Выбрать язык
Книги Ветхого Завета
Книги Нового Завета
с русским текстом1 Ровоам Сихемыш каен. Тудым кугыжам ышташ манын, тушко чыла израильтян-влак погыненыт улмаш.2 Тидын нерген Иеровоам, Нават эрге, колын да Египет гыч пӧртылын – тушкыжо тудо Соломон кугыжа деч куржын улмаш.3 Иеровоамым ӱжаш колтеныт. Тудо уло израиль калык дене Ровоам деке толын, да нуно Ровоамлан каласеныт:4 «Тыйын ачат мемнан ӱмбак неле нумалтышым пыштен. Но тый ынде неле пашанам, мемнан ӱмбак пыштыме нумалтышым куштылемде – тунам ме тыланет служитлаш тӱҥалына».5 Ровоам нунылан вашештен: «Кум кече гыч мый декем угыч толза». Калык каен.
6 Ровоам кугыжа Соломон ачажын илымыж годым тудлан служитлыше кугурак-влак деч каҥашым йодын: «Тиде калыклан кузе вашешташ, те мом темледа?»7 Нунышт каласеныт: «Тый [кызыт] тиде калык дене сай лият, нунылан келшышын ыштет да порын вашештет гын, нуно ӱмырышт мучко тыйын тарзет лийыт».8 Но Ровоам кугурак-влакын ойыштым шотыш налын огыл, каҥашым тудын дене пырля кушшо, тудлан служитлыше самырык еҥ-шамыч деч йодын:9 «Тиде калыклан кузе вашешташ, те мом каласеда? ”Ачатын мемнан ӱмбак пыштыме нумалтышыжым куштылемде” манын, нуно мый дечем йодыт».10 Ровоам дене пырля кушшо самырык еҥ-влак вашештеныт: «”Ачат мемнан ӱмбак неле нумалтышым пыштен, тудым куштылемде” манын ойлышо калыклан тыге каласе: ”Мыйын казаварням ачамын кыдалже деч кӱжгырак.11 Ачам тендан ӱмбак неле нумалтышым пыштен, а мый тудым эшеат нелыракым ыштем. Ачам тендам лупш дене кырен, а мый тендам иман лупш дене кыраш тӱҥалам”».
12 Кум кече гыч Иеровоам да уло калык Ровоам дек толыныт. Вет кугыжа нунылан кӱштен улмаш: «Мый декем кум кече гыч толза».13 Ровоам нунылан торжан вашештен. Тудо кугурак-влакын каҥашыштым шотыш налын огыл, самырык-влакын ойышт почеш тыге каласен:14 «Ачам тендан ӱмбак неле нумалтышым пыштен, а мый тудым эшеат нелемдем. Ачам тендам лупш дене кырен, а мый тендам иман лупш дене кыраш тӱҥалам».15 Тыге кугыжа калыкым колыштын огыл. Мом Господь Силом гыч улшо Ахий гоч Нават эрге Иеровоамлан каласен, тиде шомак шукталтше манын, Юмо тыге ыштен.
16 Израильтян-влак ужыныт: кугыжа нуным колыштын огыл. Тунам нуно Ровоамлан каласеныт: «Давид дене мемнан пашана уке, Иессей эрге дене мемнан пайна уке! Израильтян-влак, мӧҥгыда, шке омашышкыда кайыза! Давид тукым, шке тукымет дене озалане!» Израильтян-шамыч шке мӧҥгышкышт каеныт.17 Ровоамын кид йымалныже Иуда тукым олалаште илыше израильтян-влак гына кодыныт.18 Ровоам кугыжа Израиль эрге-влак деке Адонирамым, ӧкым паша вуйлатышым, колтен, но нунышт тудым кӱм кышкен пуштыныт. Кугыжа писын орвашке кӱзен да Иерусалимыш кудалын утлен.19 Тидын деч вара Израиль Давидын тукымжо ваштареш шогаш тӱҥалын. Таче кечынат тыгак кодын.
Глава 10