Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
7 Глава
1 Иов неле илышлан вуйым шиеш. 9 Айдемын илышыже писын эрта. 17 Иов Юмым ӱмбачше кидшым кораҥдаш йодеш.1 Мландымбалне айдемын пӱрымашыже неле паша огыл мо?
Тудын кечыже-влак тарзын кечыж дене иктак огытыл мо?
2 Кул семын тудо шокшышто ӱмылым кычалеш,
тарзе семын пашадарым вуча.
3 Тыгак мыламат арам эртыше тылзе-влак пӱралтыныт,
орлыкан йӱд-шамыч мыланем пуалтыныт.
4 Вочмем годым шонем: ”Кунам кынелам?”
А йӱдшӧ пеш кужун шуйна,
волгыжмешке, мый верыштем пӧрдалам.
5 Капем шукш да лавыра дене леведалтын,
коваштем шелышталтын, тушеч шӱйшӧ йога.
6 Мыйын кечем-влак куымо шуша
*а деч писын куржыт,
ӱшан деч посна мучашке лишемыт.
7 Шарналте: мыйын илышем – шӱлалтыш дене иктак,
шинчамже тетла огеш уж сайым.
8 Мыйым кызыт ужшо-влак варажым огыт уж,
ӱмбакем Тый ончалат, а мый уке улам.
9 Пыл шулен пыта да йомеш,
тыгак айдеме вес тӱняш кая да ок пӧртыл,
10 тетла ок тол тудо шке пӧртышкыжӧ,
лийме верже тудым палаш ок тӱҥал.
11 Сандене мый умшам ом петыре –
чон шыгырлыкем дене мутем каласем,
чон кочылыкем дене вуйым шиям.
12 Молан Тый мыйым оролымаште кучет –
мый теҥыз але теҥызысе шучко янлык улам мо?
13 Кунам шоналтем: ”Мыйым вакшышем лыпландара,
кийыме верыштем ойго-орлыкем лушка”,
14 Тый омо гоч мыйым лӱдыктет,
кончымаш гоч мылам шучкылыкым колтет.
15 Лучо мылам пичкаяш ыле,
лулеге ората кодмешке, лучо колаш ыле!
16 Йыгыжге лийын мылам илыш,
вет мый садак ом иле курымеш!
Кодо мыйым, вет кечем-влак шӱлалтыш семын писын эртат!
17 Мо тугай айдеме?
А Тый тудым тынар аклет,
тудын ӱмбак тӱткышет ойырет,
18 кажне эрдене тудым эскерет,
кажне татыште тудым тергет.
19 Молан Тый мыйым от кодо, молан от кораҥ мый дечем,
от пу нелаш эсогыл шӱвылвӱдымат?
20 Мый сулыкым ыштенам гын,
мом Тылат ыштен кертынам, айдеме тукымым оролышо?
Молан Тый пикшетым ӱмбакем виктаренат?
Мый шкеат шкаланем уто нелытыш савырненам.
21 Молан Тый сулыкем от кудалте,
молан титакем от кораҥде?
Вашке мый мландыш возам –
мыйым кычалаш тӱҥалат, а мый уке лиям».
*а7:6 Шуша – челнок.
Глава 7
