Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
77 Псалом
Асафын туныктымашыже.1 Колышт, калыкем, мыйын туныктымем,
ойлымо шомакем дек савыре пылышет.
2 Туштен ойлаш йылмем рудем,
акрет годсо туштым мый ойлем.
3 Мом колынна да пален налынна,
мом ачана-влак мыланна каласкаленыт –
4 йоча-влак дечын она шылте,
толшаш тукымлан ме Господьын чапшым,
Тудын куатше ден ӧрыктарыше пашаж-влакым увертарена.
5 Пуэн Иаковлан Тудо сугыньым,
Израильлан – шке законжым,
тудым ачана-влак шке йочаштлан туныктышт манын кӱштен коден.
6 Палышт тудым кушкын шушо тукым,
ончыкшым шочшаш йоча-влак,
да нунат шке жапыштыже икшывыштлан ойлышт.
7 Тек Юмо лиеш нунын ӱшанышт,
Юмын пашажым нуно ынышт мондо
да Тудын кӱштымашыж-влакым шуктен шогышт.
8 Ынышт лий нуно ача-кочашт гай,
нунышт ӱскырт, мут колыштдымо тукым лийыныт,
шӱмышт кокытеланыше улмаш,
чонышт Юмылан ӱшанле лийын огыл.
9 Пикшым лӱйкалыше саргуралан Ефрем эрге-влак
кредалме кечын тушман деч куржыныт.
10 Юмын ойпидышыжым нуно шуктен огытыл,
Тудын законжо почеш илаш келшен огытыл.
11 Монденыт нуно Тудын мом ыштымыжым,
нунылан ончыктымо ӧрыктарыше пашаж-влакым.
12 Ачаштын шинча ончылнышт Египет мландыште, Цоан кундемыште
Юмо ӧрыктарыше паша-влакым ыштен.
13 Теҥызым шелын да нуным тудын гоч луктын,
вӱдым пырдыж семын шогалтен.
14 Вӱден каен нуным кечывалым пыл дене,
а йӱдым тул волгыдо дене наҥгаен.
15 Ир мландыште Тудо кӱм шелын,
пуйто кугу келгыт гыч вӱдым луктын, нуным йӱктен.
16 Кӱ курык гыч луктын йогыным,
да вӱд эҥер семын йоген.
17 Но нуно Тудын ваштареш сулыкым тугак ыштеныт,
Чыла деч Кӱшылысым ир мландыште колыштын огытыл.
18 Юмым нуно лӱмынак тергеныт,
чоныштлан келшыше кочкышым пуаш йодыныт.
19 Юмо ваштареш ӧпкелен ойленыт:
«Кертеш мо Юмо ир мландыште ӱстелым поген?
20 Чынжымак, Тудо кӱм перен,
да тушеч вӱд лектын, эҥер семын йоген.
А кертеш мо Тудо киндымат пуэн,
шке калыкшылан шылымат пукшен?»
21 Господь тидым колын да моткоч шыдешкен,
тул лектын Иаков ӱмбаке,
шыдыже ылыжын Израиль ваштареш.
22 Вет ӱшанен огытыл нуно Юмылан,
Тудын утарымыжлан инанен огытыл.
23 Но пыл-влаклан Тудо пуэн кӱштымашым,
кавасе омса-влакым почын
24 да ӱмбакышт йӱр семын манным колтен,
кава гыч киндым нунылан кочкаш пуэн.
25 Суксо-влакын кондымо киндыштым кочкын айдеме,
нунылан кочкышым Юмо ток колтен.
26 Эрвел мардежым Тудо тарватен кава гыч,
куатше дене кечывалвел мардежым конден,
27 пурак наре йӱрыктен нунылан Тудо шылым,
теҥыз ошма наре шулдыран кайыкым кышкен.
28 Нунын станышкышт, омашышт воктек
Тудо кайыкым кышкен.
29 Нуно кочкыныт, утыждене темыныт,
мо шонымыштым Тудо нунылан пуэн.
30 Но нунын эше шерышт темын огыл,
умшаштышт эше кочкыш улмаш,
31 ӱмбакышт Юмын шыдыже ылыжын:
нунын виян еҥыштым пуштын,
Израильын самырык пӧръеҥже-влакым сӱмырен кудалтен.
32 Тидын деч варат нуно сулыкым ыштымыштым чарнен огытыл,
Тудын ӧрыктарыше пашаж-влаклан ӱшанен огытыл.
33 Сандене Тудо илыме кечыштлан мучашым пыштен,
нунышт шӱлалтыш семын йомыныт –
илыме ийлаштым Тудо шучкын пытарен.
34 Кунам Юмо нуным пуштеден,
нуно Тудым кычалыныт, Тудын дек савырненыт,
эр гычак тӱҥалын, Юмо дек лишемаш тыршеныт.
35 Шарналтеныт тунам: Юмо – нунын кӱ курыкышт,
Чыла деч Кӱшылысӧ Юмо – нуным Утарыше.
36 Туге гынат нуно умшашт дене Тудым ондаленыт,
йылмышт дене шойыштыныт.
