Выбрать язык
Книги Ветхого Завета
Книги Нового Завета
с русским текстом1 Кунам Давид Саул деч, Кис эрге деч, эше шылын илен, теве нине сарзе-влак тудын деке Секелагыш толыныт да Давидлан кредалмаште полшеныт.2 Нунын йоҥежышт лийын, нуно пурла да шола кид денат шӱштӱштӧ дене кӱм кышкеныт да пикш дене лӱйкаленыт. Нуно Вениамин тукым гыч, Саулын родо-тукымжо лийыныт.3 Вуйлатышышт Ахиезер улмаш, тудын почеш Иоас – нуно Гива гыч Шемайын эргыже-влак лийыныт. Тыгак Иезиел ден Пелет, Азмаветын эргыж-влак, Анафоф гыч Бераха ден Иегу,4 Гаваон гыч Ишмаий – кумло тале сарзе гыч иктыже, кумло еҥым вуйлатыше. Эше Иеремий, Яхазиил, Иоханан, Гедера гыч Иозавад,5 Елузай, Иеримоф, Веалий, Шемарий, Хариф гыч Сафатий,6 Корей урлык гыч Елкана, Ишшияху, Азариил, Иоезер да Иашовам,7 Гедор гыч Иоела ден Зевадий, Иерохамын эргыж-влак.
8 Ир мландысе карманыште лиймыж годым Давид деке Гад тукым гычат ушненыт. Тиде виян, лӱддымӧ сарзе-влак лийыныт, нуно авыртыш да умдо дене кредал моштеныт. Нуно сынышт дене лев гай койыныт да курыкласе каза гай писе лийыныт.9 Вуйлатышышт Езер лийын, тудын почеш – Овадий, кумшо – Елиав,10 нылымше – Мишманна, визымше – Иеремий,11 кудымшо – Аттай, шымше – Елиил,12 кандашымше – Иоханан, индешымше – Елзавад,13 луымшо – Иеремий, латикымше – Махбанай.14 Нине Гад тукым эрге-влак сарзывуй лийыныт: изиракше шӱдӧ сарзе дене вуйлатен, кугуракше – тӱжем дене.15 Лач нуно икымше тылзын вӱд ташлен лекме жапыште Иорданым вонченыт да эрвел ден касвел могырысо лапверлаште илыше-влакым поктен колтеныт.
16 Давид дек карманышкыже тыгак Вениамин ден Иуда тукым еҥ-влак толыныт.17 Давид нунын ваштареш лектын да тыге каласен: «Те тыныс дене, мыланем полшаш толында гын, мый тендан дене ушнаш ямде улам. Но те мыйым титакем уке ӱмбач тушманлан ужалаш толында гын, тек ача-кочана-влакын Юмышт тидым ужеш да тыланда пӧртылта!»18 Тунам Амасайым, нине кумло сарзын вуйлатышыжым, шӱлыш авалтен, да тудо каласен: «Ме тыйын улына, Давид! Ме тый денет улына, Иессей эрге! Тыныс тыланет, тыныс тыланет полшышо-влаклан лийже! Вет тылат тыйын Юмет полшен шога!» Тунам Давид нуным шкеж деке налын да шке сарзыж-влакым вуйлаташ шогалтен.
19 Кунам Давид филистим-влак дене пырля Саул ваштареш сар дене каен, тудын дек Манассий тукым гычат икмынярын ушненыт. Но тунам Давид филистим-влаклан полшен огыл, вет филистим вуйлатыше-влак, каҥашымеке, тудым мӧҥгеш колтеныт. Нуно каласеныт: «Давид шке Саул озаж деке вонча гын, ме шке вуйланна муына».20 Кунам Давид мӧҥгеш Секелагыш пӧртылын, тудын дек Манассий тукым гыч теве кӧмыт ушненыт: Аднах, Иозавад, Иедиаил, Михаил, Иозавад, Елигу да Цилфай – Манассий эрге-влакын тӱжемвуйышт.21 Нуно Давидлан аген коштшо-влак ваштареш кредалаш полшеныт. Чыланат лӱддымӧ еҥ да Давидын сарзывийжын вуйлатышышт лийыныт.22 Давидлан полшаш манын, калык кажне кечын шукырак да шукырак толын, да тудын сарзывийже Юмын сарзывийже гай кугу лийын.
23 Теве Давид деке Хевроныш толшо сарзе-влак. Господьын каласымыж семынак, нуно Саулын кугыжа кучемвийжым Давидлан пуаш толыныт. Чотышт тыгай лийын:24 Иуда тукым гыч – авыртыш ден умдым нумалше, кредалаш ямде улшо куд тӱжемат кандашшӱдӧ еҥ,25 Симеон тукым гыч – шым тӱжемат шӱдӧ лӱддымӧ еҥ,26 Левий тукым гыч – ныл тӱжемат кудшӱдӧ еҥ,27 тыгак Иоддай – Аарон урлыкын вуйлатышыже, тудын дене пырля кум тӱжемат шымшӱдӧ еҥ,28 эше Садок – лӱддымӧ самырык пӧръеҥ, да тудын урлыкшо гыч коло кок сарзывуй,29 Вениамин тукым гыч – кум тӱжем еҥ, нуно Саулын родо-тукымжо лийыныт да шукынжо эше тудлан ӱшанле кодыныт,30 Ефрем тукым гыч – коло тӱжемат кандашшӱдӧ лӱддымӧ сарзе, нуно шке тукымыштын лӱмлӧ еҥышт лийыныт.31 Манассийын пел тукымжо гыч – латкандаш тӱжем еҥ. Давидым кугыжалан шогалташ кайышт манын, нуно кажныже лӱмышт дене каласыме лийыныт.32 Иссахар тукым гыч Израильлан кунам да мом ышташ кӱлмым палыше ушан-шотан кокшӱдӧ вуйлатыше толын, пеленышт толшо моло иза-шольышт нунын мутыштым шуктен шогеныт.33 Завулон тукым гыч – кредалаш ямде улшо, тӱрлӧ саргуралым нумалше витле тӱжем еҥ. Нуно ик ой дене Давидлан полшаш толыныт.34 Неффалим тукым гыч – тӱжем сарзывуй, нунын дене пырля авыртыш ден умдым нумалше кумло шым тӱжем еҥ.35 Дан тукым гыч – кредалаш ямде коло кандаш тӱжемат кудшӱдӧ еҥ.36 Асир тукым гыч – кредалаш ямде улшо нылле тӱжем еҥ.37 Иордан вес велым, Рувим ден Гад тукым-влак гыч да Манассийын пел тукымжо гыч – чыла тӱрлӧ саргуралым нумалше шӱдӧ коло тӱжем еҥ.
38 Чыла нине сарзе, Давидым пӱтынь Израильын кугыжажлан шогалташлан пеҥгыде шонымаш дене темын, рат дене шогалын, Хевроныш толыныт. Моло израильтян-влакат Давидым кугыжалан шогалтымым сайлан шотленыт.39 Тушто нуно Давид дене кум кече лийыныт да пырля кочкын-йӱыныт, вет кочкышым мӧҥгышт гыч конденыт улмаш.40 Лишне илыше тукым-влак – эсогыл Иссахар, Завулон да Неффалим тукым-шамыч – кочкышым осёл, верблюд, мул да ӱшкыж-влак ӱмбалан конденыт. Ложаш, коштымо смоква, изюм, йошкар арака, олив ӱй, шолдыра да тыгыде вольык – чылажат пеш шуко лийын, вет тунам Израильыште кугу куан озаланен.
Глава 12