Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
8 Глава
Вилдадын икымше шомакше:1 Иов Юмо деч полышым йодшаш. 8 Акрет годымак паленыт: сулыкым ыштымаш орлыкым конда. 20 Чын ыштыше еҥ деч Юмо ок кораҥ.1 Тунам Савхей гыч Вилдад тыге каласен:
2 «Мыняр эше тыге ойлаш тӱҥалат?
Тыйын мутет кожга мардеж гай!
3 Юмо чын ок судитле мо,
Чылакучышо чынлыкым вестӱрлемда мо?
4 Эргыч-влак Тудын ончылно сулыкыш пуреныт гын,
Тудо нунылан титакышт дене келшышын пӧртылтен.
5 Но тый Юмым кычалат,
Чылакучышым серлагаш йодат гын,
6 ару да чын ыштыше улат гын,
Тудо тылат кӧра кынел шогалеш
да пӧрт ден ешетым пӧртылта.
7 Мо тыйын ончыч лийын, шагалла чучеш,
кунам тылат варажым пеш шуко пуымо лиеш.
8 Ончычсо тукымла деч йодышт,
умыло – мом ача-кочашт пален налыныт,
9 вет ме теҥгече гына шочынна да нимом огына шинче,
мландымбалне илыме кечына-влак ӱмыл семын йомыт.
10 Нуно тыйым туныктат, тылат ойлат,
ушан шомакым тыланет каласат.
11 Нӧлталтеш мо омыж тушто, кушто вӱдыжгӧ уке?
Кушкеш мо вӱдвондо вӱд дечын посна?
12 Тудо эше нӧргӧ да пӱчмӧ огыл,
но чыла шудо деч ончыч кошка.
13 Тыгай корно вуча тудым, кӧ Юмым монден,
тыге Юмым шотлыдымо-влакын ӱшанышт пыта.
14 Молан тудо инанен ила – ӱшанле огыл,
молан ӱшанен ила – эҥыремышвот дене иктак.
15 Шке пӧртшӧ дек эҥертен шогалеш – тудыжо ок чыте,
пӧртшым руалтен куча – тудыжо сӱмырла.
16 Кече йымалне тудо тӱзлана,
игыже-влак пакча мучко шарлат,
17 кӱ ораште вожшо пуналтеш,
кӱ коклашке шеҥын пура.
18 Но кунам тудым верже гыч кӱрлын луктыт,
лийме верже тудын деч шӧрла: ”Мый тыйым ом пале”.
19 Теве тудын илыш-корныжын куанже!
А мланде гыч весе-влак шытен лектыт.
20 Кузе ужат, шылталаш амалдыме еҥ деч Юмо ок кораҥ,
а осал айдемылан Тудо ок полшо.
21 Тудо умшатым эше воштылмаш дене тема,
йылметым – куанен кычкырымаш дене.
22 Тыйым ужмышудымо-влак намысыш пурат,
осал еҥ-влакын омашышт тетла огыт лий».
Глава 8
