Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
4 Глава
Елифазын икымше шомакше:1 Иов дене мо лиймым лончылымаш. 12 Юмо ончылно чын ыштыше айдеме уке.1 Тидлан Феман гыч Елифаз тыге вашештен:
2 «Тылат шке шомакнам каласен ончена гын,
нелеш от нал мыланна?
Но ойлышаш шомакым кӧ кучен кертеш?
3 Тый шуко еҥым чын корныш шогалтенат,
ӱнардыме-влаклан полшенат,
4 камвочшым шомакет дене кынелтенат,
чытырыше пулвуйым пеҥгыдемденат.
5 А ынде тиде орлык тыйым авалтен – кертдыме лийынат,
тудо тый декет тӱкнен – тый лунчыргенат.
6 Юмо деч лӱдын илымет огыл мо тылат инанымашым пуа,
чыным ыштен илымет – ӱшанен вучымашым?
7 Шарналте-ян, пытен мо иктаж-кӧ титакдыме,
да кунам чын ыштыше-влак дене лийын азап?
8 Мый ужынам: кӧ чындымылыкым куралеш
да осалым ӱда – тидымак тӱредеш.
9 Юмын шӱлалтышыж деч тудо пыта,
Тудын шыдыжын пуалмыж деч йомеш.
10 Тек лев-шамыч кугу йӱкын ырлат,
но самырык лев-влакын пӱйышт пудырга.
11 Нимом кучен ок керт гын, патыр лев кола,
ава левын игыже-влак шаланен пытат.
12 Теве мый декем шомак шолып тольо,
пылышем шып ойлымым кольо
13 йӱдым коляндарыше омым ужмо годым,
кунам еҥ-влакым омо темда –
14 шучкылык ден ӧрткымаш мыйым авалтышт,
уло капем чытыраш тӱҥале.
15 Чурием шӱлалтышым шиже,
да тидын деч ӱпем шогале.
16 Теве тудо воктекем шогале,
но мый раш шым уж тудын сынжым–
шинчамлан ӱжака
*а веле койо,
да шып-тымыкыште мый йӱкым кольым:
17 ”Лийын кертеш мо айдеме Юмо ончылно чын ыштыше?
Лийын кертеш мо тудо шке Ыштышыже ончылно яндар?”
*б18 Тудо шке тарзыж-шамычланат ок инане
да Суксыж-влакынат ситыдымашыштым ужеш гын,
19 тугеже шун пӧртыштӧ илыше-влак нергенже мом ойлаш?
*в Негызышт нунын пурак,
когарш семын нуным лиеш темдалаш.
20 Эрдене илат, а каслан пытат –
курымешлан йоммыштым нигӧ ок шеклане.
21 Омашым кучышо кандырашт кӱрлмӧ лийыт,
ушым поген ситарыдеак, нуно колат.
*а4:16 Ӱжака – образ, облик.
*б4:17 Тиде верым вес семынат кусараш лиеш: «Лийын кертеш мо айдеме Юмо деч утларак чын ыштыше? Лийын кертеш мо айдеме шке Ыштышыж деч яндаррак?»
*в4:19 Тыште айдеме капын мланде гыч ышталтмыж нерген ойлалтеш.
Глава 4
