Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
26 Псалом
Давидын псаломжо. [Шӱрен палемдыме деч ончыч.]1 Господь – мыйын волгыдем, утарымашем.
Кӧ деч мылам лӱдаш?
Господь – мыйын илышемлан аралтыш,
кӧ деч мылам чытыраш?
2 Осал еҥ-шамыч але тушман-влак
капемым кӱрышташ ӱмбакем кержалтыт гын,
нуно шкешт шӱртнен камвозыт.
3 Тушман сарзе-влак мыйым авырат гын,
огеш лӱд шӱмем тунамат.
Ваштарешем сар дене толыт гын,
тунамат инанаш тӱҥалам.
4 Иктым веле йодынам Господь деч,
тидым гына кычалам –
илыме чыла кечыштем Господьын пӧртыштыжӧ лияш,
Господьын сӧраллыкшым ончаш,
Тудын [святой] храмыштыже вашмутым вучаш.
*а5 Вет орлык толмо кечын мыйым
Тудо шке омашышкыже пурта,
шке илыме верешыже шылта,
кӱ курыкыш кӱзыкта.
6 Тунам мыйым авырыше тушман-влак ӱмбалне вуем нӧлталтеш,
да мый Тудын скинийже пелен надырым куанен кондем,
Господь ончылно моктен мурем.
7 Господь, мыйын сӧрвалымем кол,
серлаге мыйым да колышт!
8 Шӱмемже Тыйын мутетым шарна:
«кычалза Мыйын чурием» –
Господь, мый Тыйын чуриетым кычалаш тӱҥалам.
9 Ит петыре мый дечем чуриетым,
сырымет дене ит шӱкал шке тарзетым.
Лийынат Тый полыш мыланем.
Утарыше Юмем, ит шӱкал, ит кай коден!
10 Коден каят гынат ачам ден авам,
Господь мыйым Шкеж деке налеш.
11 Туныкто, Господь, мыйым шке корнетлан,
тушман-влакемлан кӧра тура йолгорно дене вӱден наҥгае.
12 Ит пу мыйым тушман-влакын кидышкышт,
вет шояк таныклыше-влак ваштарешем кынелыныт
да осалын шӱлат.
13 Но илыше-влакын мландыштышт
мый Господьын порылыкшым ужам манын ӱшанем.
14 Господьлан инане, нимо деч ит лӱд,
лий пеҥгыде, Господьлан ӱшане!
Тау
*а 26:4 «Тудын [святой] храмыштыже вашмутым вучаш»: еврей текстыште тыште мом возымым умылаш неле. Южышт тидым «Тудын [святой] храмышкыже кошташ» семын умыленыт.
Глава 26
