Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
31 Глава
1 «Мый чын огыл корно дене коштын омыл». 35 «Тек Юмо мыланем вашмутым пуа».1 Кутырен келшенам мый шинчам дене –
ӱдыр-влак ӱмбак ончаш огыл.
2 Но мо вуча мыйым кӱшыч Юмо деч,
мом налам мый кава гыч Чылакучышо деч?
3 Осал еҥлан огыл мо туткар,
осалым ыштышылан огыл мо ойго?
4 Ужын огыл мо Тудо мыйын корнем,
шотлен огыл мо Тудо йолтошкалтышем?
5 Чындымылык корно дене коштынам мо,
йолем ондалаш вашкен мо?
6 Тек мыйым чын виса дене висат –
пален налеш тунам Юмо чынле улмем.
7 А йолем корно гыч кораҥын,
шинчамын ӱжмыж почеш шӱмем каен
да кидем иктаж-мо ару огыл дене амыртенам гын,
8 тек мыйын ӱдымем весе кочкеш,
тек шурнылектышем вожге куклен шумо лиеш.
9 Алгаштарыме лийын гын шӱмем еҥ вате дене
да тудым лишылъеҥын омсаж воктене ваҥен шогенам –
10 тек мыйын ватем йоҥышта вес еҥлан,
тек тудын дене возыт вес пӧръеҥ-влак.
11 Вет тиде – йырнык паша, сулык,
тидлан мутым кучыман суд ончылно,
12 тиде – вес тӱняш наҥгайыше тул,
пытара ыле тудо уло погем.
13 Пӧръеҥ але ӱдырамаш тарземын мый денем судитлалтмыж годым
тудын дене шкемым чын кучен омыл гын,
14 мом ышташ тӱҥалам ыле,
кунам Юмо судитлаш толеш?
Мом мый каласем ыле,
кунам Тудо мут кучаш шогалта?
15 Мыйым ава кӧргыштӧ Ыштышак огыл мо нунымат ыштен,
Тудак огыл мо мемнам мӱшкырыштӧ калыплен?
16 Йорло-влакын йодмыштым шуктыде коденам мо,
мылам верч тулык ватын шинчаже ойгаҥын мо?
17 Кочкынам мо киндемым шкетын,
пайлен омыл мо тудым тулык йоча дене?
18 Вет самырык годсек тудым ача семын куштенам,
тулык ватылан изинек полшен шогенам.
19 Ужынам гын вургем деч посна колаш вочшым,
чием деч посна кодшо йорло еҥым,
20 да тудын капкылже мыйым тауштен огыл,
шорыкемын межше дене тудо ырен огыл гын,
21 судышто мылам полыш лиймым пален,
тулык йочалан мушкындым ончыктенам гын –
22 тек кидем вачем деч ойырла,
кынервуй деч тек пудырга.
23 Лӱдам мый Юмо ончылно мутым кучаш,
Тудын кӱдыратлыкше ончылно ом керт ыле тыгайым ыштен.
24 Лийын мо шӧртньӧ мыланем эҥертыш,
ойленам мо тудлан: ”Тый мыйын ӱшанем улат”?
25 Куаненам мо поянлыкем шуко улмылан,
кидем тынар шуко погымылан?
26 Моторын йолгыжшо кечым,
кӱдыратлын ийын кайыше тылзым ончымо годым
27 чон кӧргыштем алгаштарымашыш пуренам мо,
кидем дене нунылан ӱмам колтенам мо?
28 Тиде сулыкланат мутым кучыман ыле суд ончылно,
вет тунам мый Чыла деч Кӱшылысӧ Юмо деч кораҥам ыле.
29 Куаненам мо мый тушманемын пытымыжлан,
йывыртенам мо, кунам тудо ойгыш логалын?
30 Пуэн омыл мый умшамлан сулыкыш пураш,
тушманем ӱмбак каргымашым ӱжаш.
31 Ойлен огытыл мо омашыштем илыше-влак:
”Тудо шылым мыланна теммеш пукша!”
32 Корныеҥ мален огыл уремыште,
тудлан мыйын омсам эре почмо лийын.
33 Шке титакем помышыш тоен,
сулыкем моло семын шылтем ыле гын,
34 кугу еҥ тӱшка деч ӧрткем ыле,
шке калыкемын мыскылымыж деч лӱдын,
шып лиям да мӧҥгыштӧ шинчем ыле.
35 О, иктаж-кӧ мыйым колыштеш ыле гын!
Теве мыйын пытартыш шомакем –
тек Чылакучышо вашмутым пуа.
Тек мыйым титаклыше шке титаклыме шомакшым воза,
36 тиде возымым мый вачыштем нумалам ыле,
вуйышкем вуйшӱдыш семын пыштем ыле.
37 Кажне йолтошкалтышем мый Тудлан каласем ыле,
он семын Тудын деке лишемам ыле.
38 Титаклен гын мыйым мландем,
вуйым шийын гын ӱмбакем тудын кашыже,
39 тӱлыде кочкынам гын саскажым
да пашазыже-влакын илышыштым нелемденам –
40 тек шыдаҥ олмеш коршаҥге,
шож олмеш шӱкшудо кушкыт».
Тидын дене Иовын мутшо пытен.
Глава 31
