Выбрать язык
Книги Ветхого Завета
Книги Нового Завета
с русским текстом1 Иерусалимыш толмеке, Израиль дене кредалаш да кугыжанышым шкаланже пӧртылташ манын, Иуда ден Вениамин тукымла гыч Ровоам шӱдӧ кандашле тӱжем эн сай сарзым поген.2 Тунам Шемайлан, Юмын айдемыжлан, Господь деч тыгай шомак лийын:3 «Ровоамлан, Иуда тукым кугыжалан, Соломон эргылан, тыгак Иуда ден Вениамин тукымысо израильтян-шамычлан каласе:4 ”Господь тыге ойла: шке иза-шольыда-влак дене сарым ида тӱҥал. Кажныже шке мӧҥгышкыда пӧртылза, вет чыла тиде Мый дечем лийын”». Нуно Господьын шомакшым колыштыныт да Иеровоам ваштареш кайыме сар гыч мӧҥгеш пӧртылыныт.
5 Ровоам Иерусалимыште илен. Тудо Иудан нине олаже-влакым пырдыж дене авырен чоткыдемден:6 тиде – Вифлеем, Етам, Фекой,7 Беф-Цур, Сохо, Одоллам,8 Геф, Мареша, Зиф,9 Адораим, Лахис, Азека,10 Цора, Аиалон, Хеврон. Нине чоткыдемдыме ола-влак Иуда ден Вениамин тукымын мландыштышт лийыныт.11 Тушто Ровоам аралалтме чоҥеж-влакым пеҥгыдемден, сарзывуй-шамычым шогалтен, киндым, ӱйым да йошкар аракам аралыме верлам ыштен.12 Чыла олашке тудо авыртыш ден умдо-влакым колтен, ола-шамычым пеш чот пеҥгыдемден. Иуда ден Вениамин тудын кид йымалныже кодыныт.
13 Пӱтынь Израиль мландыште илыше иерей ден левит-влак тудын велыш шогалыныт.14 Левит-шамыч кӱтымӧ да илыме верыштым коден каеныт да Иуда мландыш, Иерусалимыш толыныт – Иеровоам ден тудын эргыж-влак нуным Господьлан служитлыме паша деч кораҥденыт улмаш.15 Вет Иеровоам кӱкшакасе святой верлашке, шке ыштыме каза ден ӱшкыж статуйжо-влак деке, шке онаеҥже-шамычым шогалтылын улмаш.16 Кажне Израиль тукымышто Господьым, Израильын Юмыжым, уло шӱм-чон дене кычалше еҥ-влак лийыныт. Шке ача-кочаштын Господь Юмыжлан надырым кондаш манын, нуно левит-влак почеш Иерусалимыш толыныт.17 Нуно Иуда кугыжанышым кум ий пеҥгыдемденыт да Ровоам, Соломон эрге, велне лийыныт – тынар жап Давид ден Соломонын корнышт дене коштыныт.
18 Ровоам шкаланже Махалафам марлан налын. Тудыжын ачаже Давид эрге Иеримоф, а аваже Авихаиль, Иессейын Елиав эргыжын ӱдыржӧ, лийыныт.19 Махалафа тудлан эрге-влакым – Иеусым, Шемарийым да Загамым – ыштен.20 Вара Ровоам Маахам, Авессаломын ӱдыржым, марлан налын. Тудо Ровоамлан Авийым, Аттайым, Зизам да Шеломифым ыштен.21 Маахам, Авессаломын ӱдыржым, Ровоам чыла ватыж ден кулватыж деч чотрак йӧратен. А чылаже тудын латкандаш ватыже да кудло кулватыже лийын. Нуно тудлан чылаже коло кандаш эрге ден кудло ӱдырым ыштеныт.22 Ровоам Авийым, Маахан эргыжым, кугыжам ышташ манын, иза-шольыж-влакын вуйлатышыштлан шогалтен.23 Ровоам мунлын ыштен: эргыже-влакым Иуда ден Вениамин кундемласе чоткыдемдыме олалашке вуйлаташ колтен, нунылан кугу шапашым да шуко ватым пуэн.
Глава 11