Выбрать язык
Книги Ветхого Завета
Книги Нового Завета
с русским текстом1 [Филистим-влак израильтян-шамыч дене кредалаш погыненыт.] Самуилын пӱтынь Израильлан шомакше лийын. Израильтян-влак филистим-шамыч ваштареш кредалаш тарваненыт да Авен-Езер воктене стан дене шогалыныт, а филистим-влак Афек воктене верланеныт.2 Филистим-влак израильтян-шамыч ваштареш рат дене лектын шогалыныт, да кредалмаш тӱҥалын. Филистим-влак израильтян-шамычым сеҥеныт, сӧй пасушто нуным ныл тӱжем наре пуштыныт.3 Сарзе-влак станыш пӧртылыныт. Израильын кугуракше-влак каласеныт: «Молан таче Господь мемнам филистим-шамычлан сеҥыктен? Айста Силом гыч Господьын ойпидыш шондыкшым кондена, тек тудо мемнан дене кая да тушман кид деч утара».4 Силомыш еҥ-влакым колтеныт, нунышт тушечын херувим-влак ӱмбалне шинчыше Господь Саваофын ойпидыш шондыкшым конденыт. Юмын ойпидыш шондыкшо пелен Илийын кок эргыже, Офни ден Финеес, лийыныт.
5 Кунам Господьын ойпидыш шондыкшо станыш толын, уло Израиль куанымыж дене туге чот виян кычкыраш тӱҥалын, эсогыл мланде чытырналтын.6 Филистим-влак кычкырыме йӱкым колыныт да каласеныт: «Мом тыге еврей-влакын станыштышт кычкырат?» Вара нуно станыш Господьын шондыкшым кондымо нерген пален налыныт.7 Филистим-влак лӱдыныт, нуно ойленыт: «Юмо нунын дек станышкышт толын! Ойго мыланна! Вет тыгайже нигунамат лийын огыл.8 Ойго мыланна! Тиде виян Юмын кидше деч мемнам кӧ утара? Тиде саде Юмо, кудо египтян-влакым ир мландыште тӱрлӧ орлык дене чуриктарен.9 Филистим-шамыч, пеҥгыде да лӱддымӧ лийза! Уке гын, кузе ондак еврей-влак тендан кулда лийыныт, тугак теат нунын кулышкышт савырнеда. Лӱддымӧ лийза да нунын дене кредалза!»
10 Филистим-влак кредалаш пижыныт. Израильтян-шамыч сеҥалтыныт, да кажныже шке омашышкыже куржын. Нуно шукын пытеныт: чылаже кумло тӱжем йолешке колен.11 Юмын шондыкым руалтен налыныт, а Илийын кок эргыже, Офни ден Финеес, коленыт.
12 Вениамин тукым гыч ик еҥ сӧй пасу гыч куржын утлен да тудо кечынак Силомыш толын шуын. Ӱмбалныже вургем кушкедме, вуйыштыжо пурак лийын.13 Тудын толмыж годым Илий капка воктенысе пӱкеныште шинчен да уверым вучен – шӱм-чонжо Юмын шондыкшо верч вургыжын. Кунам тиде еҥ толын да мо лийме нерген олаште увертарен, чыланат чот шорташ тӱҥалыныт.14 Илий варгыжме йӱкым колын да йодын: «Мом тиде кычкырат?» Саде еҥ тунамак Илий деке лишемын да уверым каласен.15 Илий тунам индешле кандаш ияш лийын, шинчаже начарештмылан кӧра нимат ужын огыл.16 Тудо еҥ Илийлан каласен: «Мый стан гыч толынам, сӧй пасу гыч таче куржын утленам». Илий йодын: «Мо лийын, эргым?»17 Уверзе вашештен: «Израиль филистим-влак деч куржын, пеш шуко калык пытен. Тыйын кок эргыч, Офни ден Финеес, коленыт, тыгак Юмын шондыкым руалтен налыныт».18 Кунам тудо Юмын шондыкшо нерген каласен, Илий капка воктенысе пӱкенже гыч комдык йӧрлын, тупрӱдыжым пудыртен да колен – тудо шоҥго да неле капкылан улмаш. Илий нылле ий Израильын судьяже лийын.
19 Тудын шешкыже, Финеесын ватыже, мӱшкыран лийын – теве-теве ыштышаш улмаш. Юмын шондыкым руалтен налме нерген, тыгак оньыкугызаж ден марийжын колымышт нерген колмеке, тудын мӱшкыржым пӱтыраш тӱҥалын – пеш чот корштымо деч тудо лыдырген волен шинчын да азам ыштен.20 Колымыж годым воктеныже шогышо ӱдырамаш-влак тудлан ойленыт: «Ит лӱд, тый эргым ыштенат». Но тудо нимом вашештен огыл, ӱдырамашлан чылажат садак лийын.21 Азажлан тудо Иохавед лӱмым*а пуэн да каласен: «Израиль деч чап кораҥын», вет Юмын шондыкым руалтен налыныт, а оньыкугызаж ден марийже коленыт.22 «Израиль деч чап кораҥын, Юмын шондыкым руалтен налыныт», – тудо ойлен.
*а 4:21 Иохавед лӱм еврей йылмыште ’чапдыме’ манмым ончыкта.
Глава 4