Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
17 Псалом
1 Хор вуйлатышылан. Господьын Давид тарзыжын псаломжо. Кунам тудым Господь чыла тушманже да Саулын кидше деч утарен, Давид тиде мурым Господьлан мурен. Тудо каласен:2 Господь, Тыйым йӧратем,
улат Тый вий-куатем!
3 Господь – пеҥгыдылыкем, аралтышем да утарышем,
мыйын Юмем – кӱ курыкем,
Тудын полшымыжлан ӱшанен илем;
Тудо – авыртышем, виян утарышем да шылын куржмо верем.
4 Моктымашым сулышо Господьым мый ӱжам
да тушманем-влак деч утарыме лиям.
5 Колымаш кандыра-влак мыйым авырышт,
пужлымашын йогынжо-шамыч лӱдыктышт;
6 вес тӱнян шинчырже-влак мыйым авырышт,
колымашын вапшыже йырем пӱтырналте.
7 Чонлан шыгыр лийме годым Господьым ӱжым,
шке Юмемым сӧрвален мый йодым.
[Святой] верже гыч Тудо йӱкем кольо,
кычкырымем Тудын пылышыж дек миен шуо.
8 Юмын шыдыж деч мланде лӱҥгалте да чытырналте,
курык-влакын негызышт чытырнышт, тарванышт.
9 Нерже гыч шикш лекте,
умшаж гыч – чыла пытарыше тул,
Тудын деч тулшол-влак йогышт.
10 Тудо пылпомышым пӱгыртыш да волыш,
йол йымалныже – тӱп пычкемыш.
11 Херувим ӱмбаке шинче да чоҥештыш,
мардежын шулдырешыже кайыш.
12 Пычкемыш гыч ыштыш Шкаланже леведышым,
пычкемыш вӱд ден кава пыл гыч – Шке йырже пӱрдышым.
13 Тудын ончылныжо волгалтме деч пыл-влак лектыч,
а тушечын – шолем ден тулшол.
14 Господь пылпомышышто кӱдыртыш,
Чыла деч Кӱшылысӧ шке йӱкшым пуыш,
шолем ден тулшолым колтыш.
15 Пикш-влакым колтен, тушманым шалатыш,
шуко-шуко волгенче дене нуным чактарыш.
16 Господь, Тыйын кӱштымет деч,
Тыйын шыдетын пуал колтымыж деч
вӱдйогын-влак почылтыч,
тӱнян негызше-влак койыч.
17 Кидшым кӱшыч шуялтен, мыйым нале,
шуко вӱд кокла гыч мыйым лукто.
18 Утарыш мыйым виян тушманем деч,
мыйым ужмышудымо еҥ-влак деч,
кӧмытын куатышт лийын мый дечем шукырак.
19 Мылам неле лийме кечын нуно ӱмбакем кержалтыч,
но Господь мылам эҥертыш лие.
20 Утарыш мыйым, йоҥгыдо верыш лукто,
вет Тудо мый декем поро кумылан.
21 Чыным ыштымем почеш Господь мылам пӧртылта,
кидемын арулыкшо почеш Тудо пуа.
22 Вет мый Господьын корныж дене коштынам,
осалым ыштен, Юмем деч кораҥын омыл;
23 Тудын чыла кӱштымашыжым ушыштем эре кучем,
пунчалже-влак деч мый кораҥын омыл.
24 Тудын ончылно шылталаш лийдыме лийынам
да сулыкым ыштыме деч шекланенам.
25 Чыным ыштымем почеш Господь мылам пӧртылта,
вет Тудын шинчаж ончылно кидем ару.
26 Поро еҥ дене Тый поро лият,
чынле еҥ дене – чынле,
27 яндар дене – яндар,
а шояк еҥ дене – чоя.
28 Ӱҥышӧ-влакым Тый утарет,
а кугешныше ончалтышым ӱлыкшемдет.
29 Господь, Тый мылам лампым чӱктет,
мыйын Юмем волгалтара пычкемышем.
30 Тыйын полшымет дене тушман ӱмбак керылтам,
Юмем дене ола пырдыжым вончем.
31 Юмо! Тудын корныжо чынле,
Господьын шомакше яндар.
Кӧ Тудын полышыжлан ӱшанен ила,
чылаштлан Тудо авыртыш лиеш.
32 Господь деч моло кӧ эше Юмо уло,
Юмына деч моло кӧ эше аралтыш уло?
33 Юмо мылам вий-куатым пуа
да чын корныш шогалта.
34 Йолемым ышта пӱчын гайым,
кӱкшака верыш мыйым шогалта;
35 кидемым кредалаш туныкта,
той пикшйоҥежым кидем чымалтара.
36 Утарымаш авыртышым Тый мылам пуэт,
пурла кидет дене мылам полшен шогет,
Тыйын порылыкет мыйым нӧлта.
37 Йолемлан коштмо верым лопкаҥдет,
да огеш тайнышт мыйын йолем.
38 Мый тушман-влакем поктем да поктен шуам,
нуным шалатен пытарымеш мӧҥгеш ом пӧртыл.
39 Кырен шалатем нуным – кынелын огыт керт,
йол йымакем йӧралтыт.
40 Тый мылам кредалаш вий-куатым пуэт,
ваштарешем шогалше-влакым ончылнем сӱмырет.
41 Тушман-шамычем мый дечем куржыктет,
мыйым ужмышудымо-влакым мый пытарем.
42 Полышым йодын, нуно кычкырат, но утарыше уке,
Господьым сӧрвалат, но Тудо нуным ок кол.
43 Пуракыш савырен, мый нуным мардеж почеш колтем,
уремысе лавыра семын нуным тошкем.
44 Калык пудыранымаш деч Тый мыйым утарышыч,
вес калык-влакын вуйлатышыштлан шогалтышыч –
калык, кудым ончыч пален омыл, мылам служитла.
45 Ик гана ойлымекак, нуно мыйым колыштыт,
йот калык мыланем келшаш тӧча.
46 Йот тукым-влак ошем каят ончылнем,
карманышт гыч лектыт чытырен.
47 Господь илыше! Моктымо лийже мыйын аралышем,
чапландарыме лийже мыйым утарыше Юмем!
48 Мылам верч Юмо ӱчым шукта,
калык-влакым кид йымакем пуа,
49 тушман-шамыч дечын мыйым утара!
Ваштарешем шогалше-влак деч кӱшкӧ
Тый мыйым нӧлталынат,
поктылшо еҥ дечын Тый утаренат.
50 Сандене Тыйым, Господь, вес калык-влак коклаште чапландарем,
Тыйын лӱметым мый моктен мурем!
51 Шке кугыжатлан Тый кугу сеҥымашым пӧлеклет,
шӱрен палемдыме Давид ден тудын тукымжылан
порылыкым курым-курымеш ыштет.
Тау
Глава 17
