Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
9 Глава
Иовын кумшо шомакше:1 Кузе айдеме шкенжым Юмо ончылно чыныш луктеш? 14 Иов пала: Юмылан вашмутым тудо пуэн ок керт. 25 Юмо ден Иов коклам судитлыше нигӧ уке.1 Иов тидлан тыге каласен:
2 «Чын, тиде тыгак – мый палем.
Но кузе айдеме шкенжым Юмо ончылно чыныш луктеш?
3 Тудо Юмо дене судитлалташ шонен пышта гын,
тӱжем йодыш гыч иктыжланат вашештен ок керт.
4 Юмо – мунло, вий-куатан.
Кӧ ваштарешыже шогалын да эҥгекыш логалын огыл?
5 Тудо курык-влакым верышт гыч вучыдымын кораҥда,
шке шыдыж дене нуным савыркала.
6 Юмо мландым верже гыч тарвата,
да тудын негыз меҥгыже-влак чытырнат.
7 Юмо кечылан кӱшта, да тудыжо ок лек,
шӱдыр волгыдым печать дене петыра.
8 Тудо шкетын кавам шарен
да теҥыз толкын ӱмбалне коштеш.
9 Тудо Коркашӱдырым, Вӱдварашӱдырым, Шоктешӱдырым
да кечывалвел шӱдыр-влакым ыштен.
10 Юмын пашаже кугу, умылаш лийдыме улыт,
ӧрыктарыше пашажым шотлен пытараш ок лий!
11 Эртен кая Тудо ончычем, а мый Тудым ом уж,
кая воктечем, а мый Тудым ом шеклане.
12 Юмо поген налеш гын, Тудым кӧ чара?
Кӧ Тудлан каласа: ”Мом Тый ыштылат?”
13 Шке шыдыжым Юмо ок кораҥде,
Раавлан
*а служитлыше-влак Тудын ончылно камвозыт.
14 Мом мый Тудлан вашештен кертам,
Тудын ончылно могай шомакым муам?
15 Тек чын улам, но вашешташ ом тӱҥал –
Судьям мый декем поро лийже манын сӧрвалем.
16 Судитлалташ ӱжмемлан Тудо вашешта гынат,
йӱкемым колмыжлан ом ӱшане ыле,
17 вет Тудо тӱтан мардеж семын ӱмбакем кержалтеш
да титакем уке ӱмбач сусырем шукемда,
18 ок пу мылам шӱлышым налаш,
ойго-орлык дене мыйым тема.
19 Вий дене таҥасаш гын, Тудо куатан!
Тудын дене судитлалташ гын, кӧ мемнам судыш конда?
20 Мый чын улам гынат, шке йылмемак мыйым титакла ыле,
титакдыме улам гынат, Тудо мыйым титаканыш луктеш ыле.
21 Уке мыйын титакем,
но мый денем мо лиеш – кызыт мыланем садак,
йыгыжге лийын мылам илышем.
22 Чылажат мылам садак! Садлан тыге каласем:
Тудо титакдыме еҥымат, осал еҥымат пытара.
23 Кунам вучыдымын толшо туткар колымашым конда,
титакдыме-влакын орлыкыштлан Тудо воштылеш гына.
24 Осал еҥ-шамычын кидышкышт пуалтын мланде,
судья-влакын шинчаштым Тудо петыра.
Тудо огыл гын, кӧ тыге ышта?
25 Илыме кечем-влак торйол деч писынрак куржыт –
чоҥештат нуно, сайым ужде,
26 куштылго пуш семын писын каят,
кучышаш янлык ӱмбак керылтше куткыж семын чоҥештат.
27 Каласем гын тыге: ”Мондем чыла вуйшиймемым
да, шӱлык чурийым коден, шыргыжалам”,
28 садак лӱдам шке орлыкем деч, вет палем –
титакдымылан мыйым Тый от шотло.
29 Садак лектам вет титаканыш,
молан тугеже мыланем тыршаш арам?
30 Лум вӱд дене мушкылтам
да конвӱд дене кидем мушкам гынат,
31 Тый мыйым тунамат лавыраш чыкет –
мый дечем эсогыл шке вургемем йырна.
32 Вет Юмо мыйын семын айдеме огыл –
ом керт мый Тудын ончылно шкемым арален
да Тудын дене пырля судыш каен!
33 Уке мемнан коклам судитлыше,
кӧ кидшым когыньнан ӱмбак пышта ыле.
34 Тек Юмо ӱмбачем тояжым кораҥда,
тек Тудын колтымо шучкылыкшо тетла ок лӱдыктӧ.
35 Тунам, Тудын деч лӱдде, ойлем ыле,
но кызыт тидым мый ом керт ыштен.
*а9:13 Раав – мифысе теҥыз янлык, тудо осал вийым да пытымашым ончыкта.
Глава 9
