Выбрать язык
Книги Ветхого Завета
Книги Нового Завета
с русским текстом1 Анна кумалын да тыге ойлен:
«Мыйын шӱмем Господьлан куана,
тӱкем*а Юмо кӱшкӧ нӧлталын.
Утарыметлан куанем,
тушман-влакемым воштылам.
2 Уке весе Господь гай святой,
Тый дечет моло весе уке,
Юмына гай пеҥгыде кӱ курык весе уке.
3 Ида ойлышт моктаныме шомакым,
торжа мут умшада гыч ынже лек,
вет Господь – чыла палыше Юмо,
еҥ-влакын пашашт Тудын висаштыже улыт.
4 Тодылалтыт виян-влакын пикшйоҥежышт,
а вийдыме-влак куатым ӱшталыт.
5 Теммеш кочкын тунемше-влак киндылан тарлалтыт,
а ондак шужен илыше-влак ынде канат.
Азам ыштен кертдыме ӱдырамаш шым гана азам ышта,
а шуко йочам ыштыше шкет тӱлыжген ила.
6 Господь колымашым колта да илышым пуа,
колымаш тӱняшке волта да тушечын луктеш.
7 Господь йорлештара да пойдара,
Тудак ӱлыкшемда да нӧлталеш.
8 Пурак гыч Тудо йорлым нӧлталеш,
лавыра гыч незерым луктеш,
он-влак коклашке нуным шында,
чап престолым нунылан пуа.
Вет мландын негызше-влак Господьын улыт,
тушан Тудо тӱням пеҥгыдемден.
9 Шке святойжо-влакын корныштым Тудо арала,
а осалым ыштыше-влак пычкемыште йомыт,
вет шке вийже дене огыл айдеме сеҥымашке шуэш.
10 Тудын ваштареш шогышо-влакым Господь пытара,
ӱмбакышт Тудо кава гыч кӱдырта.
[Господь – святой.
Ок моктане тек мунло еҥ шке уш-акылже дене,
виян – шке вийже дене,
поян – шке поянлыкше дене.
Моктанаш шонышо еҥ
2 тек Господьым умылен моштымыжо да палымыже дене моктана.]
Господь уло мландым ик мучаш гыч вес мучаш марте судитлаш тӱҥалеш.
Шке кугыжажлан Тудо пуа куатым,
шке шӱрен палемдыме еҥжын тӱкыжым кӱшкӧ нӧлталеш».
11 [Самуилым тушан Господь чурий ончылно коденыт.] Елкана Рамаш шке мӧҥгыжӧ каен, а рвезе иерей Илий пелен Господьлан служитлаш кодын.
12 Илийын эргыже-влак шотдымо лийыныт. Нуно Господьымат,13 калык ончылно иерейын шкем кузе кучаш кӱлмымат пален огытыл. Кунам иктаж-кӧ вольык надырым конден да шылым шолтен, иерейын тарзыже кум пӱян вилкым кучен толын14 да тудым подыш, кастрюльыш, мискыш але кӧршӧкыш чыкен. Мом вилке луктын, тудым иерей шкаланже налын. Силомыш толшо чыла израиль еҥ дене нуно тыге ыштеныт.15 Эсогыл коям йӱлалтыме деч ончыч иерейын тарзыже толынат, надырым пуышылан ойлен: «Иерейлан кӱкташ шылым пу. Тудо тый дечет шолтымо шылым ок нал, кӱчымым пу».16 «Тек йӱла почеш ончыч коям йӱлалтат, а вара кунар шонет, тунар шкаланет нал», – иктаж-кӧ манын гын, тудо тыге вашештен: «Уке, кызытак пу. Уке гын, шупшын налам».17 Нине рвезе-влакын сулыкышт Господь ончылно пеш кугу лийын, вет нуно Господьлан надыр кондымашым шотлен огытыл.
18 А Самуил, йытын ефодым чиен, Господь ончылно служитлен.19 Аваже тудлан кажне ийын изи ӱмбал вургемым урген да марийже дене пырля надырым пуаш толмыж годым конден шоген.20 Илий Елкана ден ватыжым суапландарен ойлен: «Тек Господь Тудлан пуымо тиде эрге олмеш тылат тиде ватет деч йоча-влакым эше пуа!» Нунышт вара мӧҥгышкышт каеныт.21 Господь Анна деке поро лийын – тудо мӱшкыраҥын да эше кум эрге ден кок ӱдырым ыштен, а Самуил Господь пелен кушкын.
