Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
11 Глава
Софарын икымше шомакше:1 «Шуко шомакет дене тый шкендым чыныш от лук». 13 «Осал пашат деч кораҥ, тунам Юмо деч суапым налат».1 Тунам Наама гыч Софар тыге вашештен:
2 «Шуко шомаклан вашмут пуыде кодшаш мо?
Шуко кутырышо еҥ чыныш лектеш мо?
3 Яра ойлыштмет моло еҥын умшаштым петырышаш мо?
Тый игылтат гын, тыйым нигӧлан шылталаш мо?
4 Тый каласышыч: ”Мыйын туныктымем чын,
Юмо ончылно яндар улам”.
5 Но Юмо тылат вашешта ыле гын,
тылат каласаш шке умшажым почеш
6 да мунлылыкын тайныж-влакым ончыкта ыле гын!
Вет нуным тӱрлӧ семын умылаш лиеш!
Пален шого, Юмо тылат чыла сулыкетым эше огешат шарныктаре.
7 Кертат мо шымлымаш гоч Юмым муын?
Чылакучышын кугулыкшым кертат мо пален налын?
8 Тудын кугулыкшо кава деч кӱшнырак, тушкыжо шуат мо?
Тудо мланде пундаш деч келгырак, тудым шымлен кертат мо?
9 Тудын кутышыжо мланде деч кугурак,
теҥыз деч лопкарак.
10 Тудо мия, казаматыш петыра да судыш конда гын,
кӧ Тудым чара?
11 Шояк еҥ-влакым Тудо пала
да осал ыштымым ужеш –
тидым Тудо тыгак ок кодо.
12 Кузе ир осёл айдемыш ок савырне,
тыгак ораде еҥ ушым ок керт шынден.
13 Но Юмо дек шӱметым савырет
да Тудын дек кидетым шуялтет гын,
14 осал пашат деч кораҥат,
омашыштет тудлан верым от пу гын,
15 тый вожылде шинчатым нӧлталат,
лӱдде, пеҥгыдын шогаш тӱҥалат.
16 Тунам тый шке ойгет мондет,
йоген кайыше вӱд семын гына шарналтет.
17 Илышет кечывал кече деч волгыдо лиеш,
пычкемышетым эр ӱжара волгалтара.
18 Тый от лӱд, вет уло ӱшан,
тый авырен налме улат – лиеш малаш ласкан.
19 Кияш тӱҥалат – ок лий тыйым лӱдыктышӧ,
поро кумылетым шукын тӱҥалыт кычалаш.
20 А титакан-влакым пычкемыш авалта,
вер ок лий нунылан шылашышт,
нунын ик ӱшанышт кодын, тиде – колымаш».
Глава 11
