Выбрать язык
Книги Ветхого Завета
Книги Нового Завета
с русским текстом1 Чыла израильтян-влак Давид деке Хевроныш погыненыт да каласеныт: «Ме тый денет ик вӱр улына.2 Тидын деч ончыч, кунам Саул эше мемнан кугыжана лийын, тый Израильын сарзывийжым вуйлатен шогенат. Господь Юмет тылат каласен: ”Тый мыйын Израиль калыкем кӱташ тӱҥалат, тудын вуйлатышыже лият”».3 Израильын чыла кугуракше-влакат кугыжа деке Хевроныш толыныт. Тушто, Господь чурий ончылно, Давид нунын дене ойпидышым ыштен. Господьын Самуил гоч каласымыж семынак, нуно Давидым Израильын кугыжажлан шӱрен палемденыт.
4 Давид ден чыла израильтян-влак Иерусалим ӱмбаке, вес семынже Иевус ӱмбаке, каеныт. Туштыжо иевусей-шамыч иленыт.5 Иевусышто илыше-влак Давидлан каласеныт: «Тый тышке от пуро». Но Давид Сион карманым сеҥен налын, да тудо Давид-Ола лийын.6 Кугыжа каласен: «Кӧ иевусейым икымше пуштеш, тудо вуйлатыше, сарзывуй лиеш». Иоав, Саруя эрге, икымше лийын, да тудым сарзывуйлан шогалтеныт.
7 Кугыжа тиде карманыште илаш тӱҥалын, сандене тудым Давид-Ола манын лӱмденыт.8 Давид тудым йырым-йыр, Милло деч умбакыла, чоҥен шогалтен. А Иоав олан моло ужашыжым угыч нӧлталын.9 Давид вияҥын, тудын куатше утларак да утларак ешаралтын: Господь Саваоф пеленже лийын.
10 Теве Давидын эн тале сарзыже-влак, нуно Давидын вуйлаташ тӱҥалмыж годым тудлан полшен шогеныт. Уло израиль калык дене пырля нуно, Господьын каласымыж семынак, Давидым кугыжалан шогалтеныт.11 Теве нине патыр-влак: Иесваал, Ахамани эрге – кумло сарзын вуйлатышыже. Тудо шке умдыжым кумшӱдӧ еҥ ӱмбаке нӧлталын да нуным ик кредалмаште пытарен.12 Тудын деч вара – Елеазар, Ахохий тукым Додон эргыже, кум тале сарзе кокла гыч иктыже.13 Кунам филистим-влак Фасдамимыш кредалаш погыненыт, тунам тудо Давид дене пырля лийын. Тушто пасун ик касалыкыштыже шож кушкын. Калык филистим-шамыч деч куржаш тӱҥалын,14 но нине сарзе-влак пасу покшеке шогалыныт да, тушманым кырен шалатен, пасум арален коденыт. Господь тунам кугу сеҥымашым пӧлеклен!15 Кумло эн тале сарзе кокла гыч нине кумыт Давид деке Одоллам курыкпомыш воктенысе кӱ курык дек толыныт. Тунам филистим-влак Рефаим лапверыште стан дене шогеныт.16 Давид тыгодым карманыште, а филистим отряд Вифлеемыште лийыныт.17 Давидын пеш чот йӱмыжӧ шуын, да тудо каласен: «О, иктаж-кӧ мыланем Вифлеем капка воктенысе таве гыч вӱдым конда ыле гын!»18 Тунам нине кумыт филистим стан гоч шолып эртеныт, Вифлеем капка воктенысе таве гыч вӱдым коштал налыныт да Давидлан конденыт. Но кугыжа йӱаш тореш лийын да, Господьлан чапым пуэн, тудым йоктарен,19 тыге каласен: «Тиде вӱдым йӱмӧ деч Юмо мыйым аралыже! Мый нине еҥ-влакын вӱрыштым йӱаш тӱҥалам мо? Вет, шке илышыштым чаманыде, нуно мыланем вӱдым конденыт». Давид вӱдым йӱын огыл. Теве мом нине кум тале сарзе-влак ыштеныт.
20 Авесса, Иоавын шольыжо, кум сарзын вуйлатышыже лийын. Тудо умдыж дене кумшӱдӧ еҥым пуштын, нине кум тале сарзе тудым пагаленыт.21 Кум сарзе коклаште тудо эн лӱмлӧ, нунын вуйлатышышт лийын, но саде кум тале сарзе дене иктӧр шоген огыл.
22 Ваней, Иодай эрге, Кавцеил гыч лӱддымӧ еҥ, тыгак шке пашаж дене чапланен. Тудо Моав гыч Ариилын кок эргыжым пуштын. Тудак лум толмо кечын вӱдым погымо вынемыш волен да левым пуштын.23 Тудо тыгак вич кынергут кӱкшытан египтяным пуштын. Тудыжын кидыштыже куымо станын навуйжо гай кугу умдо лийын, а Ваней ваштарешыже тоя дене лектын. Тудо египтянын кидше гыч умдым шупшын налын да тудым тиде умдо денак пуштын.24 Теве мом Ваней, Иодай эрге, ыштен. Саде кум тале сарзе тудым пагаленыт.25 Кумло сарзе коклаште тудо эн лӱмлӧ лийын, но саде кум тале сарзе дене садак иктӧр шоген огыл. Давид тудым шке капоролжо-влакын вуйлатышыштлан шогалтен.
26 Моло тале тарзе-влак: Асаил, Иоавын шольыжо, тыгак Вифлеем гыч Елханан, Додо эрге;27 Харод гыч Шамма, Пелон гыч Хелец,28 Фекой гыч Ира, Иккеш эрге; Анафоф гыч Авиезер,29 Хуша гыч Совохай, Ахохий тукым гыч Илай,30 Нетофа гыч Магарай да Нетофа гычак Хелед, Ваана эрге;31 Вениамин мландысе Гива гыч Иттай, Рибай эрге; Пирафон гыч Ваней,32 Нахле-Гааш гыч Хурай, Арава гыч Авиел,33 Бахарум гыч Азмавет, Шаалбон гыч Елияхба,34 Гизон гыч Гашемын эргыже-влак; Гарар гыч Ионафан, Шаге эрге;35 Гарар гыч Ахиам, Сахар эрге; Елифал, Ур эрге;36 Махера гыч Хефер, Пелон гыч Ахий,37 Кармил гыч Хецрай; Наарай, Езбай эрге;38 Нафанын Иоиль шольыжо; Мивхар, Гагрий эрге;39 аммон Целек; Бероф гыч Нахарай, Саруян Иоав эргыжын саргурал нумалшыже;40 Итри гыч Ира, Итри гычак Гареб,41 хеттей Урий, Ахлай эрге Завад,42 Адина, Шиза эрге – Рувим тукым гыч, Рувим эрге-влакын вуйлатышышт, тудын пелен кумло сарзе лийын,43 Мааха эрге Ханан, Мифни гыч Иосафат,44 Аштероф гыч Уззий, Ароер гыч Шама ден Иеиел – Хофамын эргыж-влак,45 Иедиаил, Шимри эрге, да Фиций гыч Иоха, тудын шольыжо,46 Махавим гыч Елиил, Елнаам эрге-влак Иеривай ден Иошавий, моав Ифма,47 Елиил, Овед да Мецова гыч Иасиил.
Глава 11