22 Илий чот шоҥго лийын. Тудо эргыж-шамычын израильтян-влак дене мом ыштылмышт, тыгак Юмо дене вашлийме омашыш пурымо верыште служитлыше ӱдырамаш-влак дене малымышт нерген чыла колын.23 Илий нунылан каласен: «Молан те тыгайым ыштылыда? [Господьын] уло калыкше деч мый тендан осал пашада нерген колам.24 Уке, эргым-шамыч, мый декем шушо шомак сай огыл. Тендан шотышто калыкыште кузе ойлат, [тетла тыге ида ыштыл].25 Ик айдеме весе ваштареш сулыкым ышта гын, Юмо тудым арален налын кертеш. А айдеме Господь ваштареш сулыкым ышта гын, тунам кӧ тудым пыдал налеш?» Но эрге-влак ачаштын ойлымыжым колыштын огытыл, вет Господь нуным пушташ шонен пыштен улмаш.26 А Самуил кушкын да Господь ден еҥ-влак деч поро кумылым утларак да утларак налын шоген.
27 Илий деке Юмын еҥже толын да каласен: «Господь тыге ойла: ”Эше Египетыште, фараон кид йымалне улмо годым, ачатын тукымжылан Мый Шкемым палдарен омыл мо?28 Мыйын жертвенникышкем кӱзыжӧ, тамле пушан фимиамым йӱлалтен тӱтырыжӧ да Мыйын ончылнем ефодым чиен коштшо иерей лийже манын, Мый тудым Израильын чыла тукымжо гыч ойырен налын омыл мо? Израиль эрге-влакын кондымо тул надырыштым Мый ачатын тукымжылан пуэн омыл мо?29 Молан те Мыйын илыме верышкем кондаш кӱштымӧ вольык надыр ден пӧлек-влакым йолда дене тошкеда? Молан тый эргыч-влакым Мый дечем кӱшкӧ шындет? Молан те Израиль калыкемын кондымо надыржын эн сай ужашыж дене шкендам ӧрдыктареда?”30 Садлан Израильын Господь Юмыжо тыге ойла: ”Тыйын урлыкет да ачатын тукымжо Мыйын чурий ончылнем курымеш служитлаш тӱҥалыт манын ойленам”. Но кызыт Господь ойла: ”Ынде тыге огеш лий, вет Мыйым шотлышым Мыят шотлем, а Мыйым шотлыдымо-влак укеш лектыт.31 Теве тугай кече-влак лишемыт, кунам Мый тыйым да ачатын тукымжым вий-куат деч посна кодем – тыйын урлыкыштет шоҥгеммеш илыше [нигунам] огеш лий.32 Кеч Мый Израильлан порым ышташ тӱҥалам, но Мыйын илыме святой веремлан неле жап толмым тый ужат, да тыйын урлыкыштет шоҥгеммеш илыше нигӧ ок лий.33 Мый тыйын урлыкет гыч чылаштым шке жертвенникем деч ом кораҥде – шинчатым шинчавӱд дене темаш да чонетым ойгандараш манын, нуно эше тушан кодыт. Тыйын урлыкет кокла ийготан колаш тӱҥалеш.34 Теве тыланет палдарыше пале: тыйын кок эргыч, Офни ден Финеес, ик кечын колат.
35 Шкаланем Мый ӱшанле иерейым шогалтем. Тудо Мыйын шӱм-чонемлан келшышын ышташ тӱҥалеш. Мый тудын урлыкшым пеҥгыдемдем, нуно Мыйын шӱрен палемдыме еҥем ончылно эре кошташ тӱҥалыт.36 Тыйын урлыкет гыч кодшо кажне еҥ тудын деке ший окса ден кинде катыш верч вуйжым саваш толеш да каласа: ’Кочкашем лийже манын, мыйым иктаж-могай иерей сомылым ышташ шогалте’”».
*а 2:1 «Тӱкӧ» тыште лӱмнерым, чапым да вийым ончыкта.
Глава 2