Выбрать язык
Книги Ветхого Завета
Книги Нового Завета
с русским текстом1 Саван ӱдырамаш кугыжаже, Соломонын чапше нерген колмеке, тудым неле йодыш-влак дене тергаш миен. Тудо Иерусалимыш пеш кугу поянлык дене толын: верблюд-влак ӱмбалан тамлыпушым лукшо настам, пеш шуко шӧртньӧ ден шергакан кӱм конден. Ӱдырамаш кугыжа Соломон дек толын да шонен коштмо чыла йодышыжо шотышто тудын дене кутырен.2 Соломон тудын чыла йодышыжлан вашмутым пуэн: вет кугыжалан палыдыме да умылтарен кертдыме нимоат лийын огыл.3 Саван ӱдырамаш кугыжаже Соломонын мунлылыкшым, чоҥымо пӧртшым,4 ӱстелысе кочкышыжым, тарзыже-влакын илыме верыштым, тарзыланымыштым, вургемыштым, аракатемкалыше-влакым да нунын чиемыштым, Господьын храмышкыже кӱзымӧ тошкалтышыжым ужын. Ӱдырамаш кугыжа шкенжым тетла кучен кертын огыл,5 тудо Соломонлан каласен: «Мом мый тыйын ыштымет да мунлылыкет нерген шке мландыштем колынам – чыла чын.6 Мом колмемлан мый ӱшанен омыл. Но ынде толынам да шке шинчам дене ужам – мылам тыйын мунлылыкет гыч пелыжымат каласен огытыл. Мом колмем деч тый эшеат кӱшнӧ улат!7 Пиалан улыт тыйын еҥет-влак, пиалан улыт тарзет-шамыч – нуно эре тыйын ончылнет улыт да мунло шомакетым колыт!8 Моктымо лийже тыйын Господь Юмет! Тудо шке поро кумылжо почеш тыйым Израильын престолышкыжо шынден да, Господь Юметлан служитле манын, тыйым кугыжам ыштен. Тыйын Юмет Израильым йӧрата да тудым курымешлан пеҥгыдемдынеже, сандене Тудо чын суд ден чынлыкым ышташ тудын кугыжажлан тыйым шогалтен!»9 Тудо кугыжалан шӱдӧ коло талант шӧртньым, тыгак пеш шуко тамлыпушан наста ден шергакан кӱм пӧлеклен. Саван ӱдырамаш кугыжажын пӧлеклыме гай тамлыпушан наста Соломонын эше нигунам лийын огыл.
10 Хирамын да Соломонын Офир гыч шӧртньым кондышо тарзыже-влак тыгак йошкар пушеҥге ден шергакан кӱ-влакым конден шогеныт.11 Кугыжа тиде йошкар пушеҥге дене Господьын храмже ден кугыжан пӧртлан тошкалтышым, мурызо-шамычлан кӱсле ден арфым ыштен. Иуда мландыште тыгайже нигунамат ужалтын огыл улмаш.12 Соломонат Саван ӱдырамаш кугыжажлан тудын мом налаш шонымыжым да мом йодмыжым чыла пуэн, тудын кондымо пӧлекше деч шукырак пӧлеклен. Тидын деч вара ӱдырамаш кугыжа тарзыж-влак дене шке мландышкыже каен.
13 Кажне ийын Соломонлан кудшӱдӧ кудло куд талант шӧртньым конден шогеныт.14 Тидын деч посна тудлан сатучо ден купеч-влак тӱленыт, тыгак Аравийысе чыла кугыжа да кундемтӧра-влак шӧртньӧ ден шийым пуэныт.15 Соломон кугыжа таптыме шӧртньӧ дене кокшӱдӧ кугу авыртышым ыштен. Кажныжлан кудшӱдӧ сикль каен.16 Таптыме шӧртньӧ дене тыгак изирак кумшӱдӧ авыртышым ыштен. Кажныжлан кумшӱдӧ сикль шӧртньым кучылтын. Нуным Соломон Ливанысе кедр дене ыштыме полатыш шогалтен.17 Эше кугыжа слон лу дене кугу престолым ыштен да яндар шӧртньӧ дене комыжлен.18 Тудын куд тошкалтышыже лийын, а йолым шындыме вержым шӧртньӧ дене ыштен да престол деке пеҥгыдемден. Шинчыме верын кок могырыштыжат кынервуй эҥертыш лийын, нунын воктене кок лев шоген.19 Тыгак кажне тошкалтышын кок велныже ик лев дене шоген – чылаже латкокыт. Тыгай [престол] нимогай кугыжанышыште лийын огыл.20 Соломонын йӱмӧ чыла атыже шӧртньӧ дене ыштыме улмаш. Тыгак Ливанысе кедр дене ыштыме полатыштат чыла ате-ӱзгар шӧртньӧ лийын, а ший Соломон илыме жапыште аклалтын огыл.21 Кугыжан корабльже-влак Хирамын еҥже-шамыч дене пырля Фарсисыш коштыныт. Корабль-влак кум ийлан ик гана Фарсис гыч шӧртньӧ ден шийым, слон лум, маймыл ден павлин-шамычым конден шогеныт.
22 Соломон шке поянлыкше да мунлылыкшо дене мландымбалысе чыла кугыжам эртен каен.23 Мландымбалысе чыла кугыжа, тудын шӱмышкыжӧ Юмын пыштыме мунлылыкым колышташ манын, Соломон дене вашлиймашым кычалын.24 Кажныже шке пӧлекшым конден: ший ден шӧртньӧ арверым, вургемым, саргуралым, тамлыпушан настам, имне ден мулым. Ий гыч ийыш тыге лийын шоген.25 Соломонын имньыж ден орваже-влаклан ныл тӱжем вӱтаже да латкок тӱжем имнешкыже лийын. Нуным тудо орван сарзывийлан ойырымо олалаште да шкеж дене Иерусалимыште кучен.26 Евфрат эҥер деч тӱҥалын, Филистим мланде ден Египет чек марте кугыжа-влак чыланат тудын кидше йымалне лийыныт.27 Соломонын кугыжаланымыж годым [шӧртньӧ ден] ший Иерусалимыште тыглай кӱ наре, а кедр гын лоп верыште кушшо ир смоква пушеҥге наре лийыныт.28 Имньым тудлан Египет да моло эл гыч конденыт.
29 Соломонын моло пашаже, тӱҥалтыш гыч мучаш марте, пророк Нафанын возымаштыже, Силом гыч Ахийын пророклен ойлымаштыже, ончыкужшо Иоильын Нават эрге Иеровоам нерген ужмо кончымашлаштыже возымо улыт.30 Соломон Иерусалимыште пӱтынь Израиль дене нылле ий кугыжаланен.31 Вара Соломон шке кугезыж-влак деке ушнен, тудым Давид ачажын олаштыже тоеныт. Тудын олмеш кугыжалан Ровоам эргыже шогалын.
Глава 9