Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
18 Псалом
1 Хор вуйлатышылан. Давидын псаломжо.2 Юмын чапше нерген пылпомыш ойла,
Тудын чыла пашаж нерген кава увертара.
3 Кече кечылан каласкала,
йӱд йӱдлан шинчымашым пуа.
4 Кеч огыт ойло, мутым огыт лук
да йӱкыштат ок шокто,
5 но каласымышт мланде мучко шарла,
шомакышт тӱня тӱр марте шуэш.
Каваште Тудо кечылан илыме верым ыштен.
6 Качын шке сӱан омашыж гыч лекме семын кече шыргыж лектеш,
шке корныж дене каяш лекше патыр семын куана.
7 Ик могыр каватӱр гыч тудо лектеш,
каен эрта вес каватӱр дек шумеш,
да тудын шокшыж деч нимоат шылын ок код.
8 Господьын законжо – ситыдымаш деч посна,
тудо шӱм-чоным пеҥгыдемда.
Господьын сугыньжо – чынле,
ужарвуй-влакым
*а тудо ушаным ышта.
9 Чынле улыт Господьын кӱштымашыже-влак,
нуно шӱмым куандарат.
Волгыдо улыт Господьын шӱдымашыже-влак,
нуно сайын ужаш полшат.
10 Господь деч лӱдмаш яндар, тудо курымеш лиеш.
Господьын судшо-влак – тиде чынлык, чын улыт нуно чыланат.
11 Нуно шӧртньӧ деч, шуко яндар шӧртньӧ деч шергырак,
мӱй, карашан мӱй чӱчалтыш деч улыт шерырак.
12 Нуно Тыйын тарзетым аралат,
нуным шуктен толмаш кугу суапым конда.
13 Кӧ шке чыла йоҥылышыжым ужын сеҥа?
Шекланыде ыштыме сулыкем деч эрыкте мыйым.
14 Лӱмын ыштыме сулык деч арале шке тарзетым,
тек тудо мыйым огеш керт сеҥен.
Тунам лиям мый титакдыме,
кугу язык деч лиям яндар.
15 Тек умшам гыч лекше мут-влак да шӱмысӧ шонымашем-влак
Тылат келшыше лийыт.
Господь, Тый мыйын кӱ курыкем да Утарышем улат!
*а 18:8 Ужарвуй – неопытный, наивный.
Глава 18
