотла,
но мучаште тудыжо колымашке шукта.
13 Воштылмо годымат южгунам шӱм коршта,
куан деч варат ойго толеш.
14 Чын корно гыч кораҥше еҥлан пашаж почеш пӧртылтымӧ лиеш,
тыгак сай айдемат шке пашаж дене келшышын налеш.
15 Ужарвуй кажне шомаклан ӱшана,
а ушан шке корныжым тӱткын эскера.
16 Мунло еҥ осалым ыштыме деч шекланен да кораҥын коштеш,
а ушдымо шкаланже инана, шкенжым кучен ок мошто.
17 Кӧ вашке шыдешка – орадым ыштылеш,
кӧ осал чоя пашам ыштылеш – ужмышудымо лиеш.
18 Шонен моштыдымо-влакын пайышт – ушдымылык,
а ушан-шамычын вуйшӱдышышт шинчымаш лиеш.
19 Осал еҥ-влак вуйыштым поро-влак ончылно сават,
сулыкан-влак – чын ыштыше-шамычын капкашт ончылно.
20 Йорлым эсогыл пошкудыжо-влак огыт йӧрате,
а поян еҥын йолташыже шуко.
21 Кӧ лишылъеҥжым ок шотло – сулыкым ышта,
а кӧ йорло-влак деке поро, тудо пиалан.
22 Осалым ышташ шонышо-влак чын корно гыч кораҥын огытыл мо?
[Осалым ыштыше-шамыч поро да ӱшанле лиймым огыт пале,]
поро да ӱшанле лиймаш – сайым шонышо-влак дене.
23 Кеч-могай тыршымаш пайдам конда,
а яра шомакым ойлыштмаш – лач нужналыкым.
24 Мунло-влакын вуйшӱдышышт – поянлык,
а ушдымо-шамычын – ушдымылык.
25 Ӱшанле таныклыше илышым утара,
а шояк таныклыше шуко шоям ойлыштеш.
26 Господь деч лӱдмаш – айдемылан ӱшанле аралтыш,
тудлан да эргыж-влаклан куржын утлымо вер.
27 Господь деч лӱдмаш – илыш памаш,
колымаш вапш деч тудо арален кода.
28 Калыкше шуко улмо годым кугыжа чапыште,
а калык деч посна вуйлатыше пыта.
29 Кӧ вашке ок шыдешке, тудын ушыжо шуко,
а вашке сырыше шке ушдымылыкшым ончыкта.
30 Тыматле шӱм-чон – капкыллан тазалык,
а кӧранымаш – лулегыште погынышо шӱйшӧ дене иктак.
31 Кӧ йорло еҥым шыгыремда – тудын Ыштышыжым мыскыла,
а кӧ Юмым шотла – йорло еҥлан порым ышта.
32 Осал еҥ-влакым осал пашашт пытара,
а чын ыштышын колымыж годымат аралтышыже уло.
33 Ушан еҥын шӱмыштыжӧ мунлылык ила,
ушдымо-влак коклаштат тудо шкенжым палдара.
34 Чын ыштымаш калыкын чапшым нӧлта,
а сулык тудым намысыш пурта.
35 Ушан тарзе дек кугыжа поро кумылан,
а кӧн пашаже намысле – тыгай еҥ ӱмбак шыдыже лектеш.
Глава 14
