Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
138 Псалом
Хор вуйлатышылан. Давидын псаломжо.1 Господь, Тый мыйым тергенат да мыйым палет.
2 Тый палет, кунам мый шинчам да кунам кынелам,
умбачынак Тый шонымем палет.
3 Ошкылам мый але канем –
Тый мыйым ужат,
чыла коштмо корнем пале Тыланет.
4 Уке эше мут йылмыштем –
Тый тудым палет.
5 Шеҥгечат да ончычат Тый мыйым авырет,
кидетым пыштенат мыйын ӱмбакем.
6 Чыла Тый палет – мылам тиде ӧрыктарыше,
мыйын ушем тидым авалтен ок керт.
7 Куш каем мый Тыйын Шӱлышет деч,
Тыйын чуриет деч куш куржам?
8 Кӱзем гын каваш, улат Тый тушто,
вес тӱняш волен, шкаланем вакшышым шарем гын,
туштат Тый улат.
9 Ӱжаран шулдырешыже чоҥештен кӱзен,
тӱҥалам гын илаш теҥыз вес могырышто –
10 туштат Тый мыйым вӱден наҥгает,
пурла кидет мыйым куча.
11 Кеч каласем: «Тек мыйым пычкемыш петыра
да йырем улшо волгыдо йӱдыш савырна», –
12 пычкемышат Тылат пычкемыш ок лий:
йӱдшӧ кече гай волгыдо лиеш,
пычкемыш волгыдо гай волгалтеш.
13 Ыштенат Тый мыйын кӧргем,
ава мӱшкырыштӧ мыйым куэнат.
14 Тыйым моктем – ӧрыктарышын Тый мыйым ыштенат!
Ӧрыктарыше улыт Тыйын пашат-влак,
мыйын чонем тидым сайын пала.
15 Койдымо лийын огытыл Тылат луэм-влак,
кунам мый шолып ышталтынам,
ава мӱшкырыштӧ
*а устан ышталтынам.
16 Иланымем годымак Тыйын шинчат мыйым ужын.
Илышаш кечем-влак Тыйын книгаштет возымо лийыныт,
кунам эше ик кечымат илен омыл.
17 Могай кӱкшӧ улыт мыланем Тыйын шонымашет-влак, Юмем –
мыняр шуко нуно улыт!
18 Тӱҥалам гын нуным шотлаш –
улыт нуно ошма пырче дечат шукырак...
Помыжалтам – мый эшеат Тый денет улам!
19 О Юмем, пытарет ыле гын осал еҥ-влакым!
Кораҥза мый дечем, вӱрым йоктарыше-шамыч!
20 Тыйын нергенет нуно осалым ойлат,
тушманет-влак кӱлеш-оккӱлым шонкалат.
21 Тыйым ужмышудымо-влакым, Господь,
мыйын ужмем ок шу,
Тыйын ваштареш шогалше-влак деч мый йырнем.
22 Ужмышудымаш дене темынам мый нунын деке,
тушман улыт нуно мыланем!
23 Терге мыйым, Юмем – пален нал шӱмем,
шымле мыйым – пален нал шонымем.
24 Ончал, уда корнышто омыл дыр?
Курымаш корныш мыйым виктаре!
*а 138:15 «Ава мӱшкырыштӧ» – Еврей йылмыште: ’мланде кӧргыштӧ’.
Глава 138
