Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
13 Глава
1 Ушан эрге ачажын каҥашыжым колыштеш,
а вуянче эрге шылталымым шотыш ок нал.
2 Поро шомакше дене айдеме шуко сайлыкым налеш,
а ондален илыше еҥын чонжо весым темдаш ӱжеш.
3 Кӧ шке йылмыжым куча – чонжым арала,
а кӧ умшажым ок петыре – шкенжым кошарта.
4 Йолагай пеш вуча, но арам,
а тыршыше еҥын шонымыжо шукталтеш.
5 Чын ыштыше еҥ чытен ок керт шоякым,
а осалым ыштыше лӱмнержым шӱктара, намысыш пура.
6 Чын корно дене коштшым чынлык арала,
а осал еҥым сулык пытара.
7 Икте поянла кояш тӧча, а тудын ниможат уке,
весын поянлыкше шуко гынат, шкенжым нужналан шотла.
8 Поянлыкше дене айдеме шке чонжым сулен налын кертеш,
а йорло еҥым нигӧ ок лӱдыктӧ.
9 Чын ыштыше-влакын тулышт куанлын йӱла,
а осал-шамычын лампышт йӧра.
[Осал чоя-влак шке сулыкыштышт йомын коштыт,
а чын ыштыше-влак поро, чаманыше улыт.]
10 Шкем кӱшкӧ шындымаш ӱчашымашым шочыкта,
а каҥашым колыштшо еҥ – мунло.
11 Вашке погымо поянлык йомеш,
а изин-изин погымо – шукемеш.
12 Шукталтдыме ӱшан туржеш шӱм-чоным,
а шукталтше шонымаш – пуйто илыш пушеҥге.
13 Кӧ туныктымым кӱлдымыш луктеш – ышта шкаланже зияным,
а кӧ кӱштымашым пагала – налеш суапым.
14 [Осал чоя еҥым нимо сай ок вучо,
а ушан тарзын пашаже воранен толеш,
коштмо корныжат тура.]
15 Мунло еҥын туныктымыжо – илыш памаш,
колымаш вапш деч тудо арален кода.
16 Шонен моштышо уш-акыл поро кумылым сула,
а осал чоя-влакын корнышт колымашыш наҥгая.
17 Ушан еҥ чылажымат шот дене ышта,
а ушдымо айдеме окмак улмыжым ончыкта.
18 Уда уверзе деч туткарым вучо,
а ӱшанле уверзе – паремдыше эм гай.
19 Кӧ кӱлдымыш луктеш каҥашым,
тудым йорлылык ден вожылмаш вучат,
а кӧ шылталымым колыштеш – чапыште лиеш.
20 Шукталтше шонымаш чонлан куаным конда,
а ушдымо еҥлан осал деч кораҥаш шучко.
21 Мунло-влак дене пырля коштат – шкежат мунло лият,
ушдымо-влак дене келшет – азапыш логалат.
22 Сулыкан еҥ почеш туткар коштеш,
а чын ыштыше суапым налеш.
23 Поро еҥын поянлыкше уныкажланат кодеш,
а сулыкан еҥын поянлыкше чын ыштышылан аралалтеш.
24 Йорлын пасуштыжат шурно шуко лийын кертеш,
но элыште чындымылык озалана гын, лектыш весылан лиеш.
25 Кӧ кидышкыже розгым налын огыл,
тудо шке эргыжым ок йӧрате,
а кӧ йӧрата – изинекак тудлан ушым пурта.
26 Чын ыштыше теммеш кочкеш,
а осал еҥ шужышо лиеш.
Глава 13
