Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
12 Глава
1 Кӧ тӧрлатымым йӧрата – йӧрата шинчымашым,
а кӧ шылталымым чытен ок керт – ушдымо.
2 Поро айдеме дек Господь поро кумылан,
а осал чоя еҥым Тудо титаканыш луктеш.
3 Осал пашажлан кӧра айдемын негызше пеҥгыде огыл,
а чын ыштыше-влакын вожышт ок тарване.
4 Сай вате – шке марийжылан вуйшӱдыш,
а пышткойшо – тудын лулегыштыже погынышо шӱйшӧ дене иктак.
5 Чын ыштыше-влакын шонымашышт улыт чынле,
а осал еҥ-шамычын – осал чоя.
6 Осал еҥ-влакын мутышт вӱрым йоктараш виктаралтыт,
а чын ыштыше-влакын шомакышт чоным утарен кодат.
7 Толеш осал еҥ дек азап, да тудо йомеш,
а чын ыштышын тукымжо пеҥгыдын шога.
8 Айдемым ушыжлан моктат,
а пужлышо уш-акыланым огыт шотло.
9 Шкенжым кугуэш ужшо, но шужен шинчыше еҥ лиймешке,
лучо изи лӱмнеран, но шкем пукшен-йӱктышӧ айдеме лияш.
10 Чын ыштыше еҥ шке вольыкшо верчат тырша,
а осал еҥ поро лияш тӧчымыж годымат чаманыдыме.
11 Кӧ шке мландыжым курал-ӱда – темше лиеш,
а кӧ южым чумен коштеш, тудын ушыжо уке.
[Кӧ шке жапшым аракам йӱын эртара,
тудо шке пӧртшым намысла.]
12 Осал еҥ весым осаллык вапшышкыже кучынеже,
а чын ыштыше-влакын вожышт пеҥгыде.
13 Осал еҥ шке сулыкан шомакше дене кучалтеш,
а чын ыштыше айдеме азап дечын утла.
[Тыматлын ончышо еҥ дек поро кумыл лиеш,
а ола капкаште вашлийме еҥ молым шыгыремда.]
14 Айдемын поро шомакше тудлан шуко сайым конда,
пашаже почеш тудлан пӧртылтымӧ лиеш.
15 Ушдымо еҥ шке корныжым чынлан шотла,
а каҥашым колыштшо – мунло айдеме.
16 Ушдымо еҥ шке шыдыжым тунамак ончыкта,
а ушан айдеме осал шомакым шотыш ок нал.
17 Чын еҥ каласа лач чыным,
а шояк таныклыше – ондалчыкым.
18 Шоныде ойлыштшо айдеме керде семын сусырта,
а мунло еҥын мутшо паремда.
19 Чын шомак кодеш курымешлан,
а шояк мут – лач ик татлан.
20 Осал чоя-влакын шӱмыштышт – ондалчык,
а тынысым кондышо-влакын – куан.
21 Чын ыштыше дене нимогай осал ок лий,
а осал-влакын илышышт неле-йӧсӧ дене темеш.
22 Ондалчык умша – Господьлан йырнык,
а шке мутшым шуктышо еҥ Тудлан келша.
23 Ушан ок ончыкто шке шинчымашыжым,
а ушдымо-влак окмак улмыштым почын ончыктат.
24 Тыршыше кид тӱҥалеш вуйлаташ,
йолагай – ӧкым пашам ышташ.
25 Шӱм-чон тургыжланымаш кумылым волта,
а поро шомак куандара.
26 Чын ыштыше шке лишылъеҥжылан чын корным ончыкта,
а осал-влак шке корныштышт йомын коштыт.
27 Йолагай сонарлен кондымо шылжым ок кӱктӧ,
а тыршыше айдемын погыжо улан.
28 Чынлык корнышто – илыш,
уке тушто колымаш.
Глава 12
