Выбрать язык
Книги Ветхого Завета
Книги Нового Завета
с русским текстом1 Тудо кечын калыклан Моисейын книгаж гыч лудыныт да тыге возымым муыныт: «Аммон ден моав-влак нигунам Юмын калыкше деке ушнен огыт керт,2 вет нуно израиль эрге-влакым кинде денат, вӱд денат вашлийын огытыл да Израильым каргашлан Валаамым тарленыт. Но Юмына ты каргымашым суапландарымашыш савырен».3 Тиде законым колын, израиль еҥ-влак шке коклашт гыч чыла йот тукымым кораҥденыт.
4 А тидын деч ончыч иерей Елиашивым мемнан Юмынан пӧртшӧ пеленысе клат пӧлем-влакым ончаш шогалтеныт. Елиашив Товийын лишыл родыжо лийын5 да тушто тудлан кугу пӧлемым ойырен. Ожно тушто кинде надырым, ладыным, арверым араленыт, тушко тыгак шурнын, йошкар аракан да ӱйын луымшо ужашыштым конденыт – нуным левит, мурызо, капка орол-влаклан закон почеш пуышаш улыт улмаш – да иерей-влаклан кондымо пӧлекым оптеныт.
6 Кунам чыла тиде ышталтын, мый Иерусалимыште лийын омыл, вет Вавилон кугыжа Артаксерксын вуйлатыме кумло кокымшо ийынже*а кугыжа деке миенам. Тушто икмыняр жап лиймеке, мый кугыжа деч адакат каяш йодым.7 Кунам мый Иерусалимыш пӧртыльым, уда паша нерген пален нальым: Юмын пӧртын кудывечыштыже Елиашив Товийлан пӧлемым пуэн.8 Мый пеш чот шыдешкышым: Товийын чыла погыжым тӱжваке луктын кудалтышым9 да, пӧлем-влакым эрыктен, тушко адакат Юмын пӧртын арвержым шындаш, кинде надырым да ладыным кондаш кӱштышым.
10 Эше тидымат пален нальым: пуышаш пайым левит-влаклан огыт кондо, сандене храмыште служитлыше левит ден мурызо-влак чыланат шке пасушкышт куржын пытеныт.11 Тунам мый вуйлатыше-влаклан шылтален каласышым: «Молан Юмын пӧртым коден кайыме?» Кайыше-влакым мый угыч погышым да шке верышкышт пӧртылтышым.12 Чыла иудей-влак шурнын, йошкар аракан да ӱйын луымшо ужашыштым клатыш кондаш тӱҥальыч.13 Клат-влакым ончаш мый иерей Шелемийым, закон туныктышо Садокым, левит-влак кокла гыч Федаийым, а нунын пелен Матфанийын Заккур эргыжын Ханан эргыжым шогалтышым: нуным ӱшанлылан шотленыт. Шке тукым иза-шольыштлан пайым шеледаш нунылан ӱшаныме.
14 Юмем, шарналте мыйым чыла тидым ыштымемлан! Юмемын пӧртшылан да тушто служитлыме пашалан тыршымем ит мондо!
15 Тудо жапыште мый Иуда мландыште теве мом ужым: шуматкечын виноградым темдыме верыште тыршат, шурным шупшыктат, осёл тупеш йошкар аракам, виноградым, смоквам, тыгак молымат пӧштыртат да шуматкечынак Иерусалимыш шупшыктат. Тиде кечын кочкыш йӧрварым ынышт ужале манын, мый нуным пеҥгыдын шылталышым.16 Иуда мландыште Тир ола гычат еҥ-влак иленыт. Нуно колым, тӱрлӧ сатум кондеденыт да шуматкечын Иуда мландыште да Иерусалимыште илыше-влаклан ужаленыт.17 Мый Иуда тукымысо лӱмлӧ еҥ-влаклан шылтален каласышым: «Молан те тыгай осалым ыштеда да шуматкечым шакшыледа?18 Тендан ача-кочадат тыгак ыштен огытыл мо? Тунам Юмына мемнан ӱмбак да тиде ола ӱмбак чыла тиде ойгым конден! А те, шуматкечым шакшылен, Израиль ӱмбаке Юмын шыдыжым эшеат чот ылыжтеда!»
19 Вара шуматкече деч ончыч, рӱмбалгаш тӱҥалмеке, Иерусалим капкам тӱкылаш да шуматкече эртымешке петырымаште кучаш кӱштышым. Шуматкечын капка гоч нимогай нумалтышат ынже эрте манын, тушко шке еҥем-влакым шогалтышым.20 Тӱрлӧ сатум ужалыше купеч ден торгайыше-влак Иерусалим ола воктене ик-кок гана йӱдым эртарышт.21 Но мый нунылан пеҥгыдын шижтарен каласышым: «Молан те пырдыж воктелан малаш кодыда? Вес ганат тыге ыштеда гын, мыланем вийым кучылташ логалеш». Тиддеч вара нуно шуматкечын толын огытыл.22 Шуматкечым святой кече семын арален кодаш манын, мый левит-влаклан эрныкталташ да капкам оролаш каяш каласышым.
Юмем, тидланат мыйым шарналте да кугу порылыкетлан кӧра чаманен кодо!
23 Тиде кечылаштак мый азот, аммон да моав ӱдыр-влакым марлан налше иудей-влакым ужым.24 Нунын йочашт гыч пелыже азот йылме але вес калык йылме дене ойлат, а иудейла кутырен огыт мошто.25 Тидлан нине пӧръеҥ-влакым шылталышым, эсогыл каргышым, южыжым кырышым, ӱпыштымат кӱрым. Шке ӱдырыштым йот калык эрге-влаклан марлан ынышт пу, а шке эргыштлан да шкаланышт йот ӱдырым ынышт нал манын, нуным Юмын ончылно товатлен ойлыктышым. Мый нунылан каласышым:26 «Йот калык ӱдыр-влакым марлан налмыжлан огыл мо Израильын Соломон кугыжаже сулыкыш пурен? Тыгай кугыжаже шуко калыкынак лийын огыл. Тудым Юмо йӧратен да пӱтынь Израильын кугыжажлан шогалтен. Но йот калыкла гыч налме ватыже-влак тудымат сулыкыш пуртеныт.27 Те пеш кугу осалым ыштеда – йот калык ӱдыр-влакым марлан налын, Юмын ончылно сулыкыш пуреда! Тыгайым тендан нерген ме колшаш улына мо?»
28 Кугу иерей Елиашивын Иоиада эргыжын эргыж-влак кокла гыч иктыже Хорон гыч улшо Санаваллатын веҥыже лийын. Мый тудым шке дечем поктен колтышым.
29 Нуно иерейлан служитлымашымат, Юмын иерей да левит-влак дене ыштыме ойпидышыжымат шӱктареныт. Тидым ит мондо, Юмем!
30 Тыге мый нуным чыла йот калыкысе деч эрыктышым. Кажне иерей ден левитлан ыштышаш пашаштым палемдышым.31 Тыгак пум да лектышын икымше саскажым кондымо жапым палемдышым.
Юмем, мыйым порын шарналте!
*а 13:6 Тиде Хр. шоч. д.о. 433-шо ий лийын.
Глава 13