Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
32 Глава
1 Иовын шомакшылан Елиуй шыдешкен. 6 Тудо Иовын йолташыже-влакым вурса. 15 Елиуйынат ойлышаш шомакше уло.1 Тунам нине кум йолташ Иовлан ойлымыштым чарненыт, вет шке шинчаштыже тудо чын ыштыше еҥак кодын.2 Но Иовлан Елиуй, Варахиил эрге, Рам тукымысо Вуз урлык эрге, шыдешкен, вет Иов Юмым огыл, а шкенжым чыныш луктын.3 Тыгак тудо Иовын кум йолташыжлан шыдешкен: нуно Иовым титакленыт, а вашешташ шомакым муын огытыл.4 Елиуй Иовын кутырен пытарымыжым вучен, вет чылан тудын деч кугурак ийготан лийыныт.5 Но кунам Елиуй нине кум йолташын вашмутым пуэн кертдымыштым ужын, тудын шыдыже ылыжын.
6 Елиуй, Вуз тукым Варахиил эрге, тыге каласен:
«Мый ийгот дене самырык улам,
а те кугурак ийготан улыда.
Сандене мый мом палымем
тыланда каласаш аптыраненам да лӱдынам.
7 Мый шоненам: ”Тек шоҥгылык ойла,
кугу ийгот мунлылыклан туныкта”.
8 Но айдемын кӧргыштыжӧ улшо шӱлыш,
Чылакучышын шӱлалтышыже уш-акылым пуа.
9 Кугу ийготан-влак веле огыл мунло улыт,
шоҥгыеҥ-шамыч гына огыл чын шонен моштат.
10 Сандене мый тыланда ойлем:
”Колыштса мыйым, мом палымем мыят каласем”.
11 Кунам те шомакым кычалда,
мый тендан мутдам вучышым,
шонымашдам колыштым.
12 Тендан ӱмбаке тӱткын ончышым,
но нигӧ тендан кокла гыч Иовым ӱчашен ыш сеҥе,
тудын мутшылан вашештен ыш керт.
13 Ида ойло: ”Ме мунлылыкым муынна” –
тудлан айдеме огыл, а Юмо вашештышаш.
14 Мылам огыл тудо шке мутшым ойлен,
мый гын тудлан тендан семын ом вашеште ыле.
15 Лӱдын шогалыныт нуно, тетла нимат огыт ойло,
шомакышт нунын пытен.
16 Мом мыламже вучаш, шып улыт гын нуно,
шогат гын тыште, нимом ойлыде?
17 Ойлаш шуын мыйын черетем,
мом палем – мыят луктын каласем.
18 Умшам мут-влак дене темын,
кӧргыштӧ шӱлышем ок пу мылам ласкалыкым,
19 кӧргем пуйто почдымо йошкар арака –
у шувыш семын кушкедалташ ямде.
20 Луктын каласем – мылам куштылгырак лиеш,
умшам почам да пуэм вашмутым.
21 Ик семын ончем мый айдеме ӱмбак,
нигӧлан йӧраш ом тӧчӧ,
22 вет мый тыге ыштен ом мошто,
а уке гын – мыйым пытара ыле мыйын Ыштышем!
Глава 32
