Библия
Выбрать язык
Книги Ветхого Завета
Книги Нового Завета
с русским текстом
СОЛОМОНЫН ТУНЫКТЕН КАЛАСЫМЕ ОЙЖО-ВЛАК
6 Глава
Ушдымо паша деч шекландарымаш.1 Эргым, тый лишылъеҥетын парымже верч мутым кучаш сӧренат,
вес еҥын парымжым шке ӱмбакет налынат гын,
2 тугеже шомакет дене оптышыш логалынат,
умшат гыч лекше мутет дене кучымо лийынат.
3 Теве мом тунам ыште, эргым, да шкендым утаре –
вет тый лишылъеҥетын кидышкыже логалынат:
кай, ончылныжо кумык возын, тудым сӧрвале.
4 Покто омым шке дечет,
шинчатлан ит пу петырнаш,
5 утаре шкендым,
кузе пӱчӧ сонарзын кидше гыч утла,
кузе кайык тудым кучышо деч мучыштен кая.
6 Йолагай, кай кутко деке,
ончал тудын пашажым да мунло лий.
7 Уке тудын вуйлатышыже,
тӧра ден кугыжаже,
8 но тудо кеҥежым ямдыла шке киндыжым,
тӱредме годым шкаланже кочкышым пога.
[Але кай мӱкш дек да пален нал:
могай тудо пашаче, могай кӱлешан пашам ышта.
Таза лияш манын, тудын погымо мӱйжым
кугыжа-влакат, тыглай еҥат кочкыт.
Чылан тудым йӧратат да жаплат,
кеч вийже шагал, но мунло улмыжлан чылан пагалат.]
9 Мыняр жап эше, йолагай, тый кияш тӱҥалат?
Кунам тый мален кынелат?
10 Эше изишак малет, изиш нералтет,
кидетым кыргештен,
*а изиш киялтет –
11 аген коштшо семын тый декет нужналык толеш,
толышо еҥ семын йорлылык поктен шуэш.
[Тый його от лий гын,
лектышет памаш семын йоген толеш,
нужналык тый дечет умбаке куржеш.]
12 Йӧрдымӧ еҥ, осал айдеме
чыла вере шояк мутым ойлыштеш,
13 пӱялеш шинчажым, весын йолжым тошкалеш
але шолып ончыкта парняж дене.
14 Шӱмыштыжӧ тудын чоялык,
эре шонен коштеш осалым,
ӱда тудо келшыдымашым.
15 Садлан тудын дек туткар кенета толеш
да вучыдымын тудо пытарыме лиеш,
паремдымашым ок уж.
16 Нине кудыт дек Господь ужмышудымо,
эсогыл шымыт Тудлан улыт йырнык:
17 кугешныше шинча, шояк йылме,
титакдыме вӱрым йоктарыше кид,
18 осалым ышташ шонышо шӱм,
осал-чоя пашашке писын куржшо йол,
19 шояк таныклыше, кудо ондален ойлыштеш
да иза-шольо коклаште келшыдымашым шочыкта.
20 Эргым! Ачатын кӱштымыжым ушыштет тый кучо,
аватын туныктен ойлымыж деч ит кораҥ.
21 Нумал нуным эре шӱмыштет,
сакалте нуным шӱйышкет.
22 Кунам кает, нуно тыйым вӱден наҥгаят,
малаш возат – оролаш тӱҥалыт,
кынелат – тыйым туныктат.
23 Вет нине кӱштымаш-влак улыт чӱктымӧ лампе,
каҥаш-влак улыт тылат волгыдо,
а туныктен ойлымо шылталымаш – илыш корно.
24 Нуно тыйым осал ӱдырамаш деч,
пыльген кутырышо еҥ вате деч арален кодат.
25 Ит алгаштаралт тудын моторлыкшо дене,
[тудым ончен, ит логал вапшышкыже,]
ончалтышыже тыйым ынже сымыстаре.
26 Вет яжар ӱдырамашын акше – изи ӱяча,
а еҥ ватылан кӧра илышет йомдарет.
27 Кертеш мо иктаж-кӧ тулым помышыш шылтен
да вургемжым йӱлалтыде коден?
28 Кертеш мо иктаж-кӧ йӱлышӧ тулшолышто коштын,
йӱлалтыде шке йолжым?
29 Тыгак лиеш тудын дене, кӧ лишылъеҥжын ватыж дене коштеш:
кӧ тудын дек тӱкна, мут кучыде огеш код.
30 Чотшак огыт шыдешке ворлан,
кунам тудо шужышо мӱшкыржым темаш шолыштеш;
31 но, кучымо лиймекше,
тудо шым пачаш шукырак тӱла, уло погыжым пуа.
32 Но кӧ еҥ вате дене яжарлана, тудын ушыжо уке –
тыге ыштыше шкенжым шке пытара.
33 Тудым кыралтмаш да вожылмаш вучат,
нигунам ок мондалт тудын намысше.
34 Вет марийын ушкалымашыже кугу шыдым ылыжта,
ӱчым шуктымо кечын тудо чаманаш ок тӱҥал –
35 нимогай сулен налме акым тудо ок нал,
ок серлаге, пӧлекым шукемдет гынат.
*а 6:10 Кидым кыргешташ – сложить руки крест-накрест.
Глава 6
