Выбрать язык
Книги Ветхого Завета
Книги Нового Завета
с русским текстом1 Калык вуйлатыше-влак Иерусалимыште илаш тӱҥалыныт. Молышт шеревам кудалтеныт: калыкын ик луымшо ужашыже святой Иерусалим олаште, а индеш ужашыже моло олалаште илышаш улмаш.2 Иерусалимыш шке кумылын илаш куснышо еҥ-влаклан калык Юмын суапшым тыланен.
3 Теве Иерусалимыште илыше кундем вуйлатыше-влак. Иудан моло олаштыже гын израильтян-влак, иерей ден левит-шамыч, храм полышкалыше-влак да Соломонын тарзыже-влакын урлыкышт иленыт – кажныже шке тукым мландыштыже, шке олаштыже лийын.
4 Иерусалимыште Иуда тукым да Вениамин тукым еҥ-влак иленыт.
Иуда тукым гыч: Афаий, Уззийын эргыже – Уззийже Захарийын эргыже, тудыжо Амарийын, тудыжо Сафатийын, тудыжо Фарес урлык гыч улшо Малелеилын эргыже лийын –5 да Маасей, Варухын эргыже – Варухшо Колхозейын эргыже, тудыжо Хазаийын эргыже, тудыжо Адайын, тудыжо Иояривын, тудыжо Захарийын, тудыжо Шилонын эргыже.6 Иерусалимыште Фарес урлык гыч чылаже нылшӱдӧ кудло кандаш еҥ илен – нуно тале сарзе лийыныт.
7 Вениамин тукым гыч: Саллу, Мешулламын эргыже – Мешулламже Иоедын эргыже, тудыжо Федаийын, тудыжо Колайын, тудыжо Маасейын, тудыжо Ифиилын, тудыжо Исаийын эргыже лийын –8 тудын деч вара Габбай ден Саллай, чылаже индешшӱдӧ коло кандаш еҥ.9 Иоиль, Зихри эрге, нунын вуйлатышышт лийын, а Иуда, Сенуй эрге, олам вуйлатымаште кокымшо еҥ лийын.
10 Иерей-влак гыч: Иедай, Иояривын эргыже, Яхин,11 Сераий, Юмын пӧртым вуйлатыше, Хелкийын эргыже – Хелкийже Мешулламын эргыже, тудыжо Садокын, тудыжо Мераиофын, тудыжо Ахитувын эргыже лийын,12 да нунын тукым иза-шольышт, Юмын пӧртыштӧ служитлыше-влак – чылаже кандашшӱдӧ коло кок еҥ. Эше Адай, Иерохамын эргыже – Иерохамже Фелалийын эргыже, тудыжо Амцийын, тудыжо Захарийын, тудыжо Пашхурын, тудыжо Малхийын эргыже,13 тыгак тудын тукымвуй иза-шольыжо-влак, чылаже кокшӱдӧ нылле кок еҥ. Умбакыже Амашсай, Азариилын эргыже – Азариилже Ахзайын эргыже, тудыжо Мешиллемофын, тудыжо Иммерын эргыже лийын,14 да тудын тукым иза-шольыжо-влак, тале сарзе-шамыч, чылаже шӱдӧ коло кандаш еҥ. Нунын вуйлатышышт Завдиил, Гагедолим эрге, лийын.
15 Левит-влак гыч: Шемай, Хашувын эргыже – Хашувшо Азрикамын эргыже, тудыжо Хашавийын, тудыжо Вуннийын эргыже лийын,16 Шавтай ден Иозавад, нуно левит вуйлатыше кокла гыч лийыныт да Юмын пӧртын тӱжвал пашажлан вуйын шогеныт,17 да Матфаний, кумалме годым тӱҥ чапмурызо, Михан эргыже – Михаже Завдийын эргыже, тудыжо Асафын эргыже – да Бакбукий, кокымшо чапмурызо, эше Авда, Шаммуйын эргыже – Шаммуйжо Галалын эргыже, тудыжо Идифунын эргыже лийын.18 Святой олаште левит-влак чылаже кокшӱдӧ кандашле нылытын лийыныт.
19 Капка орол-влак: Аккув, Талмон да нунын тукым иза-шольышт – шӱдӧ шымле кок еҥ.
20 Моло израильтян-влак, иерей ден левит-шамыч Иудан вес олалаштыже, кажныже шке тукым мландыштыже, иленыт.21 Храм полышкалыше-влак Офелыште иленыт, нунын вуйлатышышт Циха ден Гишфа лийыныт.22 Иерусалимысе левит-влакын вуйлатышышт Уззий, Ванийын эргыже, лийын – Ванийже Хашавийын эргыже, тудыжо Матфанийын, тудыжо Михан эргыже лийын. Уззий Асаф урлык гыч лийын, тиде урлык еҥ-влак Юмын пӧртыштӧ служитлыме годым мурымылан вуйын шогеныт.23 Нунын шотышто кугыжа посна кӱштымашым пуэн, нунылан кажне кечын илашышт мыняр пуаш кӱлеш – палемдыме лийын.24 Петахий, Зерах урлык гыч Мешезавелын эргыже – Зерахше Иудан эргыже лийын – калык дене кылдалтше йодышлаште кугыжан ӱшанъеҥже лийын.
25 Теве пасу дене авырыме ял-влак, кушто Иуда тукым еҥ-шамыч иленыт: Кириаф-Арба да тудын йыр улшо илем-влак, Дивон да тудын йыр улшо илем-влак, Иекавцеил да тудын йыр улшо илем-влак,26 Иешуй, Молада да Беф-Палет,27 Хацар-Шуал, Вирсавий да тудын йыр улшо илем-влак,28 Секелаг, Мехона да тудын йыр улшо илем-влак,29 Ен-Риммон, Цора да Иармуф,30 Заноах, Одоллам да нунын йырысе илем-влак, Лахис да тудын пасужо-влак, Азека да тудын йыр улшо илем-влак. Иуда тукым еҥ-влак Вирсавий гыч Енном лапвер марте иленыт.
31 Вениамин тукым еҥ-влакын илыме верышт: Гева, Михмас, Гай, Вефиль да тудын йыр улшо илем-влак,32 Анафоф, Нов, Ананий,33 Гацор, Рама, Гиффаим,34 Хадид, Цевоим, Неваллат,35 Лод, Оно, тыгак Харашим лапвер.36 Иудан южо левит тӱшкаже Вениамин тукым мландышке илаш куснен улмаш.
Глава 11