37 Шӱмышт Тудын ончылно чын лийын огыл,
Тудын ойпидышыжлан нуно ӱшанле лийын огытыл.
38 Но Тудо, поро кумылан,
сулыкыштым кудалтен да нуным пытарен огыл,
шуко гана сырымашыжым кораҥден,
уло шыдыжлан ылыжаш пуэн огыл.
39 Тудо шарнен: улыт нуно айдеме гына,
шӱлалтыш, кудо лектеш да мӧҥгеш ок пӧртыл.
40 Мыняр гана нуно ир мландыште Тудын ваштареш шогалыныт,
еҥ илыдыме верыште Тудым ойгандареныт!
41 Угыч да угыч нуно Юмым тергеныт,
Израильын Святойжым йӧсландареныт.
42 Шарналтен огытыл Тудын виян кидшым,
нуным пызыралтмаш деч утарыме кечыжым.
43 Тунам Тудо Египетыште палдарыше палыж-влакым,
шке ӧрыктарыше пашаж-влакым Цоан кундемыште ончыктен.
44 Египтян-влакын эҥерыштым Тудо вӱрыш савырен,
нуно вӱдйогынышт гыч йӱын кертын огытыл.
45 Нуным пурашлан колтен ӱмбакышт пормо-влакым
да ужава-шамычым – орлыкым кондашлан.
46 Пуэн шукш-влаклан нунын мланде кушкылыштым,
да шурнышырчыклан – паша лектышыштым.
47 Виноград вондыштым шолемлан кырыктен,
ир смоква пушеҥгыштым йӱштӧ налын.
48 Вольыкышт ӱмбак шолемым колтен,
кӱтӱштым волгенче дене пытарен.
49 Колтен нунын ӱмбак йӱлышӧ шыдыжым,
сырымаш ден неле орлыкым ӱмбакышт йоктарен –
пытарыше суксо-влакым пеш шуко колтен.
50 Кучаш тӱҥалын огыл Тудо шыдыжым,
арален огыл колымаш деч чоныштым –
нуным шучко черлан пуэн.
51 Египетын чыла кугэргыжым пуштын,
Хамын илемыштыже пӧръеҥ вийын икымше саскажым пытарен.
52 Луктын шке калыкшым шорык семын,
ир мландыште нуным кӱтӱ семын наҥгаен.
53 Корныштышт Тудо арален каен,
лӱдын огытыл нуно нимо деч,
а тушманыштым теҥыз петырен.
54 Нуным Тудо шке святой мландышкыже,
шке кидше дене сеҥен налме курыкышкыжо, конден.
55 Тусо калык-влакым нунын ончыч поктен колтен,
мландыштым Израиль калыклан шеледен пуэн,
илемышкышт Израиль тукым-влакым вераҥден.
56 Но нуно умбакыжат Юмым тергеныт,
Чыла деч Кӱшылысӧ ваштареш шогалыныт,
Тудын сугыньжым шуктен огытыл.
57 Ача-кочашт семын Юмо деч кораҥыныт,
Тудлан ӱшанле лийын огытыл –
йӧрдымӧ пикшйоҥеж гай нуно лийыныт.
58 Кумалме кӱкшакашт дене Юмым шыдештареныт,
шке ыштыме юмышт дене Тудым сырыктеныт.
59 Тидым ужын, Юмо чот сырен,
Израильлан Тудо шыдешкен:
60 коден каен Силомысо илыме вержым –
еҥ-влак коклаште илыме скинийжым.
61 Пуэн шке куатшым
*а пленыш,
шке чапшым – тушман кидыш.
62 Шке калыкшылан Юмо шыдешкен,
тудым керде дене пушташ пуэн.
63 Тул кочкын нунын рвезыштым,
сӱан мурым мурен огытыл ӱдырыштлан.
64 Иерей-влакышт керде деч пытеныт,
тулык ватышт шортмо йӱлам эртарен кертын огытыл.
65 Тунам омо деч вара помыжалтше,
аракам йӱмӧ деч вара шӧрлышӧ патыр семын
Господь помыжалтын.
66 Тушман-влакым мӧҥгеш куржыктен,
курымаш намысыш нуным пуртен.
67 Иосифын илыме вержым кудалтен каен,
Ефрем тукымым Шкаланже ойырен налын огыл,
68 но Иуда тукымым, йӧратыме Сион курыкшым,
Тудо ойырен налын.
69 Тушан Шкаланже кава гай кӱкшӧ святой верым чоҥен,
курымешлан тудым мланде гай пеҥгыдым ыштен.
70 Ойырен налын шке Давид тарзыжым,
шорык кудывече гыч тудым налын.
71 Пачам пукшышо шорык кокла гыч
конден тудым шке калыкшым кӱташ –
кӱташ Иаковым, шке Израиль калыкшым.
72 Нуным Давид яндар шӱм-чон дене кӱтен,
уста кид дене вуйлатен.
Тау
*а 77:61 «Куатшым» – Тыште Юмын шондыкшо нерген ойлалтеш, тудым филистим-влак руалтен налыныт. Ончо: 1 Куг 4-ше глава.
Глава 77
