Выбрать язык
Книги Ветхого Завета
Книги Нового Завета
с русским текстом1 Господьын пӧртшым да шкенжын пӧртшым Соломон коло ий чоҥен,2 тидын деч вара Хирамын пуымо олаже-влакым угыч нӧлталын да тушко израиль эрге-шамычым илаш пуртен.3 Вара Соломон Емаф-Цова ола ваштареш сар дене каен да тудым сеҥен налын.4 Эше ир мландыште Фадморым, Емафыште чоҥымо шапаш аралыме олаже-влакым чоткыдемден.5 Соломон Кӱшыл ден Ӱлыл Беф-Ороным – пырдыжан, капкан да тӱкылтышан чоткыдемдыме ола-влакым – угыч нӧлталын.6 Тудо тыгак Ваалафым, шапашым аралыме ола-влакым, орван имне ден кудалышт коштмо имне-шамычлан ола-влакым угыч чоҥен. Мом Соломон Иерусалимыште, Ливан курыкышто, вуйлатен шогымо пӱтынь мландыштыже чоҥаш шонен, чыла ыштен.
7 Хеттей, аморрей, ферезей, евей, иевусей-влак деч кодшо уло калыкым – нуно израильтян кокла гыч лийын огытыл, –8 нине калыкын йочаштым, кӧмытым израиль эрге-влак пытарен огытыл, Соломон ӧкым пашам ышташ шогалтен. Таче кечынат тиде тыгак кодын.9 Но израиль эрге-влаклан Соломон тыгай пашам ыштыктен огыл. Нуно тудын сарзыже, сарзывуйжо, орва ден имнешке-шамычын вуйлатышышт лийыныт.10 Соломон кугыжан кокшӱдӧ витле тӱҥ эскерышыже лийын. Нуно пашам ыштыше калыкым вуйлатеныт.11 Фараонын ӱдыржым Соломон Давид-Ола гыч лӱмынак тудлан чоҥымо пӧртышкӧ илаш конден. Тудо каласен: «Давидын, Израиль кугыжан, пӧртыштыжӧ мыйын ватем илышаш огыл, вет тиде вер святой – тушто Господьын шондыкшо лийын».
12 Юмын пӧртыш пурымо кыдеж ончылно чоҥымо Господьын жертвенникеш Соломон Господьлан йӱлалтен пуымо надырым кондаш тӱҥалын.13 Моисейын кажне кечылан кӱштен кодымо йӱла радам дене келшышын, тудо надырым конден шоген: шуматкечын, у тылзе годым да кажне ийын эртарыме кум пайрем – Шергинде пайрем, Арня пайрем да Омаш пайрем – годым.14 Шке Давид ачажын кӱштымыж почеш Соломон службым эртараш иерей пӧлка-влакым шогалтен. Тыгак Господьым чаплаш да кажне кечын йӱла радамым шуктымаште иерей-шамычлан полышкалаш левит пӧлка-влакым, а кажне капкам оролаш капка орол пӧлка-шамычым шогалтен. Тыге ышташ Давид, Юмын айдеме, кӱштен коден.15 Иерей ден левит-влак шотышто, тыгак поянлыкым аралыме вер шотышто кугыжан кӱштымыжӧ шуктымо лийын.16 Тыге Соломон, Господьын пӧртлан негызым пыштыме кече гыч тудым чоҥен пытарымешке, шке пашажым тӱрыснек шуктен. Господьын пӧртшӧ ямде лийын.
17 Тидын деч вара Соломон Идумей мландысе теҥыз серыште верланыше Ецион-Гаверыш да Елафыш каен.18 Хирам Соломон деке шке тарзыже-влакым колтен, нунышт тудлан корабль-шамычым да теҥызым сайын палыше еҥ-влакым намиеныт. Нуно Соломонын еҥже-влак дене пырля Офирыш каеныт, тушто нылшӱдӧ витле талант шӧртньым налыныт да Соломон кугыжалан конденыт.
Глава 8