Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
10 Глава
1 «Молан Юмо мыйым тыге орландара?» 18 Иов Юмо деч йодеш: неле кидет ӱмбачем кораҥде.1 Йыгыжгенам мый илышем деч,
вуйшиймашлан эрыкым пуэм,
тӱҥалам ойлаш чон кочылыкем дене.
2 Юмылан каласем: мыйым титаканыш ит лук,
умылтаре, молан мый денем судитлалтат?
3 Келша мо Тылат шыгыремдылаш,
шке ыштыме айдемет деч кораҥаш,
а осал еҥ-влакын шонымыштым сайлан шотлаш?
4 Тыйын шинчат мемнан гай мо?
Айдеме семын ончет мо?
5 Тыйын илыме кечет-влак айдемын кечыж гай,
Тыйын иет-влак тудын ийже гай улыт мо?
6 Мом Тый титакем кычалат,
мыйын сулыкем муаш тӧчет?
7 Тый палет: мыйын титакем уке,
Тыйын кидет деч мыйым нигӧ ок утаре.
8 Тыйын кидет мыйым калыплен,
а кызыт Тый мыйым пытарынет?
9 Шарналте, кузе мыйым шун гыч ыштенат,
а кызыт угыч пуракыш савырынет?
10 Тый огыл мо мыйым шӧр семын йоктаренат,
вара торык семын нугыдемденат,
*а11 коваште ден шылым чиктенат,
лу да шӧн дене ушенат?
12 Тый мылам илышым пӧлекленат,
шке порылыкет ончыктенат,
чонем арален, мыйын верч тыршенат.
13 Но теве мом Тый шӱмыштет шылтенат –
палем, Тый тидым шонен пыштенат:
14 мый сулыкым ыштем гын, оролен шогет
да титаклан мут кучыктыде от кодо.
15 Титакан улам гын, ойго мыланем!
Чынле улам гынат, вуем ом керт нӧлталын:
мыйым намыс темдалын, орлык авалтен.
16 Вуем изишак нӧлталам гын,
лев семын ӱмбакем кержалтат –
угыч да угыч мылам Шкендым ӧрыктарышын ончыктет.
17 Мыйын ваштареш у таныклыше-влакым кондет,
шыдетым эшеат чот ылыжтет,
ик туткар почеш весым ӱмбакем колтет.
18 Ава мӱшкыр гыч мыйым молан луктынат?
Нигӧн шинчаже ужын шуктыде, лучо колаш ыле мылам!
19 О, мылам ош тӱням уждымо лияш ыле!
Ава мӱшкыр гыч вигак шӱгарыш наҥгайышт ыле!
20 Илышаш кечем шагал кодын –
тугеже кодо, мый дечем кораҥ,
пу мыланем кеч изишак куанаш
21 пычкемыш ден колымаш ӱмылын тӱняшкыже кайымем деч ончыч.
Тетла ом пӧртыл мый тушечын:
22 тӱп пычкемыш тӱня гыч, колымаш ӱмылын пычкемышыж гыч –
тушто нимогай шот уке, волгыдат пычкемыш дене иктак».
*а10:10 Тыште ава мӱшкырыштӧ айдемын ышталтмыж нерген ойлалтеш.
Глава 10
