Выбрать язык
Книги Ветхого Завета
Книги Нового Завета
с русским текстом1 Чыла тӱжемвуй, шӱдывуй да вуйлатыше дене каҥашымеке,2 Давид уло Израиль калыклан каласен: «Тидын дене те келшеда да тидлан Господь Юмынан кумылжо уло гын, айста Израильын чыла кундемышкыже моло иза-шольына деке, эше иерей ден левит-влак деке – нунын ола ден яллашкышт – уверым колтена. Тек нуно мемнан дек толыт,3 да ме Юмынан шондыкшым шкенан деке кондена, вет Саул вуйлатыме жапыште тудын деке коштмым чарнен улына».4 «Тек тыге лиеш», – чылан вашештеныт, вет тыге ыштымым калык чынлан шотлен.
5 Тунам Давид, Юмын шондыкшым Кириаф-Иарим гыч кондаш манын, чыла израильтян-влакым Египетысе Сихор деч Емафыш пурымо вер марте поген.6 Давид да чыла израильтян-влак, Иуда мландысе Кириаф-Иарим гыч Юмын шондыкшым кондаш манын, тушко каеныт. Тиде шондык херувим-влак ӱмбалне шинчыше Господьын лӱмжӧ дене лӱмдымӧ лийын.7 Юмын шондыкым Авинадавын пӧртшӧ гыч у орваш шынден наҥгаеныт. Орвам наҥгайыше ӱшкыж-влакым Узза ден Ахио вӱден каеныт.8 Давид да чыла израильтян-влак Юмо ончылно уло кертмышт дене юарленыт – муреныт, лира, кӱсле, тимпан, кимвал да той пуч дене шоктеныт.9 Кунам нуно Хидонын идымже дек миен шуыныт, ӱшкыж-влак шондыкым изиш гына тӱрын колтен огытыл. Шондыкым кучаш манын, Узза кидшым шуялтен.10 Кидше дене шондыкым тӱкымылан Господь шыдешкен да Уззам пуштын. Узза Господь чурий ончылно тушанак колен.
11 Господьын Уззам пытарымыжлан Давид аптыранымашыш пурен. Тиде верым тудо «Уззан пытымашыже» манын лӱмден. Таче кече мартеат тудо тыгак маналтеш.12 Тиде кечын Давид Юмо деч пеш чот лӱдын да каласен: «Кузе мый Юмын шондыкым шке декем наҥгаем?»13 Тудо шондыкым шкеж деке, Давид-Олашке, наҥгаен огыл, а Геф гыч улшо Овед-Едомын суртышкыжо намиен.14 Юмын шондык тудын дене кум тылзе лийын. Господь Овед-Едомын ешыжым да тудын чыла мо улыжым суапландарен.
Глава 13