Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
7 Глава
Яжар ӱдырамаш шотышто шекландарымаш.1 Эргым, шарне мут-влакем,
кӱштымем шӱмыштет арале.
[Эргым, шотлен иле Господьым –
тунам тый пеҥгыде лият.
Тудын деч гына лӱдын иле!]
2 Шуктен шого кӱштымем – тунам тый илаш тӱҥалат.
Мыйын туныктымем шинчасорта семын арале,
3 кылде нуным парняшкет,
возен шынде шӱмышкет.
4 Каласе мунлылыклан: «Улат тый акам!»,
уш-акылым «мыйын родем» манын ойло.
5 Тунам нуно тыйым арален кодат еҥ вате деч,
ӱедылше шомакан вес ӱдырамаш деч.
6 Икана мый мӧҥгыштем окнасе решотка гоч онченам.
7 Ужынам ужарвуй-влак коклаште,
шекланенам самырык-влак коклаште ушдымо рвезым.
8 Ошкылын тудо тыгай ӱдырамашын илыме уремже дене,
тудын пӧртшӧ деке корныжым шуен.
9 Лийын тиде кече шичме деч вара,
рӱмбалгымеке, йӱд пычкемыш волымо годым.
10 Тудын ваштарешыже лектын ӱдырамаш,
яжар семын чийыше, осал чоя шӱман,
11 лӱшкаш йӧратыше, ӱскырт койышан.
Шинчен ок керт тиде ӱдырамаш мӧҥгыштӧ –
12 уремлаште, еҥ погынымо верлаште
шога тудо кажне лукышто ваҥен.
13 Тудо рвезым руалтен кучен, шупшалын
да намысдыме чурий дене ойлен:
14 «Татулык надыр шылем мыйын уло,
таче мый мо сӧрымем шуктенам.
15 Сандене тыйын ваштареш лектынам –
кычалынам мый тыйым, ынде муынам.
16 Вакшыш ӱмбаке шаренам чапле леведышым,
Египет гыч кондымо тӱрлӧ тӱсан куэмым,
17 малыме верем смирна, алой да корице дене пушландаренам.
18 Пуро, эр марте шыматен модына,
икте-весым йӧратен, ракатым налына.
19 Вет мӧҥгыштӧ уке марием:
тора корныш тудо каен,
20 пеленже шуко шийым налын,
мӧҥгӧ пӧртылеш тичмаш тылзе годым».
21 Шуко ныжыл мут дене рвезым сымыстарен,
ӱедылше шомакше дене тудым савырен.
22 Тунамак каен рвезе почешыже –
кузе кая ӱшкыж шӱшкылмашке,
[пий – шинчырлымашке]
да пӱчӧ – лӱйымашке,
23 тунам пикш шӱта тудын мокшыжым.
Кайык семын чоҥешта тудо шӧргашке,
тушто колымаш улмым палыде.
24 Тыгеракын, икшывем-влак, мыйым колыштса,
мутем деке тӱткӧ лийза:
25 шӱмда ынже савырне тыгай ӱдырамашын корнышкыжо,
йомын ида кошт тудын йолгорныштыжо.
26 Вет шукым тудо сӱмырен кудалтен,
шагалым огыл пытарен.
27 Тудын пӧртшӧ – вес тӱняшке корно,
наҥгая тиде корно колымашын тӱняшкыже.
Глава 7
